جالپى, وبلىستا تۇرعىنداردى تۇماۋعا قارسى ۆاكتسينامەن يممۋنداۋ جۇمىستارى ءوز مارەسىنە جەتتى. جەرگىلىكتى بيۋدجەت ەسەبىنەن 92 913 ادامدى ۆاكتسينالاۋ جوسپارلانىپ, ونىڭ ىشىندە 14 جاسقا دەيىنگى بالالاردىڭ 24,8 پايىزى, ەرەسەكتەردىڭ 75,1 پايىزى قامتىلعان. وسىلايشا, ءوڭىر حالقىنىڭ 13,7 پايىزى يممۋنداۋدان ءوتتى. دەسە دە وڭىردە زەرتحانالىق راستالعان تۇماۋ جۇقپاسىنىڭ 331 جاعدايى, بىلتىرعى ەپيدەميالىق كەزەڭدەگى تۇماۋدىڭ 20 جاعدايى تىركەلىپ وتىر.«تۇماۋعا قارسى اقىسىز يممۋنداۋمەن ۇيىمداسقان جابىق مەكەمەلەردىڭ كونتينگەنتى ءجيى اۋىراتىن يممۋنيتەتى تومەن بالالار مەن سوزىلمالى اۋرۋلارى بار ەرەسەك ادامدار مەديتسينالىق قىزمەتكەرلەر مەن ەكىنشى, ءۇشىنشى تريمەستردەگى جۇكتى ايەلدەر قامتىلدى», دەيدى ا.ساكەن ۇلى.
مامانداردىڭ ايتۋىنشا, تۇماۋعا قارسى ارنايى يممۋنداۋدان باسقا تۇماۋ جانە ءجىتى رەسپيراتورلىق ۆيرۋستىق جۇقپانىڭ جوعارىلاۋ كەزەڭىندە الدىن الۋ شارالارىن دا ەستەن شىعارماعان ابزال. قازىرگى ۋاقىتتا سىرقاتتى جەدەل جانە جوسپارلى تۇردە الدىن الۋ ءۇشىن دارىلىك زاتتاردىڭ تۇرلەرى كەڭىنەن تارالعان. سوندىقتان دارىگەرلەرمەن كەڭەسىپ, اۋىرماۋدىڭ امالىن ىزدەگەن دۇرىس.
تۇماۋدىڭ الدىن الۋدىڭ ەڭ قولايلى, قولجەتىمدى ءتۇرى – تىنىس الۋ جولدارىن قورعاۋ ءۇشىن قولدانىلاتىن ماسكا. وسى كەزەڭدە ءجىتى رەسپيراتورلىق ۆيرۋستىق جۇقپانىڭ جانە تۇماۋدىڭ الدىن الۋ ءۇشىن مۇمكىندىگىنشە حالىق تىعىز ورنالاسقان جەرلەرگە بارماۋ قاجەت. اسىرەسە بالالار ءۇشىن جۇقپا كوزى مۇمكىن بولاتىن قارىم-قاتىناستى شەكتەگەن ابزال.
جالپى, وڭىردەگى كۆي بويىنشا ەپيدەميالىق احۋال تۇراقتى. 2022 جىلدىڭ 8 ماۋسىمىنان بەرى 2 731 جاعداي تىركەلگەن. ەپيدەميالىق جاعدايدى باعالاۋ ماتريتساسىندا وبلىس – «جاسىل ايماقتا».
«تۇماۋدىڭ الدىن الۋدا جەكە باس گيگيەناسىن ساقتاۋدىڭ دا پايداسى مول. قولدى سابىنمەن ءجيى جۋ قاجەت. تۇشكىرگەن جانە جوتەلگەن كەزدە اۋىزدى نەمەسە مۇرىندى بەت ورامالمەن جابۋ كەرەك. بارلىق مۇمكىندىكتى ءمۇلت جىبەرمەي ۋاقىتىندا ەمحاناعا قارالىپ, جۇقپالى اۋرۋلاردىڭ الدىن العانىڭىز ءجون. ەمدەلگەننەن گورى الدىن الۋ اناعۇرلىم جەڭىلىرەك ەكەنىن ەستەن شىعارماڭىز!», دەپ ەسكەرتتى ا.ساكەن ۇلى.
جەتىسۋ وبلىسى
