كۇدىكتى رەتىندە ۇستالعان ادام – بۇرىن سوتتى بولماعان 29 جاستاعى ايەل. كەلىنشەك استانا قالاسىنان وبلىس اۋماعىندا ساتۋ ءۇشىن جاساندى ەسىرتكى اكەلگەن كەزدە ۇستالدى. سارعىش ءتۇستى 20 تۇيىنشەككە سالىنعان اق ۇنتاق سينتەتيكالىق ەسىرتكى بولىپ شىقتى. كۇدىكتىنىڭ تۇرعىلىقتى جەرىن تەكسەرۋ بارىسىندا تاعى دا سونداي ۇنتاقتار تابىلعان. ولاردى ۇساقتاپ, بولەكتەپ سالىپ قوياتىن جىلتىر قاعازدار, ەلەكتروندىق تارازىلار دا تابىلدى. α-PvP فورمۋلاسىمەن بەلگىلەنەتىن بۇل سينتەتيكالىق ەسىرتكى قىلمىس الەمىندە «تۇز» دەپ اتالادى. تابىلعان بارلىق ەسىرتكىنىڭ سالماعى – 1 كگ 113 گرامم. بۇل جۇزدەگەن ادامدى ەسىنەن ايىرۋعا جەتەتىن زياندى زات.
قىلمىسكەردىڭ اكەسى دە كۇدىككە ىلىگىپ, ونىڭ ءۇيى مەن گاراجىنا ءتىنتۋ جۇرگىزىلگەن. ءتىنتۋ كەزىندە 51 جاستاعى ەر ازاماتتىڭ گاراجىنان پپش اۆتوماتىنىڭ مۋلياجى, يج-ك تەگىس ۇڭعىلى اڭشى مىلتىعى, «يج-38» پنەۆماتيكالىق ۆينتوۆكاسى, «Perfecta» گاز تاپانشاسى, ەكى مىڭنان استام قۇرىلىس-مونتاج وق-دارىلەرى مەن باسقا دا وق-ءدارى, «ف-1» وقۋ-جاتتىعۋ گراناتاسى شىقتى. ەشقايدا تىركەلمەگەن وسىنشا قارۋ-جاراقتى ادامنىڭ كىمنەن قورعانۋ ءۇشىن جيناعانى ازىرگە بەلگىسىز. ساراپشىلار ونىڭ ءبارى دە اتۋعا قاۋقارلى ەكەنىن دالەلدەدى. قازىر ساراپشىلار بۇل قارۋلاردىڭ قىلمىس الەمىندە بۇرىن قولدانعان-قولدانىلماعانىن زەرتتەپ جاتىر.
وبلىستىق پد باستىعىنىڭ ورىنباسارى رۋسلان نازاروۆتىڭ ايتۋىنشا, كۇدىكتىنىڭ ەسىرتكىنى ساتىپ, تاراتۋ ءۇشىن باسقا جەردەن العانى, تاسىمالداعانى جانە ساقتاعانى قىلمىستىق كودەكستىڭ 297-بابىنا سايكەس سوتقا دەيىنگى تەرگەۋدىڭ بىرىڭعاي تىزىلىمىنە ەنگىزىلگەن. «پوليتسيا قىزمەتكەرلەرى ەسىرتكىنى جەتكىزۋ ارنالارىنىڭ جولىن كەسۋ, ساتۋ فاكتىلەرىن جويۋ بويىنشا جۇمىس جۇرگىزىپ جاتىر. وتكەن جىلى ەسىرتكىگە قاتىستى قىلمىستارى ءۇشىن 123 ادام جاۋاپكەرشىلىككە تارتىلسا, ونىڭ 35-ءى ەسىرتكى ساتقانى ءۇشىن جازالاندى. زاڭسىز اينالىمنان 415 كيلودان استام پسيحبەلسەندى زاتتار الىندى», دەدى ول.
پەتروپاۆل
