قوعام • 29 قاڭتار، 2023

كادەتكە قاجەتتى تاعىلىمداما

ششۋچە قالاسىندا ورنالاسقان شوقان ءۋاليحانوۆ اتىنداعى قورعانىس مينيسترلىگى اسكەري كوللەدجىنىڭ كادەتتەرى قۇرلىق اسكەرلەرىنىڭ قۇرامالارى مەن بولىمدەرىندە اسكەري تاجىريبەدەن وتەدى.

بانۋ ءادىلجان

وقۋ باعدارلاماسىنا سايكەس 2-كۋرستىڭ 180-گە جۋىق كۋرسانتى موتواتقىشتار، تانك جانە ارتيللەريالىق بولىمشەلەردە، سونداي-اق تەڭىز جاياۋ اسكەرى قۇراماسىندا بولىمشە كومانديرى لاۋازىمدارىندا اسكەري تاعىلىمدامادان وتەدى. تاجىريبە بولىمشەلەردى ۇيلەستىرۋ كەزەڭىندە ۇيىمداستىرىلىپ وتىر. بۇل ءوز كەزەگىندە بولاشاق سەرجانتتارعا اسكەرلەردى دايارلاۋ جانە جاۋىنگەرلىك قولدانۋ ەرەكشەلىكتەرىمەن تىكەلەي تانىسۋعا مۇمكىندىك بەرەدى.

ءبىر اي ىشىندە ولار كۇندەلىكتى جانە وقۋ-جاۋىنگەرلىك قىزمەت ۇدەرىسىندە جەكە قۇرامدى باسقارۋدىڭ نەگىزدەرىن يگەرۋى كەرەك. كۋرسانتتار تاعىلىمداما بارىسىندا باعىنىستىلاردى ءوز بەتىنشە باسقارۋعا، جاۋىنگەرلىك دايارلىق، قارۋ-جاراق پەن اسكەري تەحنيكانى پايدالانۋ بويىنشا ساباقتار وتكىزۋگە تاجىريبە الادى. سونداي-اق كوشباسشىلىق جانە كومانديرلىك قابىلەتتەرىن جەتىلدىرەدى.

– بۇل مەن ءۇشىن دە، كۋرستاستارىم ءۇشىن دە وقۋ ورنىندا العان تەوريالىق ءبىلىمىمىزدى تەكسەرۋگە جانە تاجىريبەدە قولدانۋعا تاماشا مۇمكىندىك. مۇندا كازارمالار مەن پوليگونداردا جەكە قۇرامدى باسقارا وتىرىپ، ءبىز سەرجانتتار جۇمىسىنىڭ قانشالىقتى ماڭىزدى ەكەنىن تۇسىنەمىز. قازىردىڭ وزىندە ساربازدارعا ۇلگى بولۋعا تىرىسامىز، – دەدى 4-مەحانيكالاندىرىلعان قۇرامادا تاعىلىمدامادان ءوتىپ جاتقان كادەت راسۋل بەرداليەۆ.

ش.ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجى كاسىبي سەرجانتتار مەكتەبى بولىپ سانالادى. بۇل جەردە قۇرلىق اسكەرلەرىنىڭ بولىمشەلەرى ءۇشىن كىشى كومانديرلەردى دايارلاۋ بويىنشا ءبىلىم بەرۋ باعدارلامالارىن ىسكە اسىرادى. جاسوسپىرىمدەر وقۋ ورنىنا ورتا ءبىلىم العاننان كەيىن (ورتا مەكتەپتىڭ 11-سىنىبى) تۇسە الادى.

ىرىكتەۋ مەديتسينالىق كۋالاندىرۋ، كاسىپتىك-پسيحولوگيالىق تەستىلەۋ جانە دەنەشىنىقتىرۋ دايارلىعى بويىنشا نورماتيۆتەردى تاپسىرۋ جولىمەن اتتەستاتتىڭ ورتاشا بالى ەسكەرىلە وتىرىپ جۇرگىزىلەدى. اسكەري كوللەدجدى بىتىرگەننەن كەيىن تۇلەكتەر «سەرجانت» اسكەري اتاعىن، «اسكەري ىستەگى كىشى بۋىن مەنەدجمەنتى» ماماندىعىن، سىنىپتىق بىلىكتىلىگىن الادى جانە كەلىسىمشارت بويىنشا اسكەري قىزمەت وتكەرۋ ءۇشىن قارۋلى كۇشتەرگە جىبەرىلەدى.