2021 جىلى ءىت مەكتەپكە 900 ورىندىق ارناۋلى عيمارات سالىندى. قازاقشا-ورىسشا وقىتاتىن وسى مەكتەپ عيماراتى بىلتىرعى وقۋ جىلىندا جىلى بولماي, ۇنەمى جۇرتشىلىقتىڭ نازارىندا بولدى. وقۋشىلار بۇرسەڭدەپ, قالىڭ كيىمدەرىن شەشە الماي وتىراتىن كەز ءجيى كەزدەسەتىن.
بيىلعى وقۋ جىلى باستالعاندا دا ايعاي-شۋ تولاستامادى. شەتكى كابينەتتەردەگى جىلىلىق 15 گرادۋستان اسپايدى, وقۋشىلار قالىڭ كيىممەن عانا جۇرۋگە ءماجبۇر دەگەن سوزدەر ءجيى ايتىلاتىن. مەكتەپ اكىمشىلىگى جانە اتا-انالار وتىنىشىمەن اكىمدىك پەن انتيكور مەردىگەردى قاراشا ايىندا جاۋاپكەرشىلىككە تارتىپ, جىلىتۋ جۇيەسىنىڭ جەتىسپەيتىن ماسەلەسىن شەشۋدى تالاپ ەتتى. جاڭا جۇيەنىڭ كىناراتىن مەردىگەرلەر تاپتى. سۋ ايدايتىن ناسوستاردىڭ جۇمىسىن دۇرىس قوسپاعان كورىنەدى. كىنارات تابىلعان سوڭ مەكتەپ ءۇيى جىلىنىپ سالا بەردى.
قازىر وقۋ كابينەتتەرى جايلى, 23-24 گرادۋستىق جىلىلىقتى كورسەتىپ تۇر. وقۋشىلاردىڭ كوڭىل كۇيلەرى دە كوتەرىڭكى. بىلتىرعىداي قالىڭ كيىمدەرمەن وتىرعان جوق, جەڭىل كيىمدەرىمەن جايناپ ءجۇر. مەكتەپ ديرەكتورى ءرازيا قاسىموۆانىڭ ايتۋىنا قاراعاندا, ءتىپتى كابينەتتەر ىسىپ, تەرەزەنى اشۋعا دا ءماجبۇر بولادى ەكەن.
بيىل سولتۇستىك قازاقستاندا جايلى قىس بولىپ تۇر. قار دا كۇرت جاۋماي بابىمەن ءتۇستى. اۋانىڭ تەمپەراتۋراسى قاڭتار ايىندا ەكى كۇن عانا قاتتى سۋىق بولدى. ودان ءارى 10-12 گرادۋستان تومەن تۇسكەن ەمەس.
پەتروپاۆل
