قازاقستان-قىتاي شەكاراسىندا ەلەكتروندى كەزەك ەنگىزىلدى

بۇگىندە «نۇر جولى» وتكىزۋ بەكەتىندە Qoldau.kz سايتىنداعى قارجى مينيسترلىگىنىڭ «اقپاراتتىق-ەسەپتەۋ ورتالىعى» اق پلاتفورماسىندا ەلەكتروندى كەزەك جۇيەسى ىسكە قوسىلعان. بۇل جۇيەنىڭ وزگە مەملەكەتتىك ورگانداردىڭ اقپاراتتىق جۇيەلەرمەن 15 ينتەگراتسياسى بار، بۇل كەزەك الۋ كەزىندە ورىن الۋى مۇمكىن ءتۇرلى ايلا-شارعىلاردى بولدىرماۋعا مۇمكىندىك بەرەدى.

قازىرگى تاڭدا «Qoldau.kz» جۇيەسىنە بۇعان دەيىن «E-border.kz» ارقىلى الىنعان شامامەن 19 803 كولىك كەزەگىن كوشىرۋ جۇزەگە اسىرىلدى.

«E-border.kz» سەرۆيسىندەگى بروندالعان كەزەكتەر سانىنىڭ ايتارلىقتاي كوپتىگىنە بايلانىستى، سونىمەن بىرگە وتكىزۋ بەكەتىندەگى وتكىزۋ مۇمكىندىگىن ەسكەرە وتىرىپ، مەملەكەتتىك ورگاندار بۇعان دەيىن بەرىلگەن كەزەكتەردىڭ جارامدىلىق مەرزىمىن ارتتىرىپ، ەسەسىنە كەلەسىدەي ۇلەستىرۋ مەحانيزمىن ەنگىزۋ تۋرالى شەشىم شىعاردى.

2023 جىلدىڭ 31 قاڭتارى مەن 1 ناۋرىزى ارالىعىندا – «Qoldau.kz» پلاتفورماسىندا 70 كولىك «E-Border.kz» ارقىلى الىنعان ەسكى كەزەكپەن وتەدى، تەز بۇزىلاتىن تاۋارلار تيەلگەن، ەكسپورتتىق نەمەسە گاباريتتى جۇكتەر جانە ەلەكتروندى كەزەكتىڭ ۋاقىتشا وتكىزۋ سىزباسىنا ساي كەلەتىن وزگە دە كاتەگورياعا جاتاتىن 30 كولىك وتكىزىلمەك.

2023 جىلدىڭ 1 ناۋرىزىنان كەيىن بۇل اراقاتىناس وزگەرتىلىپ، بەكەتتىڭ وتكىزۋ مۇمكىندىگى ارتا تۇسەدى. بۇل ەسكى كەزەكتەگى 70 جانە ودان دا كوپ اۆتوكولىك («E-Border.kz»)، 30 اۆتوكولىك – كەزەكتەن تىس ءتارتىپ بويىنشا وتەدى، تاعى 30 جانە ودان دا كوپ كولىك جاڭا «CarGoRuqsat» كەزەك العان كولىكتەر. بۇنداي اراقاتىناستى جۇيە قحر مەن قر وتكىزۋ بەكەتتەرىنىڭ وتكىزۋ مۇمكىندىگىنە ساي «E-Border.kz» سەرۆيسىندەگى بارلىق كەزەك اياقتالعانشا  تۇزەتىپ وتىرادى.

ۇسىنىلىپ وتىرعان سىزبا بارلىق تاراپتىڭ، ياعني كەزەكتى رەتتەۋدىڭ ءتيىمدى قۇرالدارىن ەنگىزۋ بويىنشا مەملەكەتتىڭ دە، سىرتقى ساۋدا قىزمەتىنىڭ بۇعان دەيىن كەزەك الىپ قويعاندار جانە ەندى كەزەك الۋعا نيەتتەنىپ جۇرگەن قاتىسۋشىلارىنىڭ دا مۇددەسىن كوزدەيدى.

ەرەجەلەرگە ساي، جاڭا  «CarGoRuqsat» سەرۆيسىندە كولىكتەردى تىركەۋ اتالعان كولىك قۇرالى بويىنشا قولدانىستاعى برون بولماعان جاعدايدا، ناقتى ايتقاندا «E-border.kz» تىزىمىندە بولماعان جاعدايدا مۇمكىن بولماق.

«تاسىمالداۋشىلار مەن كولىك قۇرالدارىنىڭ جۇرگىزۋشىلەرىن ءوز باعىتىن الدىن الا جوسپارلاپ، وتكىزۋ بەكەتىنە بەلگىلەنگەن كۇنى «CarGoRuqsat» قوسىمشاسىندا جاريالاناتىن تىزىلىمدەگى كەزەكتىڭ قوزعالىسىن ەسەپكە الا وتىرىپ جوسپارلاۋدى سۇرايمىز. جاريا تىزىلىمدە بەلگىلەنگەن كۇنى كولىك كەلمەگەن جاعدايدا كەزەكتىڭ كۇشى جويىلىپ، جۇرگىزۋشىلەر برونداۋ پروتسەدۋراسىن قايتا جۇزەگە اسىرۋعا ءتيىس بولادى»، دەلىنگەن مەملەكەتتىك كىرىستەر كوميتەتىنىڭ ءباسپاسوز قىزمەتى تاراتقان حابارلامادا.

جاڭا «CarGoRuqsat» سەرۆيسى تاسىمالداۋشىلارعا ءوز ساپارىن جوسپارلاپ، دۇرىس باعىت جاساپ، كولىك كەزەگى اناعۇرلىم از اۆتوموبيل وتكىزۋ بەكەتتەرىن تاڭداۋعا مۇمكىندىك بەرەدى.