بۇعان دەيىن مەملەكەت باسشىسى ەلىمىزدە 2025 جىلعا دەيىن 100 مىڭنان كەم ەمەس كولەمدە زاماناۋي يگىلىكتەردى ەركىن مەڭگەرگەن IT-مامان دايىنداۋ تۋرالى مىندەت جۇكتەگەن ەدى. Astana Hub ءىت-ستارتاپتار حالىقارالىق تەحنوپاركىنىڭ باسشىسى ماعجان ماديەۆتىڭ ايتۋىنشا, سول 100 مىڭ تالاپكەردىڭ 20 مىڭى تسيفرلىق دامۋ مينيسترلىگىنىڭ باستاماسىمەن, Astana Hub بازاسىندا ازىرلەنگەن Tech Orda باعدارلاماسىمەن وقىتىلماق. مۇندا ستۋدەنتتەر ۆەب-ازىرلەۋدى مەڭگەرىپ, Big Data, Blockchain, 3D-ديزاين جاساۋدى, باعدارلامالىق جانە اپپاراتتىق قامتاماسىز ەتۋدى, ءموبيلدى قوسىمشا جاساۋدى ۇيرەنەدى. وقۋ قازاق, ورىس جانە اعىلشىن تىلدەرىندە جۇرگىزىلەدى.
«اتالعان باعدارلاما اياسىندا مينيستر باعدات مۋسين بىلىكتى كادرلار دايارلاۋعا ماماندانعان وتاندىق جەكەمەنشىك IT-مەكتەپتەرگە قولداۋ كورسەتۋدى تاپسىردى. وقۋ ۇزاقتىعى 6 ايدان 2 جىلعا دەيىن سوزىلادى. بۇل باعدارلاما بويىنشا IT-مامانداردىڭ العاشقى تولقىنى 2023 جىلدىڭ ورتاسىندا ءبىتىرىپ شىعادى», دەيدى ول.
2021 جىلى Tech Orda باعدارلاماسىنىڭ قاناتقاقتى جوباسى 100 ستۋدەنتتى قامتىپ, ءاربىرىنىڭ 600 مىڭ تەڭگە قارجىلىق قولداۋ الۋىنا جاعداي جاسادى. 2022 جىلدىڭ قىركۇيەك ايىندا Tech Orda باعدارلاماسىنىڭ اۋقىمىن كەڭەيتۋى اياسىندا IT سالاسىندا قازاقستاندىق قىزمەتكەرلەردى دايارلاۋ ءۇشىن ۆاۋچەرلەر الۋعا جەكە IT-مەكتەپتەردەن جاڭا وتىنىمدەر قابىلدانا باستادى.
70 وتىنىمدەگى ءاربىر مەكتەپ پەن كۋرستىڭ دەرەكتەرىنە سۇيەنە وتىرىپ, تاۋەلسىز كوميسسيا IT سالاسىنىڭ ءارتۇرلى باعىتىنداعى 146 كۋرستى ۇسىناتىن 49 قاتىسۋشى مەكتەپتى تاڭدادى. ناتيجەسىندە, الگوريتمنىڭ ارنايى ازىرلەنگەن ماتەماتيكالىق مودەلى نەگىزىندە مەكتەپتەر اراسىندا 3 مىڭنان استام ۆاۋچەر تاراتىلدى.
باعدارلامانى ازىرلەۋ كەزىندە قازاقستان ايماقتارىندا IT-ءبىلىم بەرۋدى قولداۋعا ەرەكشە كوڭىل ءبولىندى. 2021 جىلمەن سالىستىرعاندا وڭىرلەردەگى IT مەكتەپتەر سانى الدەقايدا كوبەيگەن. 17 IT-مەكتەپ (35 پايىزى) وڭىرلەردە ورنالاسقان. قىزىلوردا, ورال, اقتاۋ, اقتوبە قالالارىندا 1 مەكتەپتەن بار بولسا, قاراعاندىدا – 2, شىمكەنتتە – 2, پاۆلوداردا – 3, اتىراۋدا 3 مەكتەپ بار.
سودان كەيىن مەكتەپتەر ءبىر اي ىشىندە تاڭداعان IT ماماندىعىنىڭ ەرەكشەلىگىنە جانە الەۋەتتى ۇمىتكەرلەردىڭ دايىندىق دەڭگەيىنە بايلانىستى ستۋدەنتتەردى ىرىكتەۋدىڭ بىرنەشە كەزەڭىن وتكىزدى. ۆاۋچەر العان ستۋدەنتتەرمەن تىزىمدەر نەگىزىندە Astana Hub جانە باعدارلاماعا قاتىسۋشى مەكتەپتەر اراسىندا كەلىسىمشارتتار جاسالدى. بىلتىر مەكتەپتەرگە الەۋەتتى ستۋدەنتتەردەن 16 مىڭ ءوتىنىم كەلىپ تۇسكەن. ناتيجەسىندە, 3 068 ستۋدەنت IT سالاسىن كاسىبي دامىتۋ جولىنداعى ءوز جولدارىن باستاپ كەتكەن.
قىزمەت ءتۇرى مەن ماماندىعىنا قاراماستان, 18 بەن 45 جاس ارالىعىنداعى بارلىق نيەت بىلدىرگەن قازاقستان ازاماتى Tech Orda باعدارلاماسى بويىنشا ءبىلىم الۋ مۇمكىندىگىنە يە.
