«بۇگىن ساعات 14.31-دە الماتى قالاسى تجد 101 پۋلتىنە الماتى قالاسى المالى اۋدانى, اباي داڭعىلى, 89 مەكەنجايىنداعى 4 قاباتتى تۇرعىن ۇيدە ءورت شىققانى تۋرالى حابارلاما ءتۇستى. ءورت ءۇيدىڭ 1 جانە 2 قاباتتارىندا ورنالاسقان 2 قاباتتى دامحاناعا جاپسارلاس سالىنعان ءۇي-جايدا, كەيىن 3 قاباتتى پاتەرگە جانە ءۇيدىڭ ءىشىنارا شاتىرىنا وتكەن. العاشقى ءورت ءسوندىرۋ بولىمشەلەرى شاقىرۋ ورنىنا 14.34-تە (3 مينۋت) باردى», دەلىنگەن الماتى قالاسى تجد ءباسپاسوز قىزمەتى تاراتقان حابارلامادا.
ءورت ساعات 16.31-دە جويىلعان. ۋاقىتىلى جۇرگىزىلگەن ەۆاكۋاتسيالاۋ ءىس-شارالارىنىڭ ارقاسىندا ءۇي تۇرعىندارى مەن قوناقتارى اراسىندا زارداپ شەككەندەر جوق.
ءورتتىڭ جالپى اۋدانى - 310 شارشى مەتر. تجد كۇشىمەن ءسوندىرۋ بارىسىندا 2 ادام قۇتقارىلىپ, 60 ادام ەۆاكۋاتسيالانعان. قابىلدانعان شارالاردىڭ ارقاسىندا شاتىردىڭ ەداۋىر بولىگى, ءۇيدىڭ ءوزى, كوممەرتسيالىق الاڭدار ورتتەن امان قالعان.
ەۆاكۋاتسيالانعان بارلىق تۇرعىندارعا جىلىنۋ ءۇشىن اۆتوبۋستار بەرىلگەن. ءورتتىڭ سەبەبى انىقتالىپ جاتىر.
