گلەمپينگ اۋىلدىڭ اجارىن اشادى

ءتۋريزمدى دامىتۋ ماسەلەلەرى جونىندەگى كوشپەلى القا وتىرىسىندا مادەنيەت جانە سپورت ۆيتسە-ءمينيسترى ەرجان ەركىنباەۆ ءتۋريزم­نىڭ گلەمپينگ باعىتىن دامىتۋعا كوڭىل ءبولىنىپ جاتقانىن اتاپ ءوتتى.

«اۋىلدىق جەرلەردە كەمپينگتەر مەن قو­ناق­ۇيلەر سالۋ بويىنشا زاڭنامالىق شەكتەۋ­لەر بار. ستاتيستيكاعا سايكەس، ەلىمىزدە 219 مىڭ فەرمەرلىك، شارۋا قوجالىعى بار. وسى ورايدا فەرمەرلەرگە اۋىل شارۋاشىلىعى جەرلەرىنىڭ 10%-دان اسپايتىن كولەمىن تۋريس­تەرگە قىزمەت كورسەتۋ ءۇشىن قوناقۇيلەر مەن گلەمپينگتەر سالۋعا رۇقسات بەرۋدى ۇسىنامىز»، دەدى ە.ەركىنباەۆ.

مينيسترلىكتىڭ بولجامى بويىنشا، فەر­مەرلىك شارۋاشىلىقتاردىڭ كەم دەگەندە 1%-ى تۋريستەردى ورنالاستىرۋمەن اينالىسسا، كەم دەگەندە 2 ادامدى جۇمىسقا السا، جىل سايىن 6،6 مىڭ ادام جۇمىس ورنىمەن قامتىلادى.

وتكەن جىلى ەلىمىزدىڭ 8 ءوڭىرى – الماتى، اقمولا، اقتوبە، ماڭعىستاۋ، پاۆلودار، تۇر­كىستان وبلىستارىندا جانە الماتى، شىم­كەنت قالالارىندا 28 گلەمپينگ كەشەنى اشىلعان. جاقىن ارادا وسىنداي كەشەندەر «التىنەمەل» ۇلتتىق پاركىندە، قارقارالى اۋدانىندا پايدا بولادى. سونداي-اق اقتوبە، جامبىل، سولتۇستىك قازاقستان وبلىستارىندا وسىنداي نىسانداردىڭ قۇرىلىسى جوسپارلانعان. وسى ورايدا مۇنداي اگروتۋريزم نىساندارى فرانتسيا، گەرمانيا، اۋستريا، ارگەنتينا، بەلارۋس سياقتى ەلدەردە وتە تانىمال ەكەنىن ايتا كەتكەن ءجون.