بۇعان دەيىن الماتى قالالىق پوليتسيا دەپارتامەنتى راميل مۋحورياپوۆتىڭ سوزىنە سۇيەنىپ, الەۋمەتتىك, ۇلتتىق, رۋلىق, ناسىلدىك, تاپتىق جانە ءدىني ارازدىقتى قوزدىرۋ فاكتىسىن تەكسەرۋ ءۇشىن سوتقا دەيىنگى تەرگەۋدى باستاعان ەدى.
«سوتقا دەيىنگى تەرگەپ-تەكسەرۋ ناتيجەلەرى بويىنشا قىلمىستىق قۋدالاۋ ورگانى قىلمىستىق ءىس جۇرگىزۋ كودەكسىنىڭ 35-بابىنىڭ 1-بولىگى 2-تارماعىنا سايكەس قىلمىستىق قۇقىقبۇزۋشىلىق قۇرامىنىڭ بولماۋىنا بايلانىستى ءىستى توقتاتۋ تۋرالى پروتسەسسۋالدىق شەشىم قابىلدادى. الماتى قالاسىنىڭ پروكۋراتۋراسى پروتسەسسۋالدىق شەشىممەن كەلىستى», دەدى الماتى قالاسى پروكۋرورىنىڭ ورىنباسارى نۇرلان اۋعانباەۆ.
ەسكە سالا كەتسەك, وتكەن جىلدىڭ قازان ايىندا كاسىپكەر, Choco حولدينگىنىڭ باسشىسى راميل مۋحورياپوۆ رەسەيدەن كوشىپ كەلگەندەرمەن كەزدەسۋىندە قازاق تىلىنە قاتىستى ءسوز ايتىپ, باسى داۋعا قالعان ەدى. جەلى قولدانۋشىلارى مۋحورياپوۆتىڭ بۇل قىلىعىن تەرىس قابىلداپ, ايىپتاعان. كەيىنىرەك راميل مۋحورياپوۆ قازاقستان حالقىنان كەشىرىم سۇراپ, ارنايى ۆيدەونى جەلىگە جۇكتەگەن.
گۇلشاحرا سانسىزباي
