ۇبت: مينيستر مالىمەت بەردى

ورتالىق كوممۋنيكاتسيالار قىزمەتى ورتالىعىنىڭ الماتى بولىمشەسىندە ءبىلىم جانە عىلىم ءمينيسترى اسلان ءسارىنجىپوۆ بيىلعى ۇلتتىق بىرىڭعاي تەستىلەۋ كورسەتكىشتەرى بويىنشا جۋرناليستەرگە بريفينگ وتكىزدى. ەلىمىزدىڭ وزگە ايماقتارىمەن تىكەلەي بايلانىس تۇرىندە جۇرگىزىلگەن بريفينگكە مينيستردەن وزگە ءبىلىم جانە عىلىم مينيسترلىگى ءبىلىم جانە عىلىم سالاسىن باقىلاۋ كوميتەتىنىڭ توراعاسى ءزابي­را ورازاليەۆا مەن ۇلتتىق تەستىلەۋ ورتالى­عىنىڭ ديرەكتورى قالي ابديەۆتەر قاتىستى. ءمينيستردىڭ ايتۋىنشا, 2014 جىلعى ۇبت-عا 87 مىڭ, ياعني 65 پايىز ءبىتىرۋشى قاتىسىپ, ولاردىڭ 13 مىڭنان استامى 100 بالدان جوعارى جيناعان. 2013 جىلمەن سالىستىرعاندا بۇل 3 پايىزعا جوعارى. ەڭ جوعارعى كورسەتكىش – 125 بالدىق دەڭگەيدى ەلىمىز بويىنشا 4 وقۋشى ەركىن باعىندىرعان. سونداي-اق, اپەللياتسياعا 400-دەن اسا سۇراۋ سالىنىپ, ولاردىڭ 84-ءى 14 ماۋسىمعا دەيىن تولىقتاي قاناعاتتاندىرىلعان. بۇدان وزگە 50 بالدىق دەڭگەيدەن وتە الماعان بىتىرۋشىلەردىڭ جالپى سانى 20 مىڭ, ياعني 23 پايىز. بىلتىر بۇل كورسەتكىش 28 پايىز بولعان. مينيستر كەلتىرگەن دەرەك بويىن­شا, ۇبت-عا قاتىسۋ مەن ەڭ جوعارعى كورسەت­كىش­تەرگە قول جەتكىزۋدە الدىڭعى ورىندا الماتى قالاسى, ەكىنشى ورىندا استانا, ودان كەيىن اقتوبە قالاسى مەن باتىس قا­زاق­ستان وبلىسى تۇر ەكەن. مۇنى ا.ءسارىنجىپوۆ الماتى, استانا سەكىلدى قالالاردا ءبىلىم بەرۋ دەڭگەيىنىڭ ءوسۋى مەن جوعارى ساناتتى مۇعالىمدەر قاتارىنىڭ ارتۋىمەن, سونداي-اق ءىرى قالالاردا ىزدەنىمپاز جاس­تارعا تولىقتاي جاعدايدىڭ جاسالۋىمەن جانە مۇمكىنشىلىكتەردىڭ كوپتىگىمەن ءتۇسىندىردى. بىلتىر قالالىق جەردە ورتاشا ءبىلىم دەڭگەيى 79 بالدى كورسەتسە, بيىل 81,5 بالل. ال اۋداندىق جەرلەردە 70,3 بالل بولسا, بيىل 72,19 بالدى كورسەتىپ وتىر.  قالا مەن اۋداندار اراسىنداعى 10 بالدىڭ اجەپتاۋىر ايىرماشىلىق ەكەنىن ايتقان مينيستر كەلەشەكتە بۇل كورسەتكىشتىڭ وسۋىمەن قاتار دەڭگەيلەسۋىنە دە ۇلكەن ءمان بەرىلەتىندىگىن جەتكىزدى. سوڭعى 2-3 جىل كولەمىندە ءبىتىرۋ­شىلەردىڭ بيولوگيا مەن فيزيكا پانىنە قىزىعۋشىلىقتارى ارتقانى بەلگىلى بولدى. بۇل دەگەنىمىز ەلىمىزدىڭ جاستارى تەحنيكالىق سالاعا ءمان بەرىپ, كۇردەلى عىلىمعا ۇمتىلىپ جاتقانىن ايعاقتايدى. 2014 جىلعى ۇبت قورىتىندىسى ەلىمىزدىڭ مەكتەپ بىتىرۋشىلەرى اراسىندا «التىن بەلگىگە» لايىقتىلار ساپاسىنىڭ ارتقانىن دا كورسەتتى. بۇل بەلگىگە لايىق دەپ ۇسىنىلعان بىتىرۋشىلەردىڭ بيىل 42 پايىزى ءوز بىلىمىمەن «التىن بەلگى» يەگەرى اتانسا, بىلتىر 34 پايىزى  عانا وسى بەلگىگە لايىق بولعان-دى. ەگەر ساپادان سانعا كوشەر بولساق, بيىلعى كورسەتكىش بويىنشا پايىزدىق دەڭگەي از بولعانىمەن, «التىن بەلگىنى» قورعاۋشىلار سانى جوعارى دەڭگەيدى كورسەتتى. ءبىلىم جانە عىلىم ءمينيسترى ۇبت بويىنشا ەڭ جوعارى بالل جيناعان مەكتەپتەردىڭ ءتىزىمىن دە اتاپ ءوتتى. ولاردىڭ اراسىندا استانا, ورال, وڭتۇستىك قازاقستان وبلىسى, الماتى قالاسى, قوستاناي مەن كەنتاۋ قالالارىنداعى ءبىلىم وردالارى بار. جيىندا, بيىلعى ۇبت-عا قاتىسۋشى ءتۇ­لەكتەردىڭ جالپى سانى ەلدەگى دەموگرافيالىق كورسەتكىشتەرمەن تىكەلەي بايلانىستى ەكەندىگى ايتىلدى. 2014 جىلى 133 مىڭ وقۋشى مەكتەپ بىتىرسە, بىلتىر 139 مىڭ تۇلەك بىتىرگەن, ياعني, بيىل بىزدە مەكتەپ بىتىرۋشىلەر سانى 6 مىڭ بالاعا ازايىپ وتىر. جانە بۇل كورسەتكىش الداعى 3-5 جىل بويىنا قايتالانادى. قانات ەسكەندىر, «ەگەمەن قازاقستان». الماتى.