19 قاڭتاردا پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى قىزمەتكەرلەرى جامبىل وبلىسى بويىنشا ەكونوميكالىق تەرگەۋ دەپارتامەنتىمەن بىرلەسىپ, مەركى اۋدانى قوستوعان اۋىلىنىڭ شەكارا ماڭىندا ورنالاسقان شارۋا قوجالىعىنان زاڭسىز ساقتالعان ەتيل ءسپيرتىن انىقتادى.
قۇقىق قورعاۋ ورگاندارىنىڭ قىزمەتكەرلەرى قويما رەتىندە جابدىقتالعان سارايدا كولەمى 1 توننا بولاتىن 8 بوشكەدەگى 8 مىڭ ليتر ەتيل ءسپيرتىن تاۋىپ, تاركىلەدى. اتالعان دەرەككە قاتىستى قر قك-ءنىڭ 214-بابى 1-بولىگى بويىنشا سوتقا دەيىنگى تەرگەپ-تەكسەرۋ امالدارى باستالدى.
ساراپتاما قورىتىندىسىنا سايكەس, كونتەينەرلەردەن الىنعان ۇلگىلەر تاماق شيكىزاتىنان تازارتىلعان ەتيل ءسپيرتى ەكەندىگى انىقتالدى. قۇرامىندا ءسپيرتى بار 8 مىڭ ليتر ءونىمنىڭ نارىقتاعى قۇنى ورتاشا ەسەپپەن 19,2 ملن تەڭگەنى قۇرايدى.
اتالعان فاكتى بويىنشا پوليتسيا قىزمەتكەرلەرى شارۋا قوجالىعىنىڭ 51 جاستاعى يەسىن انىقتادى. قازىر ءىستىڭ تولىق ءمان-جايىن انىقتاۋ بويىنشا ءتيىستى جەدەل-تەرگەۋ شارالارى جۇرگىزىلىپ جاتىر.
