باعداد امىرەەۆ ۆەنگريانىڭ پرەمەر-ءمينيسترى ۆيكتور وربانمەن كەزدەسۋى بارىسىندا ۆەنگريا مەن تۇركى الەمى اراسىنداعى ءتۇرلى سالالارداعى ىنتىماقتاستىق, اسىرەسە ەكونوميكا, ساۋدا جانە قارجى سالالارىنداعى ىنتىماقتاستىق تالقىلاندى.
پرەمەر-مينيستر مەن تۇركى مەملەكەتتەرى ينۆەستيتسيالىق قورى پرەزيدەنتى قور قۇرىلىمدارىن, باسىمدىقتارىن, سونداي-اق ۆەنگريانىڭ وسى قارجى ينستيتۋتىنا قاتىسۋىن تالقىلادى.
ۆيكتور وربان مەن باعداد امىرەەۆ سونداي-اق الەمدەگى قازىرگى ساياسي جانە ەكونوميكالىق وقيعالاردىڭ وزەكتى تاقىرىپتارى بويىنشا پىكىر الماستى.
ۆەنگريا سىرتقى ىستەر ءمينيسترى پەتەر سيارتو مەن تۇركى ينۆەستيتسيالىق قورى پرەزيدەنتى باعداد امىرەەۆ اراسىنداعى كەزدەسۋدە تاراپتار تۇركى ينۆەستيتسيالىق قورىن قۇرۋ بارىسى, سونداي-اق تۇركى الەمىندەگى ەكونوميكالىق كۇن تارتىبىندەگى باسقا دا ماسەلەلەر جونىندە پىكىر الماستى.
پەتەر سيارتو ۆەنگريانىڭ تۇركى ينۆەستيتسيالىق قورىنىڭ قۇرىلىمدارىندا بەلسەندى ءرول اتقارۋعا دايىن ەكەنىن جانە قورمەن ساۋدا, كولىك, ەنەرگەتيكا جانە باسقا دا سالالاردا بىرلەسكەن جوبالاردى جۇزەگە اسىرۋعا بەلسەنە كىرىسەتىنىن ءبىلدىردى.
پرەمەر-ءمينيستردىڭ ورىنباسارى جانە قارجى ءمينيسترى ميحالي ۆارگا جانە باعداد امىرەەۆ تۇركى مەملەكەتتەرى اراسىنداعى ەكونوميكالىق ىنتىماقتاستىقتىڭ كەڭ اۋقىمدى ماسەلەلەرى بويىنشا پىكىر الماستى.
باعداد امىرەەۆ ۆەنگر باسشىلارىمەن كەزدەسۋىندە ۆەنگريانىڭ تۇركى ىنتىماقتاستىعىنداعى اسا ماڭىزدى رولىنە توقتالىپ, ۆەنگريانىڭ تۇركى ۇيىمدارىنا مۇشە بولۋى تۇركى الەمىنىڭ تاريحي گەوگرافياسىن كەڭەيتىپ, ونىڭ حالىقارالىق ارەناداعى ءرولى وسكەنىن ايتتى.
تۇركى ينۆەستيتسيالىق قورى تۇركى مەملەكەتتەرىندە قۇرىلعان العاشقى جانە نەگىزگى بىرلەسكەن قارجى ينستيتۋتى بولاتىنىن جانە تۇركى ەلدەرى اراسىنداعى ىشكى ساۋدا-ەكونوميكالىق ىنتىماقتاستىقتى نىعايتۋعا جانە بىرلەسكەن جوبالاردى جۇزەگە اسىرۋعا جۇمىلدىرۋدى ماقسات ەتەتىنىن مالىمدەدى.
