جيىنعا قازاقستاندا قايىرىمدىلىقپەن اينالىساتىن ۇەۇ, قوردان كومەك العان بالالار مەن ەرەسەكتەر, «سامۇرىق-قازىنا» قورى توبىنىڭ قىزمەتكەرلەرى مەن كومپانيالارىنىڭ باسشىلارى, باق وكىلدەرى جانە قوعام بەلسەندىلەرى قاتىستى.
وتكەن جىلى «سامۇرىق-قازىنا» كومپانيالار توبى قايىرىمدىلىققا جۇمسالاتىن بيۋدجەتتى 40%-عا, ياعني 10 ملرد تەڭگەگە دەيىن ۇلعايتىپ, بالالار مەن قازاقستان ايماقتارىن قولداۋعا باسا نازار اۋداردى. ءبىر جىل ىشىندە 43 الەۋمەتتىك جوبا جۇزەگە اسىرىلىپ, 500 مىڭعا جۋىق ازامات قاجەتتى كومەك العان.
تىڭ باستامالاردىڭ قاتارىندا وڭىرلەردەگى 80 000-نان ازاماتقا كومەك كورسەتكەن مەديتسينا پويىزدارى; رەسپۋبليكامىزدىڭ 15 قالاسىندا تۇراتىن ەرەكشە بالالارعا بەيىمدەلگەن سپورتپەن اينالىسۋعا مۇمكىندىك بەرەتىن «سالاماتتى بولاشاق»; شىمكەنت, قاراعاندى, تالدىقورعان, اقتاۋ, وسكەمەن جانە ورال قالالارىنداعى پەرزەنتحانالاردى ءسابي ءومىرىن ساقتاۋعا ارنالعان گيپوتەرميالىق قۇرىلعىلارمەن قامتاماسىز ەتۋ جوبالارى بار.
«سامۇرىق-قازىنا» قورىنىڭ باسقارۋشى ديرەكتورى عيبرات اۋعانوۆتىڭ ايتۋىنشا, قور قايىرىمدىلىققا جۇمسالاتىن قارجىنى ودان ءارى ارتتىرۋدى كوزدەپ وتىر. دالىرەك ايتقاندا, «سامۇرىق-قازىنا» قورى تازا تابىسىنىڭ 7%-ىن «قازاقستان حالقىنا» الەۋمەتتىك قورىنا اۋدارادى. الدىن الا بولجام بويىنشا, بۇل شامامەن 130 ميلليارد تەڭگەنى قۇرايدى. وسىلايشا «سامۇرىق-قازىنا» كومپانيالار توبىنىڭ قايىرىمدىلىققا جۇمسايتىن شىعىنى 13 ەسە ارتادى.
ايتا كەتسەك, ەسەپ بەرۋ كەزدەسۋىنىڭ الدىندا پانەلدىك سەسسيا ءوتتى. وندا قازاقستاننىڭ قايىرىمدىلىقپەن اينالىساتىن ءىرى ۇەۇ وكىلدەرى ءسوز سويلەدى. ولار وبلىستىق جانە رەسپۋبليكالىق دەڭگەيدە جۇمىس ىستەۋ تاجىريبەسىمەن ءبولىسىپ, قايىرىمدىلىق سالاسىنداعى كەيىنگى جاڭالىقتاردى زەردەلەدى.
وتىرىس بارىسىندا قاتىسۋشىلار «سامۇرىق-قازىناعا» كورسەتكەن كومەگى ءۇشىن العىسىن ءبىلدىرىپ, بولاشاققا ۇلكەن جوسپارلارى بار ەكەنىن حابارلادى. ەنشىلەس كومپانيالاردىڭ وكىلدەرى الداعى ۋاقىتتا دا ازاماتتاردىڭ يگىلىگى ءۇشىن بىرلەسكەن جۇمىستى جالعاستىرۋعا دايىن ەكەنىن جەتكىزدى.
جيىن سوڭىندا «استانا وپەرا» تەاترىنىڭ كامەرالىق زالىنىڭ ساحناسىندا 2022 جىلى كومەك العان 30-عا جۋىق ەرەكشە بالا ونەر كورسەتتى. ولاردىڭ اراسىندا «زامانداس» جانە «قامقورلىق» جوبالارىنىڭ قاتىسۋشىلار دا بار. العاشقىسىندا ەلورداداعى از قامتىلعان وتباسىلاردىڭ بالالارىنا تەگىن ۇيىرمەلەر ۇيىمداستىرىلسا, «قامقورلىق» جوباسى ارقىلى ەل ايماقتارىندا ەرەكشە بالالارعا ارنالعان وڭالتۋ ورتالىقتارى اشىلىپ كەلەدى.
