– بيىل پرەزيدەنتتىك جاستار كادر رەزەرۆىنە كەزەكتى ىرىكتەۋ وتەدى. قازىرگى كەزدە ەلىمىزدىڭ ەڭ ماڭىزدى سالالارى دەنساۋلىق ساقتاۋ, ەنەرگەتيكا, ءبىلىم بەرۋ باعىتىندا جۇمىس ىستەيتىن رەزەرۆشىلەردىڭ سانى وتە از. بۇل رەتتە, رەزەرۆشىلەردىڭ سالالىق توپتارىن قايتا قاراستىرامىز. ۇمىتكەرلەرمەن اڭگىمەلەسۋ مىندەتتى تۇردە سالالىق ورتالىق ورگاننىڭ قاتىسۋىمەن وتكىزەمىز دەپ جوسپارلاپ وتىرمىز, – دەدى اگەنتتىك توراعاسى.
ال وسىعان دەيىن رەزەرۆكە قابىلدانعان, الايدا وزگە ەلدىڭ ازاماتتىعىن الىپ قازاقستان ازاماتتىعىن جوعالتقان, سونداي-اق قىزمەتتەن ءتۇرلى سەبەپپەن كەتكەندەر رەزەرۆتەن شىعارىلادى. سونىمەن قاتار مەملەكەتتىك گرانتپەن ءبىلىم العان جوعارى وقۋ ورىندارىنىڭ ۇزدىك تۇلەكتەرى اۋداندىق جانە اۋىلدىق دەڭگەيلەردە كونكۋرسسىز قىزمەتكە تاعايىندالادى.
– بۇل بىلىكتى جاستاردى مەملەكەتتىك قىزمەتكە ىنتالاندىرۋعا, جاس مامانداردىڭ اۋدان مەن اۋىلدىق جەرلەرگە ورالۋىنا, سونىمەن قاتار وڭىرلەردەگى كادر تاپشىلىعىن ازايتۋعا سەپتىگىن تيگىزىپ, مەملەكەتتىك قىزمەتكە كىرۋدى جەڭىلدەتەدى. بۇعان قوسا «ب» كورپۋسىنىڭ جوعارى لاۋازىمدارىنا ۋاكىلەتتى ورگاننىڭ كەلىسىمىمەن كونكۋرستىق ىرىكتەۋسىز تىكەلەي تاعايىنداۋ مۇمكىندىگى بەرىلىپ وتىر. بۇل ءبىرىنشى باسشىلاردىڭ ءوز قىزمەتشىلەرى ءۇشىن جاۋاپكەرشىلىگىن ارتتىرادى. سونداي-اق پرەزيدەنت جانىنداعى مەملەكەتتىك باسقارۋ اكادەمياسىندا جوعارى ۇلگەرىمىن كورسەتكەن تۇلەكتەردى وقۋدى بىتىرگەننەن كەيىن ءبىر جىل ىشىندە ەلوردانى قوسپاعاندا, جەرگىلىكتى ورگاندارعا جەكەلەگەن لاۋازىمدارعا كونكۋرستىق ىرىكتەۋسىز تاعايىنداۋدى قاراستىرىپ وتىرمىز, – دەدى د.جازىقباەۆ.
ال ەكى توقسان بويى قابىلەتتىلىكتەرى ءتيىمسىز دەپ باعالانعان قىزمەتشىلەردىڭ لاۋازىمى تومەندەتىلەدى, ەگەر تومەنگى بوس لاۋازىم ورنى بولماعان جاعدايدا قىزمەتتەن شىعارىلادى. اگەنتتىك باسشىسىنىڭ ايتۋىنشا, بۇل اپپاراتتى ءتيىمسىز مەملەكەتتىك قىزمەتشىلەردەن بوساتۋعا ىقپالىن تيگىزىپ, مەملەكەتتىك قىزمەتتەن شىعۋ ءتارتىبىن جەڭىلدەتەدى.
بۇعان قوسا اگەنتتىك مەملەكەتتىك قىزمەتتى جەتىلدىرۋ جونىندە زاڭ جوباسىن ازىرلەپ, پارلامەنتتىڭ قاراۋىنا جىبەرگەن. زاڭ جوباسىندا پرەزيدەنت شەشىمىمەن ساياسي قىزمەتشىلەردى «سەنىم جوعالتۋىنا» بايلانىستى جۇمىستان شىعارۋ ماسەلەسى قاراستىرىلعان. مۇنداي سەبەپپەن شىعارىلعان قىزمەتشى مەملەكەتتىك قىزمەتكە ءۇش جىل بويى قايتىپ كەلە المايدى.
– الداعى ۋاقىتتا مەملەكەتتىك ورگاندارداعى باسقارۋشى جانە اتقارۋشى لاۋازىمدار سانى رەتتەلەدى. قازىرگى كەزدە, كەيبىر مەملەكەتتىك ورگانداردا ءبىر نە ەكى قىزمەتشىدەن قۇرىلعان بولىمشەلەر بار. ءبىزدىڭ ماقساتىمىز – مەملەكەتتىك ورگانداردىڭ وڭتايلى جانە ءتيىمدى قۇرىلىمىن قالىپتاستىرۋ. وسىنىڭ ءبىرى رەتىندە «ە-قىزمەت» جۇيەسىنىڭ سىرتقى پورتالىندا ىسكە اسىرىلاتىن مەملەكەتتىك قىزمەتكە جاڭا ىرىكتەۋ الگوريتمى ازىرلەندى, وندا كونكۋرستىق ءراسىمدى وتكىزۋ فورماتى قايتا قارالدى. كونكۋرستىق ءراسىمنىڭ جاڭا فورماتى ۇمىتكەرلەرگە الدىن الا بەلگىلەنگەن ۋاقىتتا وتەتىن اڭگىمەلەسۋدەن باسقا بارلىق كەزەڭدە, كەز كەلگەن ۋاقىتتا جانە الەمنىڭ كەز كەلگەن نۇكتەسىنەن كونكۋرسقا قاتىسۋعا مۇمكىندىك بەرەدى. ەندىگى كەزەكتەگى ءبىزدىڭ جوسپارىمىز جاڭا ىرىكتەۋ جۇيەسىن سىناقتان وتكىزۋ, – دەدى اگەنتتىك توراعاسى.
اتالعان قاناتقاقتى جوبا 1 ناۋرىزدان باستاپ 5 مەملەكەتتىك ورگاندا (مەملەكەتتىك قىزمەت ىستەرى اگەنتتىگى, يندۋستريا جəنە ينفراقۇرىلىمدىق دامۋ مينيسترلىگى, ساۋدا جəنە ينتەگراتسيا مينيسترلىگى, اقمولا وبلىسى جانە شىمكەنت قالاسى اكىمدىكتەرى) سىناقتان وتكىزىلەدى.
بۇگىندە كەيبىر قىزمەت كورسەتۋ سالالارى بيۋروكراتيادان ارىلا قويماعانى بەلگىلى. وسى باعىتتا اگەنتتىك دەنساۋلىق ساقتاۋ, ءبىلىم بەرۋ, ەڭبەك, الەۋمەتتىك قورعاۋ سالالارىنا تالداۋ جۇرگىزىپ, مەملەكەتتىك اپپاراتتىڭ جۇمىسىن مەيلىنشە تۇرعىندارعا باعدارلانعان سەرۆيستى قالىپتاستىرۋعا, بيۋروكراتيالىق كەدەرگىلەردى ازايتۋعا باعىتتالعان 183 ۇسىنىس ازىرلەگەن.
– بۇعان قوسا, جالپى مەملەكەتتىك ورگانداردىڭ جۇمىسىندا كوپ كەزدەسەتىن ىشكى اكىمشىلىك راسىمدەرىنە كەشەندى مونيتورينگ جۇرگىزىلدى. بۇل جۇمىسقا ءارتۇرلى سالا ماماندارىنان, ازاماتتىق قوعام وكىلدەرىنەن جانە ساراپشىلاردان قۇرالعان جالپى سانى ەكى مىڭعا جۋىق ادام قاتىستى. 2023 جىلى قارجى-ەكونوميكالىق سالاسىنا تالداۋ جۇرگىزۋدى جوسپارلاپ وتىرمىز, – دەدى د.جازىقباەۆ.
مەملەكەتتىك قىزمەت ىستەرى اگەنتتىگىنىڭ كەڭەيتىلگەن القا وتىرىسىنا پرەزيدەنت اكىمشىلىگىنىڭ وكىلدەرى, پارلامەنت دەپۋتاتتارى, قوعامدىق كەڭەس مۇشەلەرى, ورتالىق مەملەكەتتىك ورگاندار وكىلدەرى, اۋماقتىق دەپارتامەنتتەردىڭ باسشىلارى, پرەزيدەنت جانىنداعى مەملەكەتتىك باسقارۋ اكادەمياسى جانە مەملەكەتتىك قىزمەت پەرسونالىن باسقارۋ جونىندەگى ۇلتتىق ورتالىقتىڭ قىزمەتكەرلەرى قاتىستى.
