«وڭتۇستىك» اكك ارقىلى قاناتقاقتى جوبا شەڭبەرىندە جەڭىلدەتىلگەن كرەديتتەۋدىڭ ارقاسىندا 2021-2022 جىلدار ىشىندە وڭىردە 35 جوبا ىسكە قوسىلدى – 21 ءسۇت فەرماسى, 4 قوي فەرماسى, 3 قۇس فابريكاسى, 1 شوشقا كەشەنى, 1 مايلى داقىلداردى قايتا وڭدەۋ كاسىپورنى, 2 جىلىجاي جانە 3 جەردى سۋارۋ جوباسى. كاسىپكەرلەرگە كەزەڭ-كەزەڭىمەن جىلدىق 4% نومينالدى سىياقى مولشەرلەمەسىمەن 8 جىلعا دەيىنگى مەرزىمگە 35 ملرد تەڭگە ءبولىندى. باستالعان اۋىل شارۋاشىلىعى جوبالارىنىڭ اۋقىمىن تۇسىنەتىن بولساق, 2020 جىلعا دەيىن بۇكىل رەسپۋبليكا بويىنشا جىل سايىن ورتا ەسەپپەن 2-3 تاۋارلى ءسۇت فەرماسى سالىنعان. ال بۇگىندە سالىنعان ءسۇت فەرمالارى ارقىلى سولتۇستىك قازاقستان وبلىسىندا شامامەن 584 مىڭ توننا نەمەسە ەل بويىنشا بارلىق ءسۇتتىڭ 10,5%-ى وندىرىلەدى. بۇل رەتتە 584 مىڭ توننا ءسۇتتىڭ 208 مىڭ تونناسىن ءوڭىردىڭ ۇيىمداسقان شارۋاشىلىقتارى وندىرەدى. بۇل رەسپۋبليكانىڭ جالپى كولەمىنىڭ 15%-عا جۋىعى, ەل بويىنشا 1-ورىن.
سولتۇستىك قازاقستان وبلىسى قاناتقاقتى جوباسىنىڭ وڭ تاجىريبەسىن نازارعا الا وتىرىپ, اۋىل شارۋاشىلىعى مينيسترلىگى بۇكىل ەل بويىنشا تاجىريبەنى ودان دا تارتىمدى جاعدايلارعا دەيىن كەڭەيتۋدى ۇسىندى. ويتكەنى اۋىل شارۋاشىلىعى ۆيتسە-ءمينيسترى جەڭىس وسەرباي بيزنەس-تاڭعى استا اتاپ وتكەندەي, بۇگىنگى تاڭدا مەملەكەتتىڭ نەگىزگى مىندەتى – يمپورتتى الماستىرۋدى قامتاماسىز ەتۋ جانە ەلدىڭ قۇس ەتى, ءسۇت, كوكونىستەرگە دەگەن قاجەتتىلىگىن ساپالى ونىمدەردىڭ ىشكى وندىرىسىمەن جابۋ. بۇدان باسقا, اۋىلدا ينۆەستيتسيالىق جوبالاردى ىسكە اسىرۋدىڭ وڭ اسەرى جاڭا جۇمىس ورىندارىن قۇرۋ بولماق.
بۇگىندە وڭىرلەردىڭ اكىمدىكتەرى الەۋەتتى ينۆەستورلاردى ىرىكتەۋدە. كەيىننەن مەملەكەتتىك ورگاندار, «اتامەكەن» ۇكپ جانە بيزنەس وكىلدەرىنەن جۇمىس توپتارى قۇرىلاتىن بولادى, ولار ينۆەستيتسيالىق جوبالاردى تاڭداپ, ولاردىڭ ىسكە اسىرىلۋىن قاداعالايتىن بولادى. تالاپتار وتە جوعارى: مەنشىكتى وندىرىستىك جانە ازىق-ت ۇلىك بازاسىنىڭ بولۋى, قارجىلىق تۇراقتىلىق, دامىعان ءوندىرىس جانە باسقالار. ءوز تاراپىنان جەڭىلدىكتى كرەديتتەۋ باعدارلاماسىنا قاتىسۋشىلار وندىرىلەتىن ءونىمدى وتكىزۋ باعاسى بويىنشا قارسى مىندەتتەمەلەردى وزىنە الادى.
«وسى باعدارلامادان ءبىز 100% قايتارىمدى, بارلىق قاتىسۋشى جوبالاردى تابىستى ىسكە اسىرۋدى كۇتەمىز. قاتىسۋ ءۇشىن ءىرى بيزنەستى تارتامىز, جوبالار 1-2 جىل ىشىندە ناتيجە بەرۋگە ءتيىس. مەملەكەت ءوز تاراپىنان قارجى الۋدىڭ قاراپايىم جانە كۇردەلى ەمەس ءادىسىن, قايتارۋ مەرزىمىن ۇزارتۋدى جانە تومەن پايىزدىق مولشەرلەمەنى ۇسىنادى. سونىمەن بىرگە ءوزارا مىندەتتەمەلەر بويىنشا ءبىز كوتەرمە جانە بولشەك ساۋدا دەڭگەيىندە ونىمدەردىڭ تۇراقتى باعاسىن كۇتەمىز», دەدى س.جۇمانعارين.
