قىسقى وليمپياداعا ۇيالماي جىبەرەتىن سپورتشىلارىمىز بار – ساعدات سادىق

جاستارىمىز 2023 جىلعى قىسقى ۋنيۆەرسيادادا 11 مەدال ەنشىلەدى. قازاقستان دەلەگاتسياسىن ۇلتتىق عىلىمي پراكتيكالىق دەنە تاربيەسى ورتالىعىنىڭ باس ديرەكتورى سادىقوۆ ساعدات كابىر ۇلى باستاپ بارعان ەدى. ءبىز باس ديرەكتورمەن اڭگىمەلەستىك. 

- ساعدات كابىر ۇلى, اقش-تان جەتكەن اقجولتاي جاڭالىقتارعا قۋانىپ وتىرمىز. ستۋدەنتتەرىمىز جاراپ-اق تۇر! 

- سوڭعى جارىس كۇنىندە ءبىزدىڭ حوككەيشىلەر جاپونيا كومانداسىن 8-1 ەسەبىمەن ۇتىپ, ەلىمىزگە قولا مەدال سىيلادى. بۇدان بۇرىن كانادا كومانداسىن ۇتادى دەگەن ويدا بولعان ەدىك. 4-1 ەسەبىمەن جەڭىلسەك تە, تارتىستى وتكەن ويىننان ءبىزدىڭ كوماندانىڭ ساعى سىنبادى. ولاي دەيتىن سەبەبىم, «اقش كومانداسىمەن نەگىزگى ويىن ۋاقىتىندا تەڭ دارەجەدە ويناپ, قوسىمشا ۋاقىتتا ەسە جىبەرگەن جاپونيامەن كەزدەسۋ قالاي بولار ەكەن» دەگەن ۋايىمىم بولدى. بىراق بۇل كۇدىگىم حوككەيشىلەرىمىزبەن تىلدەسكەن سوڭ سەيىلدى. «كىممەن جانە قالاي ويناعانىنا قاراماڭىز, ءبىز جەڭەمىز!» دەگەن سوزدەرى وتە سەنىمدى شىقتى. كوزدەرىندە وت, سوزدەرىندە جالىن بار ءبىزدىڭ جاستارعا سەنىم ارتتىم. سەنىمدى اقتادى. سوزدەرىندە تۇردى.  الپاۋىت 12 مەملەكەتتىڭ جاس حوككەيشىلەرىنىڭ باسەكەسىندە قازاقستاننىڭ كومانداسى جۇلدەگەر اتاندى. ەل قورجىنىنا ەڭ سوڭعى جۇلدەنى شاڭعىمەن جۇگىرۋدەن سىنعا تۇسكەن كسەنيا شالىگينا سالدى. بۇگىن ۋنيۆەريسادانىڭ جابىلۋى بولدى.

- بارەكەلدى! ۋنيۆەرسياداعا قاتىسۋشىلار قالاي تاڭدالدى؟ 

- ءبىر مىسال كەلتىرە كەتەيىن, اقش-تا ءار وقۋ ورنىنىڭ ءوز حوككەي كلۋبتارى بار. ال ءبىز ونداي دەڭگەيگە ءالى جەتە قويعان جوقپىز. سوندىقتان ءبىز ۋنيۆەرسيتەتتەر اراسىندا ىرىكتەۋ وتكىزدىك. سونداي-اق قىسقى سپورت تۇرلەرىنەن ونەر كورسەتەتىن ۇلتتىق قۇراما ساپىنداعى ستۋدەنت جاستارعا سەنىم ارتتىق. فەدەراتسيا ۇسىنعان ءارى مىقتى, ءارى ستۋدەنت سپورتشىلاردى نيۋ-يوركقا الىپ كەلدىك. 

- بۇل جولعى ۋنيۆەرسيادادا قىسقى سپورت تۇرلەرىنەن وسال دەگەن سىنعا قالىپ جاتاتىن قاراكوزدەرىمىزدىڭ كوپتەپ قاتىسقانىن بايقادىق جانە ولار جەڭىمپاز بولىپ, جۇلدەگەر اتانىپ جاتتى. 

- ءيا, بۇل ناتيجەلەر – كوڭىلگە ەرەكشە جىلۋ سىيلادى. ايتا كەتۋ كەرەك, قىسقى ۋنيۆەسيادادا تۇڭعىش رەت قازاق بالاسى بياتلوننان چەمپيون بولدى. ەشكىمدى ءبولىپ-جارىپ وتىرعانىم جوق. بىراق تاريحي فاكت ەكەنى راس. تاعى ءبىر ايتا كەتەتىن جايت: بۇرىندارى ۋنيۆەرسيداعا قاتىسقان سپورتشىلارىمىزدىڭ كوبى كوش سوڭىندا قالىپ قويىپ جاتاتىن كەزدەر ءجيى بولاتىن. ال بۇل جولى ءبارى دە لايىقتى ونەر كورسەتتى. قازاقستاندىق سپورتشى جاستار وزگە باسەكەلەستەرىنە تاباندى قارسىلىق كورسەتە الدى. وسىلايشا, قىسقى سپورت تۇرلەرىنەن بولاشاقتا وليمپيادا التىنىن كوپتەپ كۇتۋگە بولادى دەگەن ويعا قالىپ وتىرمىن. ارينە الدە دە ەڭبەكتەنۋىمىز كەرەك. جالپى قىسقى وليمپياداعا ۇيالماي جىبەرە الاتىن سپورتشىلارىمىز بار. 

- وسى جولى وتكىزىلگەن ۋنيۆەرسيادانىڭ ەرەكشەلىگى بار ما؟ 

- بۇرىندارى بۇل دوداعا 28 جاسقا دەيىنگى سپورتشىلار قاتىساتىن. ال وسى جولى 25 جاستاعى جاستار باق سىنادى. سوعان قاراماستان قول جەتكىزگەن جەتىستىكتەرىمىزدى ەستىپ-كورىپ وتىرسىزدار. سول سەبەپتى وليمپيادا ويىندارىندا ءۇمىت كۇتتىرەتىن سپورتشىلارىمىز بار دەپ ايتۋعا بولادى. ەندى ءبىز ۇلتتىق عىلىمي پراكتيكالىق دەنە تاربيەسى ورتالىعى رەتىندە ەلىمىزدە قىسقى سپورت تۇرلەرىنىڭ قايسىسىن دامىتا الامىز جانە ليگالاردى قالاي قالىپتاستىرامىز دەگەن ماسەلەلەردى ويلاسىپ وتىرمىز. ءبىز وسى باعىتتاعى جۇمىستاردى قولعا الۋىمىز كەرەك. ماسەلەن, ءوزىڭىز دە كۇنى كەشە قازاقستان مەن كانادا اراسىنداعى حوككەي ويىنىن تاماشالاعان شىعارسىز. كانادالىق حوككەيشى ستۋدەنتتەر قالاي ونەر كورسەتتى! ياعني, كانادا مەملەكەتى ءۇشىن كەلەسى وليمپيادا ويىندارىنا قاتىساتىن سپورتشىلار دايىن دەگەن ءسوز. ءبىز دە وسى باعىتتا جۇمىس ىستەۋىمىز كەرەك.

- الداعى جوسپارلارىڭىز جايلى بىلە وتىرساق... 

- بۇيىرسا, قىتايدا وتەتىن جازعى ۋنيۆەرسياداعا ەل ىشىندە ىرىكتەۋ وتىكىزەمىز. دايىندىق باستالادى. ستۋدەنتتەر وداعىممەن بىرلەسىپ رەگلامەنت جاسايمىز. سوسىن ىرىكتەۋدە توپ جارعان جاستاردى قىتايعا الىپ بارامىز. سونىمەن قاتار جوعارى ءبىلىم جانە عىلىم ءمينيسترى ساياسات نۇربەكتىڭ تاپسىرماسىمەن ستۋدەنتتەردى ۋنيۆەرسياداعا جاي عانا الىپ بارمايمىز, ءبىز الدىمەن وقۋ-جاتتىعۋ جيىنىن وتكىزەمىز جانە ولارمەن بىرگە عىلىمي جۇمىستار جۇرگىزەمىز. 

- قازاقستاندىق جاستاردىڭ قىسقى سپورت تۇرلەرىنە دەگەن قىزىعۋشىلىعى جايلى ايتا الاسىز با؟

- ۋنيۆەرسيادا – وليمپيادادان كەيىنگى ەڭ ءىرى دودا. سوندىقتان كەلەشەكتە وليمپيادا جۇلدەلەرىنە زور ۇمىتپەن قاراۋعا بولادى. بىراق بۇل جەردە عىلىمي جۇمىستار جۇرگىزىلۋى قاجەت. كەشە ءبىز جاپونيادان كەلگەن ارىپتەستەرىمىزبەن سويلەستىك. ولار قىسقى سپورت تۇرلەرىنە قاتتى ءمان بەرىپ وتىر. ءبىر عانا مىسال, كەزىندە شاڭعىمەن سىرعاناۋدان قازاقستان قاي تۇعىردا تۇردى, جاپونيا قاي ساتىدا ەدى؟ ال قازىر جاپوندار ءبىزدى باسىپ وزدى. ءتىپتى, حوككەي توڭىرەگىندە دە ويلاناتىن سۇراقتار كوپ. مىنە, وسىنداي ماسەلەلەردى شەشۋ ءۇشىن جۇمىستاردى مەكتەپتەن باستاۋىمىز كەرەك. بۇل رەتتە وقۋ اعارتۋ مينيسترلىگى دە ۇلكەن شارۋالار اتقارعالى وتىر. سوندىقتان وسىلاردى ءبىر جۇيەگە كەلتىرۋىمىز كەرەك. مىسالى, مەكتەپ – ستۋدەنت – ۇلتتىق كوماندا دەگەن ءۇش ساتى جاساۋىمىز قاجەت. قازىرگى ۋاقىتتا سوعان قاراي بەت بۇرىپ وتىرمىز.

- اڭگىمەڭىزگە راحمەت!

ايتپاقشى, بۇگىن تۇندە سپورتشىلاردىڭ الدى ەلگە ورالا باستايدى. ايتا كەتەيىك, ەل قورجىنىندا ءۇش التىن, ءتورت كۇمىس جانە ءتورت قولا بار. 

بياتلون - كۋرالەس ۆاديم ۆاديموۆيچ (1 ورىن) 

شاڭعىمەن سەكىرۋ - ۆاسيلەۆ دانيل يۋرەۆيچ (1 ورىن)

بياتلون – ەرلەر كوماندالىق سپرينت 10 كم:

تۇرلىبەكوۆ بەكەنتاي مۇرات ۇلى - 1 ورىن

مۋحين الەكساندر الەكساندروۆيچ – 3 ورىن

ايەلدەر اراسىندا 3 × 5 كم ەستافەتالىق شاڭعى جارىسى – (3 ورىن)

1. راقىشەۆا ايشا ۆيكتورقىزى,
2. شالىگينا كسەنيا ۆلاديميروۆنا,
3. ستەپاشكينا نادەجدا الەكساندروۆنا. 

شاڭعى جارىسى ماسس ستارت 15 كم – شالىگينا كسەنيا ۆلاديميروۆنا  (3 ورىن)

ەرلەر اراسىنداعى ترامپلين – 2 ورىن  

1.ۆاسيلەۆ دانيل يۋرەۆيچ,

2. تكاچەنكو سەرگەي ۆيكتوروۆيچ.

شورت-ترەكتەن كوماندالىق ميكس (2000 م) - 2 ورىن

1. اجعاليەۆا الينا ۋرازبەكقىزى
2. حان يانا ۆيتالەۆنا
3. ەرمەك ماليكا جامبىلقىزى
4. عالياحمەتوۆ ءادىل قازبەك ۇلى
5. شامۋحانوۆ ەركەبۇلان قازبەك ۇلى
6. ابىلقاتىموۆ الىشەر ماقسۇت ۇلى

ەرلەر اراسىندا بياتلوننان ماسس ستارت (15 كم) - مۋحين الەكساندر الەكساندروۆيچ (2 ورىن) 

ەرلەر (5000 م) - 2 ورىن

1. عالياحمەتوۆ ءادىل قازبەك ۇلى
2. شامۋحانوۆ ەركەبۇلان قازبەك ۇلى
3. كليمەنكو ۆالەري اندرەەۆيچ
4. ءجانىسوۆ سانجار ساپاربەك ۇلى
5. حۆان انتون يۋرەۆيچ

شايبالى حوككەي - 3 ورىن 

1. گاۆريلەنكو يۆان
2. ديحانبەك ءمادي
3. كورولەۆ ارتەم
4. پولوحوۆ كيريلل
5. كيريلل نيكيتين
6. سۇلەيمەنوۆ ابىلايحان
7. دانيل بۋتەنكو
8. الەكساندروۆ ستانيسلاۆ
9. بويكو ولەگ
10. بوريسەۆيچ الەكساندر
11. اندرەي بۋيالسكي
12. گۋسەينوۆ دياس
13. دانيار سايان
14. مۇحامەتوۆ ماكسيم
15. مۋسوروۆ ماكسيم
16. مۇراتوۆ باتىرلان
17. ماڭعىسباەۆ اباي
18. ومىربەكوۆ ءاليحان
19. لوگۆين ۆسەۆولود
20. قاراتاەۆ دەنيس
21. رومان كالمىكوۆ
22. اندرەي شۋتوۆ

اڭگىمەلەسكەن جانبولات كەنجەعۇل