كاسىپكەرلىككە كەڭ مۇمكىندىك

ءتۇرلى سالا بويىنشا  كاسىبىن ناسىبىنە اينالدىرعان بيزنەسمەندەر جۇمىسىن جان-جاقتى تالقىلاۋ ماقساتىندا تالدىقورعاندا   ۇلت­تىق كاسىپكەرلەر پالاتاسىنىڭ باسقارما  توراعاسى ابىلاي مىر­زاح­مەتوۆ پەن  الماتى وبلىسى اكىمىنىڭ ورىنباسارى سەرىك تۇرداليەۆتىڭ قاتىسۋىمەن  جيىن بولىپ ءوتتى. وندا ەلباسى تالابىنا سايكەس, تەك شيكىزات وندىرۋمەن شەكتەلىپ قالماي ءوندىرىس ورىندارىن ءور­كەن­دەتۋ,  اۋىلشارۋاشىلىق قۇرى­لىمدارىن دامىتۋ,  جالپى كاسىپكەرلەرگە  قولداۋ كورسەتۋ سەكىلدى بۇگىنگى   كۇننىڭ وزەكتى ماسەلەرى اشىق ايتىلدى. ۇتىمدى وي, قۇندى پىكىر ورتاعا سالىنىپ, ساراپتالدى. «جالپى, جەتىسۋ جەرىندە دە كاسىپكەرلىككە كەڭ جول اشىلعان. «بيزنەستىڭ جول كارتاسى-2020» مەملەكەتتىك باعدارلاماسى اياسىندا  الماتى وبلىسىنا 7,9 ملرد.  تەڭگە بولىنگەن ەدى.  وسى قاراجاتتى يگەرۋ بارىسىندا 8 مىڭ جۇمىس ورنى ساقتالىپ, قوسىمشا  1300 ادام جۇمىسقا الىندى. 3 جوبانى  جۇزەگە  اسىرۋ بارىسىندا بيۋدجەتتەن بولىنگەن  93,8 ملن.  تەڭگە تولىعىمەن يگەرىلىپ,  3 مىڭ كاسىپكەرگە   مەملەكەتتىك  قولداۋ كورسەتىلىپ  8 ملرد. تەڭگە بولىنگەنى تاعى بار», دەدى الماتى وبلىستىق كاسىپكەرلەر پالاتاسىنىڭ ديرەكتورى ءلاززات شىڭعىسباەۆا. نەگىزى اگرارلى وبلىس  بولعان­دىقتان جەتىسۋ جەرىندە اۋىل شارۋاشىلىعى سالاسى وتە جاقسى دامىعان. ۋاقىت تالابىنا ساي كوكونىستەردى توقتاۋسىز وسىرۋگە ارنالعان جىلىجايلار  جەتكىلىكتى. وسىنداي ارتىقشىلىقتارى بول­عاندىقتان كاسىپكەرلەر وندىرگەن ونىمدەرىنىڭ 80 پايىزىن ەكسپورتقا شىعارۋ مۇمكىندىگىنە يە بولىپ وتىر. ارينە بۇل رەتتە كاسىپكەرلەر پالاتاسىنىڭ زاڭناما شەڭبەرىندە اتقارىپ وتىرعان جۇمىسىن ەرەكشە اتاپ ءوتۋ كەرەك.  كەلەلى جيىندا ۇلتتىق كاسىپكەرلەر  پالاتاسى  تاراپىنان جەر-جەردە قوردالانىپ قالعان پروبلەمالاردى  شەشۋدىڭ ەكى ءتاسىلى  ورتاعا سالىندى.  بىرىنشىدەن,  20 جىلدان بەرى وزىندىك جەمىسىن بەرىپ كەلە جاتقان تۇرىك تاجىريبەسى بويىنشا ارنايى قور قۇرۋ, ەكىنشىدەن,  نەسيەلىك سەرىكتەستىكتىڭ بەلسەندىلىگىن ارتتىرىپ دامىتۋ كەرەك. سونىمەن قاتار ابىلاي مىرزاحمەتوۆ ايماق بيزنەسمەندەرىنە  مەملەكەتتىك بيلىكپەن قارىم-قاتىناستى نىعايتىپ, وبلىستىق اكىمدىكپەن بىرلەسە جيىندار وتكىزىپ وتىرۋ جونىندە كەڭەس بەردى. قورىتا ايتقاندا, بۇل باسقو­سۋعا قاتىسقاندار وزىندىك وي ءتۇيىپ قايتتى. نۇربول الدىباەۆ, «ەگەمەن قازاقستان». الماتى وبلىسى.