فۋتبول. الەم چەمپيوناتى: فرانتسيا – گوندۋراس 3:0

استانا. 16 ماۋسىم. چەمپيوناتتىڭ ە توبىنداعى فرانتسيا جانە گوندۋراس قۇرامالارى كەەش تۇندە پورتۋ-الەگري قالاسىنداعى ستاديوننىڭ شاڭىن قاقتى. ونىڭ قورىتىندىسىندا فرانتسۋزدار 3:0 ەسەبىمەن جەڭىسكە جەتتى. بۇل تۋرالى egemen.kz حابارلادى. ماتچتىڭ باسى ءبىرشاما جۇيكە جۇقارتاتىنداي بولىپ باستالدى. گوندۋراس فۋتبولشىلارى قاتقىل پرەسسينگكە جۇگىنىپ, تىعىز قورعانىستى ۇستانسا, فرانتسيا قۇراماسى وقتىن-وقتىن شولعىنشىلىق شابۋىلعا دەن قويدى. بىراق گوندۋراستىق تاراپىنان ءجيى ورىن الا باستاعان دورەكىلىك ولاردىڭ قاقپاعا دۇرىس سوققى جاساي الماۋلارى مەن جاعا ۇستاسۋشىلىقتارعا اپارا باستادى. اقىرىندا تاپ ءۇزىلىستىڭ الدىندا ەكىنشى مارتە «سارى قاعاز» العان ۋيلسون پالاسيوس الاڭنان قۋىلىپ, گوندۋراستىقتار ءبىر ويىنشىسىنان ايرىلدى. سونىڭ ارتىنشا فرانتسۋزدار قارسى قاقپاعا پەنالتيدەن گول سالدى. ونى 45-مينۋتتا كاريم بەنزەما ورىندادى. وسى گول ەۋروپالىقتاردى ءبىرشاما سابالارىنا ءتۇسىرىپ, ويلى دا ورنىقتى ويىن كورسەتۋگە جول اشتى. ۇزىلىستەن كەيىن ولاردىڭ قىسىمى ارتا ءتۇستى. سونىڭ ءبىر ساتىندە, 48-مينۋتتا گوندۋراستىق قاقپاشى نوەل ۆاليادارەس ءوز قاقپاسىنا گول ءتۇسىرىپ الدى. بۇل دوپ باعانعا ءتيىپ بارىپ, قاقپاشى قولىنان جەرگە ءتۇستى. سول ساتتە الا باۋىر دوپ قاقپا سىزىعىنىڭ ارعى بەتىنە ءوتىپ كەتتى. ال ونى گولكيپەر سول بويدا دەنەسىمەن جابا قويدى. برازيليالىق تورەشى ساندرو ريچچي ازداعان قوبالجۋدان كەيىن گولدى سانادى. ءسويتىپ, ادىلدىككە جۇگىندى. فرانتسۋزدار سوڭعى گولدى 72-مينۋتتا الىستان قاقپاعا قاراي دوپ اتقاننان كەيىن ءتۇسىردى. ونى بەنزەما ءىلىپ اكەتىپ, ءبىر بۇرىشتان قاقپاعا كولبەي تاستادى. دامير قوجامقۇل. دەرەككوز: چەمپيونات.رۋ. فوتو: Sportbox.ru.