ۇلتتىق ەكونوميكا ءمينيسترى الىبەك قۋانتىروۆ 2022 جىلدىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيالار كولەمى شامامەن 15 ترلن تەڭگە بولعانىن مالىمدەدى. بۇل – جوسپاردىڭ 94%-ى. ءمينيستردىڭ ايتۋىنشا, قازىرگى ۋاقىتتا ينۆەستورلار سىرتقى ەكونوميكالىق جاعدايدى باقىلاپ, اڭىسىن اڭداپ وتىرعانىنا قاراماستان, ينۆەستيتسيالىق بەلسەندىلىك بىرتىندەپ قالپىنا كەلڭپ جاتىر. بۇل رەتتە رەسپۋبليكانىڭ شيكىزاتتىق ەمەس سەكتورىنا سالىنعان تىكەلەي شەتەلدىك ينۆەستيتسيالار كولەمى ءوسىپ كەلەدى.
ينۆەستيتسيالىق احۋالدى ودان ءارى جاقسارتۋ ماقساتىندا بىرقاتار كەشەندى شارانى ىسكە اسىرۋ ۇسىنىلىپ وتىر. اتاپ ايتقاندا, مەملەكەتتىك پرەفەرەنتسيالار الۋ ءۇشىن ورگانداردىڭ وتىنىمدەرىن كەلىسۋ مەرزىمىن قىسقارتۋ جانە مەملەكەتتىك قولداۋ شارالارىنا يە بولۋ ءۇشىن ينۆەستيتسيالاردىڭ شەكتى كولەمىن ازايتۋ ۇسىنىلدى.
پرەمەر-مينيستر بۇل تاسىلدەردى قولداپ, ارتىقشىلىقتار بەرىلەتىن قىزمەتتەردىڭ باسىم باعىتتارىنىڭ تىزبەسىن مۇقيات پىسىقتاپ, جاڭا ەرەجەلەردى بەكىتۋ كەزىندە بارلىق وڭىرلىك ەرەكشەلىكتەردى ەسكەرۋ قاجەتتىگىن اتاپ ءوتتى.
سونىمەن قاتار وتىرىستا ينۆەستيتسيالار تۋرالى كەلىسىم بەكىتۋ تەتىگىن جەتىلدىرۋ, وڭىرلەردىڭ ينۆەستيتسيالىق رەيتينگىن ەنگىزۋ جانە قولدانىستاعى زاڭدار مەن كودەكستەردە كوزدەلگەن مەملەكەتتىك قولداۋ شارالارىن ىسكە اسىرۋدى جانداندىرۋعا مۇمكىندىك بەرەتىن ينۆەستورلار ءۇشىن ارنايى نقا ازىرلەۋ ماسەلەلەرى تالقىلاندى.
وتىرىس قورىتىندىسى بويىنشا پرەمەر-مينيستر رەسپۋبليكانىڭ ينۆەستيتسيالىق احۋالىن جاقسارتۋ جونىندە قوسىمشا ۇسىنىستار ازىرلەۋدى تاپسىردى. بۇل رەتتە ۇكىمەت باسشىسى زاڭنىڭ ۇستەمدىگىن قامتاماسىز ەتۋ, ياعني قۇقىق قورعاۋ جانە باقىلاۋشى ورگاندار تاراپىنان بيزنەسكە قىسىمدى تومەندەتۋ جونىندەگى شارالارعا باسا نازار اۋدارۋ قاجەتتىگىن اتاپ ءوتتى.
«بيزنەسكە قاتىستى قىلمىستىق ىستەردى قوزعاۋعا تۇرتكى بولاتىن نەگىزسىز سەبەپتەردى الىپ تاستاۋ ءۇشىن قىلمىستىق ءىس جۇرگىزۋ كودەكسىن قايتا قاراۋ قاجەت. ادىلەت مينيسترلىگىنە ءتيىستى تاپسىرما بەرىلدى, بۇل جۇمىستى كۇشەيتىپ, اتالعان ماسەلەنى جان-جاقتى قاراستىرۋ كەرەك. كاسىپكەرلەر تاپ بولىپ وتىرعان شىنايى پروبلەمالارعا تەرەڭىرەك ءۇڭىلىپ, جىلدام ءارى ناقتى ناتيجە بەرەتىن ءتيىمدى شارالاردى ازىرلەۋ قاجەت», دەدى ءاليحان سمايىلوۆ.
