جاس كەڭەستىڭ كوشپەلى وتىرىسى

«ارىستانداي ايباتتى, جول­بارىستاي قايراتتى, قى­ران­داي كۇشتى قاناتى, مەن جاستارعا سەنەمىن!». ماعجان ايتقان وسىناۋ جىردىڭ تۇبىندە ءاربىر بۋىن­نىڭ ۇكىلى ارمانى جاتىر. زامان وزگەرەر. وزگەشە وڭگە ەنەر. ادامدار ءتۇرلى تەحنيكانى مەڭگە­رەر. بىراق جاستارعا دەگەن سەنىمى اقىن سوزىندەي بولىپ قالا بەرمەك. ويتكەنى, جاستار دەگەنىمىز – بو­لاشاق. پرەزيدەنت جانىندا جاستار ساياساتى جونىندەگى كەڭەس جۇمىس ىستەيدى. بۇل – ەلباسى جاستار سايا­ساتىن ءجىتى باقىلاپ, ولاردىڭ ماسەلەسىن ۇنەمى نازاردا ۇستاپ وتىر دەگەن ءسوز. مىنە, وسى جاس كەڭەستىڭ كوشپەلى وتىرىسى قىزىلوردادا ءوتتى. كەڭەس توراعاسى, پرەزيدەنت اكىمشىلىگى باسشىسىنىڭ ورىنباسارى عابيدوللا ءابدىراحىموۆ باستاعان جاستار سىر وڭىرىنە ارنايى كەلىپ, ايماقتاعى جاستار ءما­سە­لە­سىمەن تانىستى, ءماجىلىس قۇردى. جاقسىنىڭ جاقسىلىعىن ايتۋ پارىز. قىرىمبەك كوشەرباەۆ قى­زىلوردا وبلىسىنا اكىم بولىپ تاعايىندالعاننان باستاپ جاس­تارعا ەرەكشە كوڭىل ءبولدى. اسىرەسە, ولاردىڭ ءبىلىم الۋىنا بار جاعدايدى جاساپ جاتىر. اي­تالىق, بىلتىر اكىم الەۋمەتتىك جاعدايى تومەن وتباسىلاردان شىققان بالالارعا, ماڭدايى جارقىراپ تۇرسا دا ءبىلىم الۋعا شاماسى كەلمەيتىن جاستارعا ارنايى گرانت ءبولدى. سونىڭ ارقاسىندا جۇزدەن استام بالا وقۋعا ءتۇسىپ, ءبىلىم جيىپ جاتىر. بيىل بۇل گرانتتىڭ سانى 300-گە جەتىپ وتىر. بۇدان بولەك, وسى جىلى مەكتەپ بىتىرگەن 153 تۇلەك ماسكەۋ ۇلتتىق تەحنولوگيالار ۋنيۆەرسيتەتىندە وقىماق. تۇلەكتەردىڭ بارلىعى وسى ۋنيۆەرسيتەتتىڭ ەسەبىنەن ءبىلىم الادى. ايماقتا مەتاللۋرگيالىق كلاستەردى دامىتۋ قولعا الىندى. مىنا 153 بالا وسى سالانىڭ ماماندارى بولىپ شىقپاق. بۇل وزگەنىڭ ەسەبىنەن وزىمىزگە مامان دايارلاۋدىڭ ەڭ ءبىر ادەمى كورىنىسى دەپ بىلەمىز. جاس كەڭەستىڭ جۇمىسى شەڭ­بەرىندە عابيدوللا ءابدىراحىموۆ پەن قىرىمبەك كوشەرباەۆ وسى 153 تۇلەكپەن جولىعىپ, سۇحبات قۇر­دى. ايماق باسشىسى وبلىستىڭ الەۋ­مەتتىك-ەكونوميكالىق جاع­دايى تۋراسىندا, ەلدە اتقارىلىپ جاتقان شارۋالار جايىندا باياندادى. ماسكەۋدە ءبىلىم الۋعا بارا جاتقان جاستارعا اق جول تىلەپ, باتاسىن بەردى. ال عابيدوللا راحمەتوللا ۇلى ءوزىنىڭ «بولاشاق» باعدارلاماسى بويىنشا ءبىلىم العانىن, الىس ساپارعا شىققالى وتىرعان جاستاردىڭ قانداي كوڭىل كۇيدە ەكەنىن جاقسى تۇسىنەتىنىن ايتتى. شەتەلدىكتەر وسى جاستار ارقىلى ءبىزدىڭ مەملەكەتىمىزدى تانيتىنىن جەتكىزدى. جان-جاقتى ءبىلىم الىپ, ەلگە مىقتى مامان بولىپ ورالۋلارىنا تىلەكتەستىك ءبىلدىردى. وقۋعا كەتىپ بارا جاتقان ءبىر تۇلەك قىرىمبەك ەلەۋ ۇلىنا ادەمى سۇراق قويدى. ول: «ءبىز مەتاللۋرگيا سالاسى بويىنشا ءبىلىم الۋعا بارا جاتىرمىز. بۇيىرتسا, بەس جىلدان سوڭ ەلگە ورالامىز. سول كەزدە جۇمىسپەن قامتۋ جايى قالاي بولماق؟» دەپ سۇرادى. وبلىس اكىمى ۇكىمەت قىزىلوردا وب­لى­­سىندا مەتاللۋرگيالىق كلاس­­تەر­دى دامىتۋدىڭ جوباسىن ماقۇل­داعانىن ءمالىم ەتتى. – سول جوبا بويىنشا قىراۋار شارۋا اتقارىلماق. كوپتەگەن زاۋىتتار سالىنادى. سەندەر ءبىلىم الىپ كەلگەنشە, ءبىز دە جۇمىستارىڭدى دايىنداپ قويامىز,– دەپ جاۋاپ بەردى. 2005 جىلدان بەرى قاراي ەلىمىزدە «جاسىل ەل» باعدارلاماسى جۇمىس ىستەپ كەلەدى. بۇل – وقۋشىلار مەن ستۋدەنتتەردى, ەكى قولعا ءبىر كۇرەك تاپپاي جۇرگەن جاستاردى جۇمىسپەن قامتيتىن جوبا. «جاسىل ەلدىڭ» جاساقتارى ەلىمىزدى كوگالداندىرۋ ماقساتىندا قىرۋار جۇمىس اتقارىپ جاتىر. جاستار ساياساتى جونىندەگى كەڭەستىڭ قىزىلوردا وبلىسىنداعى كوشپەلى وتىرىسى وسى باعدارلاماعا ارنالدى. ماجىلىستە ءسوز العان ءبىلىم جانە عىلىم ۆيتسە-ءمينيسترى تاحير بالىقباەۆ «جاسىل ەل» بويىنشا اتقارىلعان جۇمىستارعا جان-جاقتى توقتالدى. باعدارلاما ىسكە اسقاننان بەرى 200 مىڭنان استام جاس جۇمىسپەن قامتىلعان. ولار 44 ميلليون اعاش ەگىپ, 114 مىڭ گەكتار جەردى كوگالداندىرىپتى. وسىنىڭ وزىنەن-اق باعدارلامانىڭ ەلگە پايدالى ەكەنىن كورۋگە بولادى. بولاشاقتا باعدارلاما بويىنشا بولىنەتىن قارجىنى ارتتىرىپ, جاستاردىڭ جالاقسىن كوتەرۋدى كوزدەپ وتىرعاندارىن بايان ەتتى. اقتوبە, الماتى, قىزىلوردا وبلىستارىندا باعدارلامانىڭ ناتيجەلى جۇمىس ىستەپ جاتقانىن ايتتى. ال پاۆلودار, وڭتۇستىك قازاقستان, اتىراۋ وبلىستارىندا «جاسىل ەلدىڭ» جۇمىسىن جانداندىرۋ كەرەكتىگىن باسا كورسەتتى. جيىن بارىسىندا ءسوز العان قىزىلوردا وبلىسى اكىمىنىڭ ورىنباسارى اقمارال ءالنازاروۆا ايماقتاعى جاستار ماسەلەسى جايىندا تۇشىمدى بايانداما جاسادى. سوڭعى جىلدارى وبلىستاعى جاس­تار ۇيىمدارىن قارجىلاندىرۋ 3 ەسەگە وسكەن. وسىنىڭ ارقاسىندا جاستار ساياساتىمەن اينالىساتىن ۇيىمدار كوبەيگەن. جاستاردى قولداۋ ورتالىعى اشىلىپ, سپورت كەشەندەرى سالىنىپ, جاڭا جاتاقحانالار پايدالانۋعا بەرىلگەن. ال «جاسىل ەل» جاساق­تارىنىڭ سانى ەكى ەسەگە ارتقان. قىسقاسى, ايماقتا جاستارعا ايتارلىقتاي كوڭىل ءبولىنىپ جاتىر ەكەن. جاستار ساياساتى جونىندەگى كەڭەستە «جاسىل ەل» باعدارلاماسى بارىسىنداعى ءبىرشاما پروب­لەمالار ايتىلدى. اسىرەسە, قارجىلاندىرۋ ماسەلەسىنىڭ قولبايلاۋ بولىپ تۇرعانىن بىلدىك. عابيدوللا ءابدىراحىموۆ بۇل ماسەلەنىڭ شەشىلەتىنىن, ۇكىمەتكە ارنايى ۇسىنىس جاسايتىندارىن جەتكىزدى. ەرجان بايتىلەس, «ەگەمەن قازاقستان». قىزىلوردا.