ء«تيىمدى دەپوزيت» پيراميداسىن قۇرۋشىلار جازا مەرزىمىن وتەگەننەن كەيىن دە قارجىلىق نە كوممەرتسيالىق ۇيىمداردا باسشىلىق قىزمەت اتقارا المايدى. سوت ۇكىمى بويىنشا سوتتالۋشىلار زارداپ شەككەندەردىڭ قاراجاتىن قايتارىپ بەرۋگە ءتيىس. الاياقتاردىڭ ارەكەتىنەن زارداپ شەككەن 764 ادام 4 ميلليارد تەڭگە قارجىسىنان ايىرىلعان. 840 تومنان تۇراتىن قىلمىستىق ىستە الاياقتاردىڭ قارجى پيراميداسى ادىسىمەن جۇرتتان قولما-قول اقشا قابىلداعانى, ءتىپتى اۆتوكولىكتەر مەن جەكە ادامداردىڭ تۇرعىن ۇيلەرىن قىمباتقا ساتىپ بەرۋگە ۋادە ەتكەنى كورسەتىلگەن. كوپ تابىس تابامىز دەپ الدانعان جۇرت الاياقتاردىڭ كەڭسەسىنە كەلىپ, جەكە كولىكتەر مەن تۇرعىن ۇيلەرىن ساۋداعا شىعارۋعا ءوز اتتارىنان سەنىمحات راسىمدەگەن. اقىر اياعى ساتىلىمعا شىققان م ۇلىك تە جوق, نە قولدارىنا قارجىسى دا تۇسپەي سان سوعىپ قالدى. تەرگەۋ كەزىندە الاياقتارعا قاتىستى قانشاما دالەل جينالسا دا, سوت بارىسىندا ايىپتالعاندار كىنالارىن مويىندامادى. نە تەرگەۋ كەزىندە, نە سوت ۇدەرىستەرىندە جۇرتتان جينالعان 4 ميلليارد تەڭگەنىڭ قايدا كەتكەندىگى انىقتالمادى.
ء«تيىمدى دەپوزيت» ىسىمەن ءبىر كەزدە اقتوبە قالالىق №2 سوتىندا «تسەنتر فينانس» پيراميداسىن ۇيىمداستىرعان 31 جاستاعى بەرىك تيمينگە قاتىستى سوت ءجۇرىپ جاتىر. 2019 جىلدىڭ جەلتوقسانىنان 2020 جىلدىڭ اقپانىنا دەيىن ەكى ءجۇز ادام وسى پيراميداعا 1 ميلليارد تەڭگەدەن استام قارجى سالعان. ەكى جارىم جىل بۇرىن بەرىك تيمين «تسەنتر فينانس» سەرىكتەستىگىن ساتىپ الىپ, جارعىسىندا كوممەرتسيالىق قىزمەتپەن اينالىساتىنىن كورسەتە وتىرىپ, قايتا تىركەۋدەن وتكىزەدى. سودان كەيىن جوعارى جالاقىعا قىزمەتكەردى جۇمىسقا الاتىندىعى تۋرالى جارناما بەرەدى. جۇرتتان سالىم قابىلداپ, اي سايىن 40 پايىزدىق مولشەرلەمەدە سىياقى بەرۋگە ۋادە ەتكەن. بۇل جەردە ادامداردان قابىلداناتىن ەڭ تومەنگى سالىم مولشەرى – 300 مىڭ, ەڭ جوعارعىسى 2 ميلليون 100 مىڭ تەڭگە دەپ بەلگىلەنگەن. بەرىك تيمين دە الاياق ارىپتەستەرى سەكىلدى جۇرتتىڭ كولىگىن نارىقتىق باعادان 30 پايىز جوعارى باعاعا ساتىپ بەرۋگە ۋادە ەتەدى. كولىك يەسىمەن كەلىسىمشارت جاساسىپ, ولار جىلجىمالى م ۇلىگىن ساۋدالاۋعا سەنىپ تاپسىرعان. الاياق كولىك يەسىنىڭ قولىنا از مولشەردە قارجى بەرىپ, قالعان سومانى كولىك ساتىلعان سوڭ بەرۋگە ۋادە ەتكەن. ۋاقىت وتە بەرەدى, ۋادە ەتىلگەن قارجى قولىنا تيمەگەن سوڭ كولىك يەسى بەرىك ءتيميننىڭ كەڭسەسىنە كەلگەندە ەش ادامدى تاپپايدى, ەشبىرى تەلەفون تۇتقاسىن كوتەرمەيدى. زارداپ شەككەندەر وزدەرىنىڭ قالاي الدانعاندارىن بايانداعانىمەن, سوت ۇدەرىسىندە الاياقتار وزدەرىن ايىپتى دەپ سەزىنبەدى. بەرىك تيميننەن الدانعان 200 اقتوبەلىك ءبىر ميلليارد تەڭگەنى قايدا جىبەرگەنىن بىلگىسى كەلسە دە, بۇل سۇراقتىڭ جاۋابى تابىلمادى.
ايتا كەتۋ كەرەك, اقتوبەدە ءبىر جىل بۇرىن ءدال وسى ۋاقىتتا بىرنەشە قارجى پيراميداسىن ۇيىمداستىرعاندارعا اشىق سوت بولىپ, وننان استام ادام ۇزاق مەرزىمگە سوتتالىپ كەتكەن ەدى. وكىنىشكە قاراي, قولىنداعى قارجىسىنان ايىرىلعان, باسپاناسىن نە كولىگىن ساتىپ بەرەمىن دەگەندەرگە وڭباي الدانعان ادامداردىڭ كوپتىگىنە قاراماستان, قارجى پيراميدالارىنا سەنەتىندەر سانى ءالى ازايماي وتىر.
اقتوبە وبلىسى
