بيزنەسكە تەرىس اسەر ەتەتىن تالاپتارعا «رەتتەۋشى گيلوتينا» ءادىسى قولدانىلادى

ۇلتتىق ەكونوميكا ءمينيسترى الىبەك قۋانتىروۆ بۇگىنگى تاڭدا رەتتەۋدىڭ بارلىق 44 سالاسى قارالعانىن، 2 823 نورماتيۆتىك-قۇقىقتىق اكتىگە تالداۋ جاسالعانىن باياندادى. ناتيجەسىندە مەملەكەتتىڭ جاڭا رەتتەۋشى ساياساتىنىڭ شارتتارىنا سايكەس كەلمەيتىن بيزنەسكە قويىلاتىن 10 108 تالاپ انىقتالدى. وسىعان بايلانىستى وتكەن جىلدان باستاپ زاڭعا تاۋەلدى اكتىلەر اياسىندا ولاردى جويۋ بويىنشا بەلسەندى جۇمىس جۇرگىزىلىپ جاتىر. وسىعان ۇقساس پروتسەسس زاڭنامالىق وزگەرىستەر بولىگىندە دە جۇرەدى.

سونىمەن قاتار رەتتەۋ سالالارىن تالداۋ قورىتىندىسى بويىنشا Smart Data Ukimet پلاتفورماسىندا كاسىپكەرلىك سالاسىنداعى مىندەتتى تالاپتار ءتىزىلىمى ىسكە قوسىلدى، ول رەتتەۋشى اكتىلەردى تۇراقتى نەگىزدە قايتا قاراۋعا مۇمكىندىك بەرەدى. بۇل رەتتە بيزنەس-ورتاعا تەرىس اسەر ەتەتىن تالاپتارعا قاتىستى «رەتتەۋشى گيلوتينا» ءادىسى قولدانىلاتىن بولادى. ول كاسىپكەرلەردى تالاپتاردى بۇزعانى ءۇشىن اكىمشىلىك جاۋاپكەرشىلىكتەن بوساتۋدى قاراستىرادى.

سونىمەن قاتار مينيستر 2022 جىلى مەملەكەتتىك باقىلاۋدىڭ 35 سالاسى اۆتوماتتاندىرىلعانىن، مەملەكەتتىك ورگانداردىڭ 16 اقپارات جۇيەسى Smart Data Ukimet-كە ينتەگراتسيالانعانىن ايتتى. قالعان 35 سالانى اۆتوماتتاندىرۋدى 2023 جىلى اياقتاۋ جوسپارلانىپ وتىر.

ءوز كەزەگىندە «اتامەكەن» ۇكپ تورالقاسىنىڭ توراعاسى رايىمبەك باتالوۆ كاسىپكەرلىكتى رەتتەۋ سالالارىن تالداۋ جۇمىسىنا بيزنەس-ورتادان 100-دەن استام ساراپشى تارتىلعانىن حابارلادى.

پرەمەر-مينيستر بيزنەسكە اكىمشىلىك جۇكتەمەنى ازايتۋ ءۇشىن بارلىق رەتتەۋشى اكتىلەر بويىنشا اۋقىمدى تالدامالىق جۇمىس جۇرگىزىلگەنىن اتاپ ءوتتى.

«وسى جۇمىستاردىڭ قورىتىندىسى بويىنشا مىندەتتى تالاپتار ءتىزىلىمى جاسالدى. ونى ءبىز قاجەت كەزدە قايتادان قاراپ، رەتتەپ وتىراتىن بولامىز. بۇل جەردە «اتامەكەن» پالاتاسى بەلسەندى ءرول اتقارۋى ءتيىس. ياعني، ورىنسىز، ءبىرىن-ءبىرى قايتالايتىن نەمەسە ءتيىمسىز تالاپتاردى انىقتاۋ جانە الىپ تاستاۋ جۇمىستارى تۇراقتى نەگىزدە جۇرگىزىلەتىن بولادى»، دەدى ءاليحان سمايىلوۆ.

سونىمەن قاتار ۇكىمەت باسشىسى مەملەكەتتىك باقىلاۋ جۇيەسىندە تاۋەكەلدەردى باعالاۋ جانە باسقارۋ جۇيەسىن اۆتوماتتاندىرۋ بويىنشا كەشەندى شارالار قابىلدانىپ جاتقانىن دا ايتىپ ءوتتى. 35 سالادا بۇل جۇمىس اياقتالدى. ول كاسىپكەرلەردى نەگىزسىز تەكسەرۋلەردەن قورعاۋعا مۇمكىندىك بەرەدى.

«جالپى «تازا پاراقتان» رەفورماسى بيزنەس-ورتانى رەتتەۋدىڭ تيىمدىلىگىن ارتتىرىپ، كاسىپكەرلىكتى دامىتۋعا قولايلى جاعداي جاسايدى. بيزنەستىڭ تۇراقتى دا تابىستى قىزمەتىنە ءبىرىنشى كەزەكتە، مەملەكەتتىڭ ءوزى مۇددەلى. كاسىپكەرلەر وسىنى سەزىنۋلەرى كەرەك»، دەدى ءاليحان سمايىلوۆ.

ۇكىمەت باسشىسىنىڭ ايتۋىنشا، اتقارىلعان جۇمىستار 2029 جىلعا قاراي شاعىن جانە ورتا بيزنەستە جۇمىس ىستەيتىندەر سانىنىڭ 4،7 ملن ادامعا دەيىن وسۋىنە جانە مەملەكەتتىڭ ەكونوميكاداعى ۇلەسىن 14%-عا دەيىن تومەندەتۋگە مۇمكىندىك بەرەدى.

وسىعان بايلانىستى پرەمەر-مينيستر بيزنەسكە قويىلاتىن ارتىق تالاپتاردى جويۋ بويىنشا زاڭنامالىق وزگەرىستەردىڭ ۋاقىتىلى قابىلدانۋىن قامتاماسىز ەتۋ، زاڭعا تاۋەلدى اكتىلەرگە ءتيىستى تۇزەتۋلەر ەنگىزۋدى جىلدامداتۋ جانە ءبىرىنشى جارتىجىلدىقتىڭ سوڭىنا دەيىن مەملەكەتتىك باقىلاۋ جۇيەسىن اۆتوماتتاندىرۋ جۇمىسىن اياقتاۋ قاجەتتىگىن ايتىپ ءوتتى.

ودان بولەك، ءاليحان سمايىلوۆ اشىقتىقتى ارتتىرۋ ماقساتىندا مەملەكەتتىك قولداۋ شارالارىن الۋشىلاردى ىرىكتەۋ راسىمدەرىن ودان ءارى اۆتوماتتاندىرۋدىڭ، سونداي-اق اكىمدىكتەر مەن مينيسترلىكتەر تاراپىنان ءوندىرىستىڭ، ينفراقۇرىلىم مەن ەلەكتر ەنەرگياسىنىڭ نەگىزگى فاكتورلارىنا تەڭ قول جەتكىزۋ بويىنشا جاڭا بيزنەس-جوبالارعا جان-جاقتى قولداۋ كورسەتۋدىڭ ماڭىزدى ەكەنىن اتاپ ءوتتى.

سوڭىندا ۇكىمەت باسشىسى مەملەكەتتىك ورگانداردى كاسىپكەرلەردىڭ وتىنىشتەرى بويىنشا جەدەل ارەكەت ەتۋگە شاقىردى.

«جەر قاتىناستارى، مەملەكەتتىك ساتىپ الۋ، سالىقتىق اكىمشىلەندىرۋ، ساۋلەت جانە قالا قۇرىلىسى سالالارىندا شاعىمدار سانى كوپ. جۇمىستىڭ جاڭا بەلسەندى فورماتىنا كوشىپ، بيزنەس ءجيى كوتەرەتىن پروبلەمالاردى شەشۋ ءۇشىن جۇيەلى شارالار قابىلداۋ قاجەت»، دەدى ءاليحان سمايىلوۆ.