مەملەكەت باسشىسى نۇرسۇلتان نازارباەۆ قازاقستان پرەزيدەنتى جانىنداعى شەتەل ينۆەستورلارى كەڭەسىنىڭ اياسىندا ەۋروپا قايتا قۇرۋ جانە دامۋ بانكىنىڭ پرەزيدەنتى سۋما چاكرابارتيمەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى.
كەزدەسۋ بارىسىندا بانكتىڭ قازاقستانداعى قىزمەتى, سونىڭ ىشىندە ەلىمىزدەگى ءتۇرلى جوبالاردى جۇزەگە اسىرۋعا قاتىسۋ ماسەلەلەرى تالقىلاندى.
مەملەكەت باسشىسى قازاقستان مەن ەقدب اراسىندا سەرىكتەستىك تۋرالى نەگىزدەمەلىك ۋاعدالاستىق جاسالعانىن, ول ءبىزدىڭ ەل مەن اتالعان قارجى ۇيىمىنىڭ ىنتىماقتاستىعىن كەڭەيتۋگە زور ءمۇمكىندىكتەر تۋدىراتىنىن اتاپ ءوتتى.
– قازاقستان ەكونوميكانى دامىتۋعا 1 تريلليون 600 ميلليارد تەڭگە بولەدى, وسىنشا سوماداعى ينۆەستيتسيالار وزگە كوزدەردەن دە تارتىلاتىن بولادى. مەن بانكتىڭ قازاقستانمەن جەمىستى جۇمىس ىستەگەنىن بىلەمىن. ءبىزدىڭ ءوزارا ىنتىماقتاستىعىمىز جالعاسادى دەپ ۇمىتتەنەمىن, – دەدى نۇرسۇلتان نازارباەۆ.
ەقدب ورتالىق ەۋروپادان ورتالىق ازياعا دەيىنگى 34 ەلدە, سونداي-اق, وڭتۇستىك جانە شىعىس جەرورتا تەڭىزى مەملەكەتتەرىندە جوبالاردى قارجىلاندىرادى.
***
مەملەكەت باسشىسى نۇرسۇلتان نازارباەۆ قازاقستان پرەزيدەنتى جانىنداعى شەتەل ينۆەستورلارى كەڭەسى اياسىندا «تويوتا موتور كورپورەيشن» كومپانياسىنىڭ باسقارما توراعاسى تاكەشي ۋچيامادامەن كەزدەستى.
كەزدەسۋدە ن.نازارباەۆ پەن ت. ۋچيامادا ەلىمىزدە اۆتوموبيل ونەركاسىبىن دامىتۋ, سونىڭ ىشىندە وسى «تويوتا» ماركالى اۆتوموبيلدەردى قازاقستان اۋماعىندا ءوندىرۋ ماسەلەلەرىن تالقىلادى.
«تويوتا موتور كورپورەيشن» – اۆتوموبيل قۇراستىرۋشى جاپونيالىق ءىرى كورپوراتسيا. ول قارجىلىق قىزمەتتەر دە ۇسىنىپ, بيزنەستىڭ وزگە دە باعىتتارىندا جۇمىس ىستەيدى. كومپانيا قىزمەتكەرلەرىنىڭ سانى 320 مىڭ ادامنان اسادى.
***
مەملەكەت باسشىسى نۇرسۇلتان نازارباەۆ قازاقستان پرەزيدەنتى جانىنداعى شەتەل ينۆەستورلارى كەڭەسى اياسىندا «شەلل» كونتسەرنىنىڭ باس اتقارۋشى ديرەكتورى بەن ۆان بەردەنمەن كەزدەستى.
كەزدەسۋ بارىسىندا ەلدىڭ مۇناي جانە گاز سالاسىن ءارى قاراي دامىتۋ جانە نەگىزگى ينۆەستيتسيالىق جوبالاردى جۇزەگە اسىرۋ ماسەلەلەرى تالقىلاندى.
ءتۇرلى ەنەرگەتيكالىق جانە مۇناي-حيميا كاسىپورىندارىن بىرىكتىرەتىن «شەلل» حالىقارالىق كونتسەرنى قازاقستاننىڭ مۇناي-گاز سالاسىنداعى ءىرى ينۆەستور بولىپ سانالادى.
