بۇگىن جالعاسىن تاپقان فورۋمنىڭ 5-ءشى پانەلدىك سەسسياسىندا «قازاق گازەتتەرى» جشس باس ديرەكتورىنىڭ ورىنباسارى اسكەر پيريەۆ, «Qazcontent» او باسقارۋشى ديرەكتورى ۇلان ابىشەۆ, «زاڭ» مەديا-كورپوراتسياسى» جشس باس ديرەكتورى دوسىمبەك وتەعاليەۆ سونداي-اق مەديا جانە ساياسي ستراتەگيالىق كوممۋنيكاتسيا مامانى جايناگۇل تولەمىس ەلىمىزدىڭ باسقا وڭىرلەرىنەن جينالعان باق وكىلدەرىنە ترەنينگ وتكىزىپ, تاجىريبەلەرىمەن ءبولىستى.
العاش بولىپ ءسوز العان اسكەر پيريەۆ جاقىندا عانا قايتا قۇرىلعان «قازاق گازەتتەرى» جشس قۇرامىنا «ەگەمەن قازاقستان» جانە «كازاحستانسكايا پراۆدا» گازەتتەرى قوسىلعانىن ەسكە سالا كەتتى.
- «قازاق گازەتتەرى» قۇرامىندا 5 گازەت پەن 5 جۋرنال بار. بۇگىندە ولارعا «ەگەمەن قازاقستان» مەن «كازاحستانسكايا پراۆدا» گازەتتەرى دە قوسىلدى. 12 باسىلىمدى ءبىر شاڭىراق استىنا جيناپ وتىرعان سەرىكتەستىكتى ۇلكەن مەدياحولدينگ دەپ اتاساق تا ارتىق بولماس. سەبەبى ءار گازەت-جۋرنالدىڭ ءوز الدىنا قويعان ماقسات-مىندەتتەرى, ميسسياسى بار. بيىل اقپارات جانە قوعامدىق دامۋ مينيسترلىگىنىڭ ۇيىمداستىرۋىمەن ءوتىپ جاتقان وڭىرلىك باق فورۋمىنا «قازاق گازەتتەرى» باس ديرەكتورىنىڭ ورىنباسارى رەتىندە العاش قاتىسىپ وتىرعانىم دا مەن ءۇشىن ۇلكەن مارتەبە», - دەپ اتاپ ءوتتى اسكەر پيريەۆ.
ول سونداي-اق زاماناۋي مەديا كەڭىستىگىندەگى مەنەدجمەنت سالاسىندا كەزدەسەتىن ماسەلەلەرگە توقتالا كەتتى.
«مەديا-مەنەدجمەنت سالاسىندا بۇرىن بولعان ماسەلەلەر بۇگىن دە, ەرتەڭ دە وزەكتى بولىپ قالا بەرمەك. ءبىز قالاساق تا, قالاماساق تا كۇندەلىكتى ومىرىمىزدە پايدا بولىپ جاتقان جاڭاشىلدىقتار الەمدىك تەندەنتسياعا اينالىپ جاتىر, ماسس-مەديا وكىلدەرى بۇل جاڭاشىلدىقتاردان قۇر قالماي, ولارعا ءاردايىم ىلەسىپ وتىرۋى قاجەت. ومىرىمىزدە عالامتور مەن ۇيالى تەلەفون پايدا بولعاننان كەيىن اقپارات اعىنى دا جىلدامدادى. بۇرىن جۋرناليست ءبىر وقيعا ورىن الاتىنىن ءبىلىپ, سول وقيعا ورنىنا بارىپ, اقپاراتىن جازىپ, سۋرەتىن ءتۇسىرىپ. رەداكتسياعا دايىنداپ بەرەتىن. كەي جەرلەردە جۇمىستىڭ مۇنداي سحەماسى قازىر دە ساقتالسا دا, بۇگىنگى 21-ءشى عاسىردا بۇل ءتيىمسىز ەكەنىن مويىنداۋ قاجەت. سەبەبى قازىر اقپارات ادامنان دا جىلدام. سول ءۇشىن جۋرناليستەردىڭ, جالپى مەرزىمدى ءباسپاسوزدىڭ جۇمىسىن ۇيلەستىرىپ وتىراتىن ماماندار - مەديا-مەنەدجەرلەر. تاعى ءبىر ماسەلە - قوعامدا گازەت وقۋ مادەنيەتىن قالىپتاستىرۋ. وقىعان ادام مەن وقىماعان ادام ەشقاشان بىردەي بولمايدى. وقىعان ادام قوعامدى باسقارادى, ال وقىماعان ادام تۇتىنۋشى بولىپ قالا بەرەدى. كەلەشەكتە باسەكەگە قابىلەتتى مامانداردى دايىنداعىمىز كەلسە, بىرىنشىدەن گازەت وقۋ مادەنيەتىن جاڭعىرتۋىمىز قاجەت», دەپ اتاپ ءوتتى سپيكەر.
سونىمەن قاتار, فورۋم اياسىندا «Qazcontent» او باسقارۋشى ديرەكتورى ۇلان ابىشەۆ باسپا باسىلىمدارىنىڭ كونتەنتىن الەۋمەتتىك جەلىلەردە ناسيحاتتاۋ, تاراتۋ ادىستەرى مەن تاسىلدەرى جايىندا ايتتى. ونىڭ ايتۋىنشا, قازىرگى ۋاقىتتا حالىقتىڭ باسىم بولىگى الەۋمەتتىك جەلىنىڭ بەلسەندى قولدانۋشىلارىنا اينالدى, سول سەبەپتى الەۋجەلى - اقپاراتتى كوپشىلىككە تاراتۋدىڭ ءتيىمدى قۇرالى.
