«جاستار رۋحىنىڭ» توراعاسى نۇرجان جەتپىسباەۆ ءبىر اپتاعا جەتەر-جەتپەس ۋاقىتتا 3 مىڭنان استام ءوتىنىم كەلىپ تۇسكەنىن اتاپ ءوتتى.
«ساباق اپتاسىنا ءبىر رەت وتكىزىلەدى. ال ءبىز بۇل كلۋبتاردىڭ جۇمىسىن ۇيلەستىرەمىز. قازاق ءتىلىن مەڭگەرگىسى كەلەتىن ادامداردىڭ بارىنە بىردەي مۇمكىندىك بەرۋ قاجەت. پارتيانىڭ ساياسي تۇعىرناماسىندا جازىلعانداي, ءتىلىمىزدىڭ مارتەبەلى جانە قاجەتتى قاتىناس قۇرالىنا اينالۋىنا تىكەلەي مۇددەلىمىز. ءتىل ۇيرەنۋ – ءتيىمدى ءارى قول جەتىمدى بولۋى كەرەك. مەملەكەتتىك ءتىل قازاق قوعامىن بىرىكتىرەتىن كۇشكە اينالۋعا ءتيىس», دەدى ول.
ۇيىمداستىرۋشىلاردىڭ ايتۋىنشا, ءتىل ۇيرەنۋشىلەرگە جاي عانا ىنتا تانىتقان مۇعالىمدەر ەمەس, جاڭاشىل ادىستەردى مەڭگەرگەن ماماندار ساباق بەرەدى.
ء«تىلدى ءتيىمدى ءادىس بويىنشا ۇيرەتەمىز. ءبىز تەك ساباق وتكىزىپ قانا قويماي, تەاتر, قازاق فيلمدەرىنىڭ كورسەتىلىمى سىندى مادەني ورىنداردا ۇلتتىق مادەنيەتپەن تانىستىرۋدى كوزدەيتىن ءتۇرلى ءىس-شارا ۇيىمداستىرامىز. قاتىسۋشىلارىمىز ءتىل ۇيرەنىپ قانا قويماي, قوعامداستىعىمىزدىڭ ءبىر مۇشەسى بولعانىن قالايمىز. قاتارىمىزعا بارىنشا كوپ ادام قوسىلىپ, قازاق ءتىلىن ۇيرەنۋشىلەردىڭ سانى ارتسا ەكەن دەيمىز», دەدى ياكوۆ فەدوروۆ ەسىمدى بەلگىلى بلوگەر.
كلۋب وتىرىسى «جاستار رۋحىنىڭ» استانا, الماتى قالالارىندا جانە اباي, اقمولا, اقتوبە, الماتى, شىعىس قازاقستان, باتىس قازاقستان, قاراعاندى, قوستاناي, پاۆلودار, سولتۇستىك قازاقستان وبلىستارىنداعى فيليالدارىندا وتەدى.
