بۇگىندە ۆەدومستۆو «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى نەگىزىندە زاڭعا تاۋەلدى اكتىلەر ازىرلەپ جاتىر. قۇجات اياسىندا جاستار رەسۋرستىق ورتالىقتارى قىزمەتكەرلەرىنىڭ مارتەبەسىن ۇلعايتۋ مۇمكىندىگى پايدا بولادى. سونىمەن قاتار ەڭبەك جاساقتارىن قۇرۋ, ۇيىمداستىرۋ, قامتاماسىز ەتۋ جانە ولاردىڭ قىزمەتىنە مونيتورينگ جۇرگىزۋ كوزدەلگەن.
– 2021 جىلى 15 قاڭتاردا پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى جاستارعا بايلانىستى ۇسىنىستاردى ناقتىلادى. زاڭ جوباسىن جان-جاقتى تالقىلاۋ ماقساتىندا كوپتەگەن باسقوسۋ ۇيىمداستىرىلدى. وعان حالىقارالىق ماماندار مەن ساراپشىلار جۇمىلدىرىلدى. جالپى, قۇجات مەملەكەتتىك جاستار ساياساتى سالاسىن جەتىلدىرۋگە, قوعامدىق قاتىناستاردى كەشەندى رەتتەۋدىڭ ءتيىمدى قۇقىقتىق نەگىزىن قالىپتاستىرۋعا, جۇمىسپەن قامتۋدى قامتاماسىز ەتۋگە, جاستاردىڭ دامۋى ءۇشىن قولايلى جاعداي جاساۋعا باعىتتالعان. زاڭدا جاستاردىڭ دامۋ يندەكسى; جاستاردىڭ الەۋمەتتىك قىزمەتتەرى; جاستارمەن جۇمىس جونىندەگى مامان; جاستاردىڭ ەڭبەك جاساقتارى ۇعىمدارىن زاڭنامالىق بەكىتۋ ۇسىنىلدى, – دەدى دانيار قادىروۆ.
زاڭنىڭ ءبىر تارماعى رەتىندە تانىستىرىلعان جاستار يندەكسىن قاراپايىم تىلمەن تۇسىندىرسەك, بۇل 14 پەن 35 جاس ارالىعىنداعى ازاماتتاردىڭ قانشالىقتى سپورتپەن اينالىساتىنى, كاسىبي بىلىكتىلىگىن شىڭداۋ ءۇشىن ترەنينگتەرگە قانشالىقتى قاتىساتىنى, قوعامدىق بەلسەندىلىگى بويىنشا ناقتى مالىمەتتەرگە قول جەتكىزۋ تاسىلدەرىن بىرىزدەندىرۋدىڭ تاپتىرماس قۇرالى. ءبىر جاعىنان جيىنتىق – مەملەكەتتىك جاستار ساياساتىن ىسكە اسىرۋ بويىنشا مەملەكەتتىك ورگاندار قىزمەتىنىڭ تيىمدىلىگىن ارتتىرۋعا جول اشادى. دەمەك وسى ساناتتاعى قازاقستاندىقتارعا قاي وڭىردە قانداي قولداۋ كورسەتۋ كەرەك ەكەنىن انىقتايدى.
– ءبىزدىڭ ازىرلەپ جاتقانىمىز – بۇۇ-نىڭ جاستاردى دامىتۋدىڭ جاھاندىق يندەكسىنىڭ وتاندىق نۇسقاسى. يندەكستى ەنگىزۋ ەلىمىزدىڭ حالىقارالىق ۇستانىمىنا وڭ اسەر ەتەدى, – دەدى د.قادىروۆ.
بۇعان قوسا قۇجات شەڭبەرىندە جاستار ساياساتىنىڭ نەگىزگى باعىتتارىنا قوسىمشا ەكى تەتىك ەنگىزىلگەن. ولار – تسيفرلىق ساۋاتتى ارتتىرۋ جانە ۆولونتەرلىك قوزعالىستى دامىتۋ.
جيىندا ۆيتسە-مينيستر سالانىڭ الەۋمەتتىك جەلىلەردەگى اقپاراتتاردى قاداعالاۋ ماقساتىندا قانداي جۇمىستار جۇرگىزىلەتىنىن اتاپ ءوتتى. ەگەر الەۋمەتتىك جەلىدە مەملەكەتتىڭ تۇتاستىعىنا, كونستيتۋتسياعا قايشى, ۇلتارالىق جانە دىنارالىق ارازدىق تۋىنداتاتىن جازبا بولسا جانە ول قۇقىق قورعاۋ ورگاندارى تاراپىنان دالەلدەنسە, بۇعاتتالاتىنىن جەتكىزدى.
– مينيسترلىك اتالعان ماسەلەلەردى زاڭ شەڭبەرىندە قاداعالاپ وتىر. قازىر «ماسس-مەديا تۋرالى» زاڭ جوباسى قوعامنىڭ اشىق تالقىلاۋىنان ءوتىپ جاتىر. ونىڭ ىشىندە الەۋمەتتىك جەلىلەر جۇمىسى دا بار. جاڭا زاڭ جوباسى 27 قاڭتارعا دەيىن اشىق تالقىدا بولادى. سوندىقتان ۇسىنىستار بولسا, قاراۋعا ءازىرمىز, – دەدى ۆيتسە-مينيستر.
«جالپى زاڭ جوباسى جاستاردىڭ دامۋى ءۇشىن قولايلى جاعدايلار جاساۋعا باعىتتالعان. وسى رەتتە جاستار ساناتىنا كىرەتىندەر سانى ۇلعايۋىنا بايلانىستى جەڭىلدىكپەن جالعا بەرىلەتىن تۇرعىن ءۇي باعدارلاماسىنا دا وزگەرىستەر ەنگىزۋ قاراستىرىلىپ جاتىر», دەيدى دانيار قادىروۆ. ايتا كەتەيىك, ەلىمىزدە بۇرىن جاستار سانى 3,7 ميلليون بولسا, قازىر مەجەنىڭ وزگەرۋىنە بايلانىستى 14-تەن 35 جاسقا دەيىنگى ازاماتتار 5,8 ميلليونعا جەتتى.
