كۇي رۋحى اسقاقتاعان كەش

بيىل ەلوردالىق قازاق ۇلت اس­پاپ­تارى وركەسترىنىڭ قۇرىلعانىنا 25 جىل تولادى. ءار كەزەڭدە ونەرلى ۇجىمدى تانىمال كۇيشى، كومپوزي­تور، ديريجەر مۇحامەتقالي ءتىن­ا­لين، قازاقستاننىڭ ەڭبەك سىڭىرگەن قايراتكەرى مىرزاعالي ايدابولوۆ سەكىلدى ازاماتتار باسقاردى. 2008 جىلدان بەرى وركەسترگە كۇيشى، كومپوزيتور، ديريجەر، قازاقستاننىڭ ەڭبەك سىڭىرگەن قايراتكەرى ايتقالي جايىموۆ جەتەكشىلىك جاسايدى. اتالعان ۇجىمدا جۇزگە جۋىق مۋزىكانت ەڭبەك ەتەدى. سونىمەن قاتار وركەستر رەپەرتۋارى حالىقتىق، كاسىبي جانە اكادەميالىق مۋزىكانى قامتيدى. دەگەنمەن كونتسەرتتىك باعدارلامالاردىڭ ءبىراز بولىگىن دومبىرا كۇيلەرى قۇرايدى.       

اسەم سازعا تولى كەشتىڭ اشى­لۋىندا «كاۋسار» مادەني-تانىم­دىق بىرلەستىگىنىڭ جەتەكشىسى، ءانشى، اباي اتىنداعى مەملەكەتتىك سىيلىق­تىڭ لاۋرەاتى كەنجەعالي مىرجىق­باي ءسوز الىپ، الدىمەن استانالىق قازاق وركەسترىنىڭ تاريحى مەن ونىڭ نەگىزىن قالاعان قايراتكەرلەردىڭ ونەر جولىنا توقتالىپ، جاستارعا تاعىلىمدى وي سالار اڭگىمە ءوربىتتى.

كونتسەرت قۇرمانعازى، داۋلەت­كەرەي، تاتتىمبەت جانە دايراباي سەكىلدى اتاقتى كۇيشىلەردىڭ بىرە­گەي شىعارمالارىمەن باس­تا­­لىپ، ودان كەيىن نۇرعيسا تىلەن­ديەۆ­تىڭ «ماحامبەتى»، سىدىق مۇحا­مەدجانوۆتىڭ «شاتتىق وتانى»، كەنجەبەك كۇمىسبەكوۆتىڭ «اياۋلى مەكەنى» جانە ءابدىمومىن جەلدى­باەۆتىڭ «ەركە سىلقىمى» سەكىلدى تۋىندىلارى ورىندالىپ، كۇي رۋحىن اسقاقتاتتى. سونداي-اق كۇيشى، قازاقستاننىڭ ەڭبەك سىڭىرگەن قاي­راتكەرى انار مۇزداحانوۆا احمەت بايتۇرسىن ۇلىنىڭ 150 جىلدىعىنا ارناعان «ۇستازعا تاعزىم» اتتى كۇيى مەن قوبىزشى جانار ءجۇسىپوۆا «اققۋ قازدار» اتتى مۋزىكالىق تۋىن­دىسىن تارتۋ ەتتى. ءداستۇرلى ءانشى دانيار مۇقان ەستايدىڭ «مايداقوڭىرى» مەن ماناربەك ەرجانوۆتىڭ «سايرا، بۇلب ۇلىن» شىرقادى.

دومبىرا ءۇنى كۇمبىرلەگەن كەش كورەرمەندەرگە ەرەكشە ۇنا­دى. ما­سەلەن، ەلتاڭبا اۆتورى جان­دار­بەك مالىبەكوۆ العان اسە­رى­مەن بولىسە كەلىپ: «ماعان وسى ۋني­ۆەرسيتەتتىڭ قابىرعاسىندا يسپا­نيانىڭ ونەر شەبەرى، گيتا­ريست حاۆەر ارسە يەبرانىڭ شىعار­ما­شىلىق كەشى مەن قازاققا الىپ ابايدى، شىڭىراۋ شاكارىمدى، ماڭعاز مۇحتاردى بەرگەن سەمەي ءوڭىرىنىڭ شىڭعىستاۋداعى «قالام­قاس» حالىق ءان-بي ءانسامبلىنىڭ كونتسەرتى ەرەكشە ۇناپ ەدى. ەندى سول قاتارعا «قازاعىمنىڭ كۇيلەرى-اي!» اتتى بۇگىنگى كەشتى قوسىپ وتىر­مىن. شىنىمدى ايتسام، حال­قى­مىزدىڭ شىنايى بولمىسىن بەي­نە­لەگەن رۋحى بيىك كۇيلەردى تىڭ­داپ، ۇلى دالاعا ساياحاتتاعانداي اسەر الدىم. وسى مادەني ءىس-شارانى ۇيىم­داس­تىرۋشىلارعا العىسىمدى ايتامىن»، دەدى ول.

كونتسەرت سوڭىندا ءسوز العان ل.ن.گۋميلەۆ اتىنداعى ەۋرازيا ۇلت­تىق ۋنيۆەرسيتەتىنىڭ رەكتورى ەرلان سىدىقوۆ دەمالىستان جا­قىندا ورالعان ستۋدەنتتەرگە بۇل كەشتىڭ سىيلاعان رۋحاني قۇنارى مول بولعانىن ايتتى. «جالپى، كەن­جەعالي مىرجىقبايدىڭ جە­تەك­شىلىگىمەن «كاۋسار» مادە­ني-تانىمدىق بىرلەستىگى ۋنيۆەر­سيتە­تىمىزدە تاربيەلىك ءمانى زور كوپتەگەن كەزدەسۋ وتكىزدى. ماسەلەن، ەلوردا فيلارمونياسىنا ەسىمى بەرىلگەن كورنەكتى كومپوزيتور ەركەعالي راح­ماديەۆپەن ءومىرىنىڭ سوڭعى جىلدارىندا وسى زالدا كەزدەسىپ، ارداق­تى اعامىزدىڭ پاراساتتى اڭگىمەسىن تىڭداپ ەدىك» دەپ، ەلوردالىق في­لار­مونيانىڭ قازاق ۇلت اسپاپتارى وركەسترىنىڭ ديريجەرى نۇرلان بەكەنوۆكە «لەۆ گۋميلەۆ» مەدالىن تابىس ەتتى.