الداعى 10 جىلدا كۇرە جولداردى سالۋ جانە كۇتىپ ۇستاۋ ساپاسىن ارتتىرۋ جونىندە ءتيىستى شارالار قابىلداۋ جوسپارلانىپ وتىر. ولاردىڭ قاتارىندا جول جوبالارىنىڭ بارلىعىنا FIDIC حالىقارالىق ستاندارتتارىن ەنگىزۋ, تەحنيكالىق قۇجاتتامانى كەلىسۋ پروتسەسىن جەتىلدىرۋ, جوبالاۋ جانە مەردىگەرلىك ۇيىمداردىڭ جاۋاپكەرشىلىگىن ارتتىرۋ, اۆتوماتتاندىرىلعان باقىلاۋ جۇيەلەرىن بىرىڭعاي IT-جۇيەگە ينتەگراتسيالاۋ, قاجەتتى جول-پايدالانۋ تەحنيكاسى مەن جابدىقتارىن ساتىپ الۋ بار.
ناتيجەسىندە جاقسى جانە قاناعاتتانارلىق جاعدايداعى رەسپۋبليكالىق ماڭىزى بار اۆتوجولداردىڭ ۇلەسىن 100%-عا دەيىن جەتكىزۋ, سونداي-اق جەرگىلىكتى جولداردىڭ جاعدايىن جاقسارتۋ ءۇشىن وڭىرلەردى ءتيىستى جۇمىسپەن تولىق قامتۋدى جۇزەگە اسىرۋ جوسپارلانىپ جاتىر.
شىعارىندىلاردى ازايتۋ جانە ەكولوگياعا زيانى جوق كولىكتى پايدالانۋدى ىنتالاندىرۋ ماقساتىندا ەلەكترموبيلدەردى قۋاتتاۋ ستانتسيالارىنىڭ جۇيەسى داميدى.
سونىمەن قاتار ۇزدىك حالىقارالىق ستاندارتتارعا جاۋاپ بەرەتىن جانە جوعارى جىلدامدىقپەن جۇرۋگە رۇقسات ەتىلگەن جاڭا اقىلى ۋچاسكەلەردى ەنگىزۋ جالعاسادى. بۇل رەتتە كولىك قوزعالىسى نەعۇرلىم كوپ باعىتتارعا باسىمدىق بەرىلەدى. بۇل قىتايدان جانە ورتالىق ازيا ەلدەرىنەن ەۋروپاعا جۇكتەردى تاسىمالداۋ بويىنشا قازاقستاننىڭ ترانزيتتىك مۇمكىندىكتەرىن كەڭەيتۋگە مۇمكىندىك بەرەدى.
جول بويىنداعى ينفراقۇرىلىم مەن قىزمەت كورسەتۋ سالاسىن دا دامىتۋعا نازار اۋدارىلادى. بۇل باعىتتا بيزنەس جۇرگىزۋ ءۇشىن قولايلى جاعداي جاساۋ, ينۆەستورلاردى تارتۋ, قىزمەت كورسەتۋ جانە جاڭا وبەكتىلەر (دەمالۋعا ارنالعان الاڭدار, مودۋلدىك ۇلگىدەگى اباتتاندىرىلعان سانيتارلىق-گيگيەنالىق توراپتار جانە ت.ب.) سالۋ كەزىندە حالىقارالىق ستاندارتتاردى ەنگىزۋ جونىندە شارالار قابىلدانادى.
كاراۆانينگ جانە TIR-پاركينگ الاڭدارىن ورناتۋعا, سونداي-اق ينكليۋزيۆتىلىك, ەرەكشە قاجەتتىلىكتەرى بار ادامداردىڭ سۇرانىستارىن قاناعاتتاندىرۋ, انا مەن بالانى قورعاۋ ماسەلەلەرىنە ەرەكشە نازار اۋدارۋ جوسپارلانىپ وتىر.
مەملەكەت باسشىسىنىڭ تاپسىرماسىنا سايكەس «قازاۆتوجول» ۇك» اق مەن «قازاقاۆتوجول» جشس بىرلەستىگى بويىنشا جۇمىس جالعاسادى, ناتيجەسىندە رەسپۋبليكالىق ماڭىزى بار اۆتوموبيل جولدارىن باسقارۋ جونىندەگى بىرىڭعاي اۆتوجول كومپانياسى قۇرىلادى.
قازىرگى ۋاقىتتا قازاقستاندا پايدالانىلاتىن اۆتوجولدار جەلىسى 96 مىڭ شاقىرىمدى قۇرايدى, ونىڭ ىشىندە رەسپۋبليكالىق جەلى – 24,9 مىڭ شاقىرىم, جەرگىلىكتى جەلى – 71 مىڭ شاقىرىم. نورماتيۆتىك جاعدايداعى رەسپۋبليكالىق ماڭىزى بار جولداردىڭ ۇلەسى – 90% (22,5 مىڭ كم). رەسپۋبليكالىق ماڭىزى بار اۆتوجولداردىڭ جالپى ۇزىندىعىنىڭ 12 786 شاقىرىمى (52%) – جاقسى جاعدايدا, 9 564 شاقىرىمى (38%) – قاناعاتتانارلىق جاعدايدا جانە 2 584 شاقىرىم جولدىڭ (10%) ساپاسى ناشار.
