«قايرات» پەن «پاحتاكور» اراسىنداعى باسەكەلەر اركەز وتە شيەلەنىستى ءارى قىزىقتى وتەتىن. ستاديونداردا ينە شانشار ورىن بولمايتىن. تىپتەن بۇل دەربيگە ساياسي ءمان بەرىلەتىن. ويتكەنى قازاقتار كىمگە ەسە جىبەرسە دە, وزبەكتەردەن ۇتىلۋدى قۇپ كورمەيتىن. وزدەرىنە نامىس سانايتىن. كورشىلەرىمىزدىڭ دە ۇستانعان قاعيداتتارى ءدال سونداي ەدى. سول سەبەپتى دە بۇل ماتچتاردى تاماشالاۋ ءۇشىن اتالعان رەسپۋبليكالاردىڭ ءبىرىنشى باسشىلارىنان باستاپ, باسقا دا جوعارى لاۋازىم يەلەرى بارلىق شارۋاسىن ىسىرىپ قويىپ, ستاديونعا ارنايى ات باسىن بۇراتىن. ءوز جەرلەستەرى جەڭىسكە جەتكەن جاعدايدا كوماندا مۇشەلەرى ادەتتەگىدەن الدەقايدا مول سىياقى الىپ, كوپشىلىكتىڭ زور قوشەمەتىنە بولەنەتىن. جەڭىلىس تاپسا, سان مىڭ جانكۇيەر فۋتبولشىلاردى جەردەن الىپ, جەرگە سالاتىن. ال باسشىلار ولارعا قىرىن قاراي باستايتىن.
ۆيكيپەديا ينتەرنەت-ەنتسيكلوپەدياسى تاراتقان مالىمەتتەرگە زەر سالساق, قازاقستان مەن وزبەكستاننىڭ باس كوماندالارى كسرو چەمپيوناتى مەن كسرو كۋبوگى جولىنداعى جارىستاردا ءوزارا 50 مارتە كۇش سىناسقان ەكەن. 21 رەت «قايرات» جەڭىسكە جەتسە, 18 رەت «پاحتاكوردىڭ» اسىعى الشىسىنان ءتۇستى. 11 باسەكەدە تەڭ ەسەپ تىركەلدى. جەرلەستەرىمىز 66 گول سوقسا, قارسىلاستار 61 رەت نىسانانى ءدال كوزدەدى. 1956 جىلدىڭ 13 قىركۇيەگىندە الماتىلىقتار تاشكەنتتىكتەردىڭ قاقپاسىنا جاۋاپسىز ءتورت گول سوقسا, 1984 جىلدىڭ 29 قىركۇيەگىندە 6:2 ەسەبىمەن ويسىراتا ۇتتى. وزبەكتەر دە قاراپ قالعان جوق. 1957, 1973 جانە1974 جىلدارى جىلى ولار بىزدەن 4:1 ەسەبىمەن باسىم ءتۇستى. بۇلار – وسى كلۋبتاردىڭ اراسىندا وتكەن باسەكەلەردە تىركەلگەن ەڭ ءىرى ەسەپتەر. بايىپتاپ قاراساڭىزدار, باسىمدىق – ءسال بولسا دا «قايرات» جاعىندا.
1962 جانە 1982 جىلدارى كسرو چەمپيوناتىندا «پاحتاكور» التىنشى ورىندى يەلەندى. بۇل – وزبەكستاندىق كوماندانىڭ اتالعان جارىستاعى ەڭ ۇزدىك ناتيجەسى. 1968 جىلى ولار كسرو كۋبوگىنىڭ فينالىندا وينادى. شەشۋشى تۇستا تاشكەنتتىك ۇجىم ماسكەۋدىڭ «تورپەدوسىنان» 0:1 ەسەبىمەن ۇتىلدى.
«قايرات» وداق چەمپيوناتىنداعى ەڭ ۇزدىك كورسەتكىشىنە 1986 جىلى قول جەتكىزدى. سول ماۋسىمدى ولار جەتىنشى ورىنمەن قورىتىندىلادى. 1963 جىلى كسرو كۋبوگىنىڭ جارتىلاي فينالىندا ونەر كورسەتتى. بۇل جاعىنان «پاحتاكوردىڭ» كوشى ىلگەرى. دەسەك تە 1971 جىلى الماتىلىقتار حالىقارالىق تەمىرجولشىلار وداعى مەن 1988 جىلى كسرو فۋتبول فەدەراتسياسى كۋبوگى جولىنداعى جارىستاردا باس جۇلدەنى ولجالاعانىن ەستەن شىعارماعانىمىز ابزال. ال «پاحتاكور» بولسا, ونداي تابىسىمەن ماقتانا المايدى.
وتكەن عاسىردىڭ توقسانىنشى جىلدارىنىڭ باسىندا تاۋەلسىزدىك العاننان كەيىن اتالعان كوماندالاردىڭ جولدارى ەكىگە ايىرىلدى. بۇل كۇندەرى اركىم وزدەرىنىڭ ىشكى جارىستارىندا ونەر كورسەتۋدە. 1992-2022 جىلدار ارالىعىندا «پاحتاكوردىڭ» وزبەكستان چەمپيوناتىندا قول جەتكىزگەن كورسەتكىشى مىناداي: 15 التىن, 6 كۇمىس جانە 2 قولا. ەل كۋبوگىن ولار 13 رەت ۇتتى. «قايراتتىڭ» قازاقستان چەمپيوناتىنداعى ناتيجەسى: 3 التىن, 5 كۇمىس جانە 6 قولا. كۋبوكتىق سايىستا الماتىلىقتار 10 مارتە باس جۇلدەنى ولجالادى.
