قوستاناي وبلىسى پد باستىعى ەرلان وماربەكوۆ جىل قورىتىندىسى بويىنشا جەدەل كەڭەس بارىسىندا باتىلدىق تانىتقان جانە قىزمەتتىك مىندەتتەرىن ادال اتقارعان, ەرەكشە كوزگە تۇسكەن قىزمەتكەرلەردى ماراپاتتادى.
وسىلايشا قىزدى قۇتقارعان ارقالىق قالاسى پوليتسيا باسقارماسىنىڭ قىزمەتكەرلەرى كورسەتكەن ەرلىگى ءۇشىن ماراپاتتالدى. پاترۋلدىك پوليتسيا ۆزۆودى قىزمەتىنىڭ ينسپەكتورى المات امىرحانعا «قۇقىقتىق ءتارتىپتى قامتاماسىز ەتۋگە قوسقان ۇلەسى ءۇشىن» مەدالى تابىستالدى. ونىڭ ارىپتەسى رۋسلان قاپساماتوۆقا «ىشكى ىستەر ورگانىنىڭ ۇزدىگى» توسبەلگىسى تاعىلدى. قىزمەتكەرلەردەن باسقا, ەرلان وماربەكوۆ پوليتسيا قىزمەتكەرلەرىنىڭ اتا-انالارى رۋسلان قاپساماتوۆتىڭ اناسى نۇرساۋلە دۇيسەبەكوۆا مەن المات ءامىرحانىنىڭ اكەسى ەرلان جاراسوۆقا العىسىن ءبىلدىردى. ولارعا قوستاناي وبلىسى پوليتسيا دەپارتامەنتىنىڭ العىس حاتتارى تابىستالدى.
– وسىنداي ۇلداردى تاربيەلەگەندەرىڭىز ءۇشىن شىن جۇرەكتەن سىزدەرگە العىسىمدى بىلدىرەمىن. بۇل وزگەلەرگە ۇلگى بولارلىق ءىس. سىزدەر وسىنداي شۇعىل جاعدايدا دۇرىس شەشىم قابىلداي بىلدىڭىزدەر. قىزمەتتەرىڭىزدە تابىس تىلەيمىن, – دەپ اتاپ ءوتتى دەپارتامەنت باستىعى ەرلان وماربەكوۆ.
«قازاقستان پوليتسياسىنا 30 جىل» توسبەلگىسىمەن جىتىقارا قالاسىندا قىلمىس ورنىندا ۇيالى تەلەفون ۇرىسىن ۇستاعان قىلمىستىق-اتقارۋ جۇيەسى دەپارتامەنتى قىزمەتكەرى ايدارحان ماديەۆ ماراپاتتالدى. توسبەلگىلەر جانگەلدين اۋدانى اكىمدىگىنىڭ شيەلى اۋىلدىق وكرۋگىنىڭ اكىمى ەربول دوسماعانبەتوۆكە جانە جانگەلدين اۋدانى پوليتسيا ءبولىمىنىڭ ۋچاسكەلىك ينسپەكتورى جانتورە قالەنگە اكىمشىلىك-اۋماقتىق ۋچاسكەدە قۇقىق بۇزۋشىلىقتار مەن قىلمىستاردىڭ الدىن الۋعا قوسقان ۇلەسى ءۇشىن تابىستالدى.
ەسكە سالايىق, جانگەلدين اۋدانىنىڭ ەكى اۋىلىندا الكوگول ساتۋعا تىيىم سالىنعاندىقتان, بىرنەشە جىل بويى قىلمىس تىركەلمەگەن. سونداي-اق رۋدنىي قالاسىنىڭ پوليتسيا باسقارماسى, اۋليەكول, قاراسۋ, امانگەلدى, جانگەلدين اۋداندارىنىڭ پوليتسيا بولىمدەرى «ۇزدىك پوليتسيا بولىمشەلەرى» دەگەن اتاققا يە بولدى.
