مازمۇندى ءىس-شاراعا مەملەكەت تاريحى ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور ەركىن ءابىل, قازاقستان كومپوزيتورلار وداعىنىڭ توراعاسى, كومپوزيتور سەرىكجان ءابدىنۇروۆ, تەحنيكا عىلىمدارىنىڭ كانديداتى سەرىك سادىقوۆ, قوعام قايراتكەرى مارات مۇستافين, جازۋشى كامال الپەيىسوۆا, قازاقستاننىڭ ەڭبەك سىڭىرگەن قايراتكەرى, كۇيشى انار مۇزداحانوۆا جانە تاعى باسقا زيالى قاۋىم وكىلدەرى قاتىستى.
برەندبۋك اۆتورى – سۋرەتشى, يلليۋستراتور, ديزاينەر, قازاقستان سۋرەتشىلەر وداعىنىڭ مۇشەسى الماس سىرعاباي. باتىردىڭ 150 جىلدىق مەرەيتويىنا ارنالعان لوگوتيپ ارنايى قۇرىلعان كوميسسيانىڭ تالقىلاۋىنان وتكەن. ول ەكى ءتۇرلى نۇسقادا دايىندالدى. بىرىنشىسىندە – قازاقستاننىڭ حالىق سۋرەتشى ءابىلحان قاستەەۆتىڭ داڭقتى ەردىڭ شىنايى بەينەسىن كوز الدىمىزعا اكەلگەن پورترەتى نەگىزگە الىنسا, ەكىنشىسى – الماتىداعى امانگەلدى يمانوۆتىڭ ات ۇستىندەگى ەسكەرتكىشىنىڭ ء(مۇسىنشى – ح.ب.اسقار-سارىدجا, ساۋلەتشى – ت.باسەنوۆ, 1947) نۇسقاسىندا جاسالدى.
تانىستىرىلىمدا قازاقستان كومپوزيتورلار وداعىنىڭ توراعاسى سەرىكجان ءابدىنۇروۆ ءوزى باسقارىپ وتىرعان وداق اياسىندا تۇعىرلى تۇلعانىڭ 150 جىلدىعىنا بايلانىستى بىرقاتار ءىس-شارا جوسپارلانىپ وتىرعانىن جەتكىزدى.
«كاسىبي مۋزىكانت رەتىندە باتىردىڭ مەرەيتويىنان شەت قالماۋ ءۇشىن, ەرلىك پەن ورلىكتى دارىپتەيتىن ءبىر شىعارمانى اياقتادىم. سونى امانگەلدى اتامىزعا ارنايمىن. ودان كەيىن الداعى ءساۋىر ايىندا استانا قالاسى اكىمدىگىنىڭ ەركەعالي راحماديەۆ اتىنداعى مەملەتتىك اكادەميالىق فيلارمونياسىمەن بىرلەسىپ, «باتىردىڭ بيىك تۇلعاسى» اتتى سازدى كەش وتكىزەمىز. وسى تۇستا ايتا كەتەر ءبىر جايت بار: كەزىندە امانگەلدى يمانوۆ تۋرالى كوپتەگەن مۋزىكالىق شىعارما جازىلدى. سونىڭ ىشىندە كورنەكتى كومپوزيتورلار م.تولەباەۆ پەن ە.برۋسيلوۆسكيدىڭ «امانگەلدى» وپەراسى مەن قىتاي كومپوزيتورى سي سينحايدىڭ «امانگەلدى» سيمفونياسىن ەرەكشە ايتۋعا بولادى. سونىمەن بىرگە ءابىلاحات ەسپاەۆ, لاتيف حاميدي, دميتري ماتسۋتسين جانە اتاقتى كۇيشى سۇگىردىڭ باتىرعا ارناعان تۋىندىلارى قازاق راديوسىنىڭ «التىن قورىندا» ساقتالعان. وسى شىعارمالاردىڭ دەنى اتالعان كەشتە جاڭا دىبىستا ارلەنىپ, كورەرمەنگە ۇسىنىلادى», دەدى ول.
سونداي-اق «امانگەلدى يمان» قوعامدىق قورىنىڭ جەتەكشىسى تولقىن سۇلتان تەكتى اۋلەتتىڭ ەرلىك جولدارىنا توقتالدى. «اكادەميك قانىش ساتباەۆ ءبىر ماقالاسىندا حالىق باتىرىنىڭ ەرلىگىنە توقتالىپ, ونىڭ اتاسى يماننىڭ كەنەسارى حاننىڭ سەنىمدى سەرىكتەرىنىڭ ءبىرى بولعانىن ايتادى. جالپى, يمان باتىر باۋىرلارىمەن, بالالارىمەن حان كەنە باستاعان ازاتتىق جولىنداعى ۇلى كۇرەستىڭ جالىندى جاۋىنگەرلەرى بولدى. قازاق جۋرناليستيكاسىنىڭ دامۋىنا ۇلەسىن قوسقان امانگەلدىنىڭ بەل بالاسى رامازان دا ءوز ەركىمەن مايدانعا اتتانىپ, سوندا كوز جۇمدى. وسىدان-اق بۇل اۋلەتتىڭ نەگىزىندە تەكتىلىك, باتىرلىق جاتقانىن بىلەسىز. امانگەلدى يمانوۆ – 1916 جىلعى تورعايداعى ۇلت ازاتتىق كوتەرىلىسىنىڭ باس ساردارى عانا ەمەس, ول حالقىنىڭ قامقورشىسى, ارقاسۇيەرى بولدى», دەدى باتىر ۇرپاعى.
سونىمەن قاتار ءىس-شارا بارىسىندا كۇيشى انار مۇزداحانوۆا اكەسى ايتباي مۇزداحانوۆتىڭ «امانگەلدى ءدۇبىرى» اتتى تۋىندىسىن جينالعاندارعا تارتۋ ەتتى.
