«Creative تابىس تاريحى» جوباسى – ەلىمىزدەگى كرەاتيۆتى يندۋستريا كونتسەپتسياسىن دامىتۋدىڭ جاڭا فورماتى. ويتكەنى ۇيىمداستىرۋشىلار وسىلايشا جاستاردى شابىتتاندىرىپ, ولاردىڭ تىڭ جوبالارىن نارىققا ەنگىزۋدى كوزدەپ وتىر.
العاشقى كەزدەسۋگە جينالعان كوپشىلىك حالىقارالىق «Red Bull BC One World» 2019 جارىسىنىڭ ءفيناليسى, تمد جانە شەتەلدەگى كوپتەگەن جارىستىڭ جەڭىمپازى نيكولاي چەرنيكوۆپەن اڭگىمەلەستى. سۇحباتتان بولەك, جوباعا جينالعاندار برەيك-دانس شەبەرىنىڭ 20 جىلدىق شىعارماشىلىق جولى باياندالعان «The documentary of Killa Kolya» دەرەكتى ءفيلمىن تاماشالادى.
– ماعان نەگىزى سوزدەن گورى, كەز كەلگەن دۇنيەنى ءىس جۇزىندە دالەلدەۋ وڭاي. وسىدان ءتورت جىل بۇرىن ءۇندىستاندا وتكەن حالىقارالىق «Red Bull BC One World» بايقاۋىندا فينالدا نيدەرلاندىق برەيك-دانس شەبەرىنە ەسەمدى جىبەرىپ الدىم. الەۋمەتتىك جەلىدەگى كورەرمەندەرىم بۇعان ءوز پىكىرلەرىن ايتىپ, ويىن ءبىلدىردى. اقپاراتتىق پورتالدار دا جارىسا جازدى. تەلەارنالار دا بىرنەشە رەت سۇحباتقا شاقىردى. بايقاۋدان كەلگەن سوڭ دوستارىممەن كەزدەسىپ, اقىلداستىق. بۇل جاعدايدا ءۇنسىز قالۋعا بولمايتىنىن ءتۇسىندىم. جولداستارىمنىڭ ءبىرى كونكۋرس تۋرالى, شىعارماشىلىعىم جونىندە شاعىن بەينەماتەريال ءتۇسىرۋدى ۇسىندى. كەلىستىم. بۇرىننان بىرگە جۇمىس ىستەيتىن قاراعاندىلىق جەرلەستەرىمنەن كومەك سۇرادىم. ىسكە بىردەن كىرىسىپ كەتتىك. بارلىعىن ءوز قاراجاتىمىزعا جاسادىق, سەبەبى ەشكىمنەن قارجىلاي قولداۋ بولمادى. وسى تۇسى قيىنعا ءتۇستى. ارتىنشا ەلدەگى كارانتين سالدارىنان قولىمىز تاعى ءجىپسىز بايلاندى. ۇيدەن شىعا الماي قالدىق. الايدا ۋاقىتىمىزدى بوس وتكىزبەي, ۆيدەونى ودان ءارى ساپالى ەتىپ تۇسىرۋگە نيەتتەندىك. وسىلايشا جاڭادان ستسەناري جازىلىپ, كوپشىلىككە ۇسىندىق, – دەدى ن.چەرنيكوۆ.
كارتينا رەجيسسەرى ارسەني مەن اندرەي تاركوۆسكي اتىنداعى سىيلىقتىڭ يەگەرى, ءبيشىنىڭ دوسى – داۋلەت توقاەۆ. ول وسى ۋاقىتقا دەيىن تانىمال رەپ-ورىنداۋشى سكريپتونيت, گۋف پەن حيپ-حوپ ۇزدىگى حاسكي جانە كومپوزيتور ماكس كورج سىندى رەسەيلىك ارتىستەرمەن جۇمىس ىستەگەن. ال كينوتۋىندىنىڭ مونتاجىن ءادىلحان دۇيسەمباەۆ جاساپتى.
ءادىلحان دۇيسەمباەۆ – 10 جىلدان استام بەينەتۇسىرىلىم, فوتوسۋرەت جانە مونتاج جۇمىستارىمەن اينالىسادى. ول ءوزىنىڭ تالانتى مەن ەڭبەكقورلىعىنىڭ ارقاسىندا الەمگە ايگىلى ءانشى Rihanna جانە Levi’s, Snipes, Schoolboy Q برەندىنىڭ بەينەكادرلارىن مونتاجداعان.
– دەرەكتى ءفيلمنىڭ نەگىزگى ماقساتى – قازاقستانداعى حيپ-حوپ مادەنيەتىن ناسيحاتتاۋ ءارى جاستاردى ونەرگە باۋلىپ, جىگەرلەندىرۋ. بايقاعانىمداي, ءوز ويىڭدى, ۇسىنىستارىڭ مەن دارىنىڭدى كورسەتۋگە بارلىق مۇمكىندىك جاسالعان. ەش شەكتەۋ جوق. جاستار ۇنەمى ماعان حابارالاسىپ, كەڭەس سۇراپ, ۇسىنىستارىن ءبىلدىرىپ جاتادى. مەن ولارعا ءاردايىم قازاقستانمەن شەكتەلىپ قالماي, قازىرگى اقپاراتتىق قوعام ۇسىنىپ وتىرعان مۇمكىندىكتەردى قالت جىبەرمەي, الەمدىك ارتىستەرگە, رەجيسسەرلەرگە كرەاتيۆتى ويلارىن ۇسىنا بەرۋگە جول سىلتەيمىن. وسىدان ەكى-ءۇش جىل بۇرىن مەن وسىلاي ىستەدىم. ارينە, ولار ماعان جاۋاپ قاتپادى. بىراق ريانامەن بولعان شۋدان كەيىن 3 جىل وتكەن سوڭ, سول پروديۋسەرلەر, رەجيسەرلەر حابارلاستى. قازىر ولار مەنىڭ پاراقشاما جازىلىپ, بىرلەسكەن جوبا جاساۋدى ۇسىنۋدا, – دەدى ءا.دۇيسەمباەۆ.
ايتا كەتەيىك, جوبا اياسىندا مۇنداي باسقوسۋلار ەندى ايىنا ءبىر رەت تۇراقتى وتكىزىلمەكشى. شىعارماشىلىق تۋريزم باسقارماسىنىڭ باسشىسى يرينا حاريتونوۆانىڭ پايىمداۋىنشا, كەز كەلگەن سالانىڭ جارقىن ءارى بەلسەندى وكىلدەرى جاستارعا ۇلگى بولۋى كەرەك. سوندىقتان كەزدەسۋدە تالانتتى جىگىتتەرگە رەسمي تۇردە كرەاتيۆتى يندۋستريا امباسسادورلارى اتاعى بەرىلدى.
– نەگىزى قازاقستاندا ونەرلى جاستار بارشىلىق. كوپ جاعدايدا ولاردى شەتەلدىكتەر مويىنداعان سوڭ عانا ءبىلىپ جاتامىز. ءبىز وسى نارسەنى وزگەرتۋ ءۇشىن جۇمىس ىستەپ جاتىرمىز. شىعارماشىل تۇلعالاردى ءوزىمىزدىڭ ورتامىزدا ايتىپ, حالىق اراسىندا ناسيحاتتاپ, وزگەلەردى شابىتتاندىرعىمىز كەلەدى. الداعى ۋاقىتتا جىگىتتەردى قولداپ, ىشكى جانە حالىقارالىق نارىقتا ىلگەرىلەتۋ ءۇشىن بار كۇشىمىزدى سالامىز. ولار ءوز ونەرى ارقىلى قازاقستاننىڭ كرەاتيۆتى كەڭىستىگىنىڭ بىرەگەي, شەكسىز ەكەنىن حالىقارالىق ارەنادا تانىستىرادى. وسىلايشا, كرەاتيۆتى يندۋستريا ارقىلى ۇلتتىق كودىمىز, ۇلتتىق بىرەگەيلىگىمىزدى كورسەتەمىز, – دەدى ي.حاريتونوۆا.
قازىر دۇنيە ءجۇزى بويىنشا مادەني, شىعارماشىلىق «وندىرىستەن» تۇسەتىن تابىس جىلىنا 2,3 ترلن دوللاردى قۇرايدى. يۋنەسكو بولجامى بويىنشا كرەاتيۆتى يندۋستريا سەكتورى ورتا مەرزىمدى پەرسپەكتيۆادا الەمدىك ىشكى جالپى ءونىمنىڭ 10 پايىزىنا دەيىن ءوسۋى مۇمكىن. ياعني جاھاننىڭ الدىڭعى قاتارلى ەلدەرى شىعارماشىلىق پەن تىڭ يدەيانى تابىس كوزىنە اينالدىرۋعا شىنداپ كىرىسكەن. كەيبىرىنىڭ وزىق تاجىريبەسى بىزگە ۇلگى.
ماسەلەن وڭتۇستىك كورەياداعى كرەاتيۆتى يندۋستريانىڭ دامۋى تاڭداي قاقتىرادى. مۇندا وسىدان 14 جىل بۇرىن ارنايى كرەاتيۆتى كونتەنت اگەنتتىگى قۇرىلىپتى. تەك 2012-2016 جىلدار ارالىعىندا كورەي مادەنيەتىنىڭ ەكسپورتى 4,6 ميلليارد دوللاردان 6,3 ميلليارد دوللارعا دەيىن وسكەن. سانداردىڭ بۇلاي شارىقتاۋىنا الەمدى تامساندىراتىن كورەي تەلەحيكايالارى سەپ. بۇعان تانىمال انشىلەرى دە ءوز ۇلەسىن قوسقان.
الىستى ساراپتاماي-اق, كينودان اجەپتاۋىر تابىس تاۋىپ وتىرعان تۇرىك اعايىنداردى دا مىسالعا كەلتىرسەك بولادى. تۇركيانىڭ مادەنيەت مينيسترلىگى تاڭدى-تاڭعا ۇرىپ, جالعاسا بەرەتىن سەريالداردان ەل بيۋدجەتىنە جىل سايىن 350 ميلليون دوللار كولەمىندە تابىس تۇسەتىنىن مالىمدەگەن ەدى. بۇگىندە تانىمال كينوتۋىندىنىڭ تۇسىرىلگەن جەرىن كورۋگە قۇشتار جان كوپ. مۇنداي تاجىريبە الەم ەلدەرىنە تاڭسىق ەمەس. ايگىلى «ساقينالار ءامىرشىسى» «ۆلاستەلين كولەتس» ءفيلمى تۇسىرىلگەن سوڭ جاڭا زەلاندياعا قاراي اعىلعان تۋريستەر سانى 40 پايىزعا ارتقان-دى.
باسقانى بىلاي قويعاندا, پرەزيدەنت پارمەنىمەن ەلىمىزدە يندۋستريانىڭ ءدال وسى ءتۇرىنىڭ مۇمكىندىگىن مولىنان پايدالانۋعا باسا نازار اۋدارىلدى. جوبانى ۇيىمداستىرۋشىلاردىڭ كرەاتيۆتى كەڭىستىكتى دامىتۋدى قولعا الۋداعى تۇپكى ماقساتى دا شىعارماشىلىق پەن تىڭ يدەيانى تابىس كوزىنە اينالدىرۋ.
