ەلەس قىزدار جايلى كونە ميستيكالىق اڭىز جەلىسىمەن جازىلعان «جيزەل» – كوپشىلىككە تانىمال بالەت. ەڭ العاش 1841 جىلى 28 ماۋسىمدا پاريجدەگى Grand Opera ساحناسىندا قويىلىپ ەدى. وسى كۇننەن سوڭ كومپوزيتور ا.اداننىڭ ەسىمى جاڭاشا تانىلا باستادى. ماحاببات, كىنا, شىنايى كەشىرىم مەن ءوزىن-ءوزى قۇربان ەتۋ سەكىلدى ماڭگىلىك تاقىرىپتارعا قۇرىلعان شىعارما بەيمالىم قيال-عاجايىپ الەممەن استاسىپ جاتىر.
– شىن ماحاببات قانا ءبارىن جەڭە الادى. ساحناعا جيزەل پارتياسىن ورىنداۋعا ءار كەز زور تولعانىسپەن شىعامىن. بۇل بالەت وزىمە قاتتى ۇنايدى, باستان كەشىرەتىن ەموتسيالارىم دا ءارتۇرلى. جەڭىل پارتيا دەپ ايتا المايمىن, تەحنيكالىق تۇرعىدا كۇردەلى ءارى بۇل درامالىق بالەتتە بەينەنىڭ ەموتسيونالدىق قانىقتىعىن تۇگەل جەتكىزۋ ماڭىزدى. سونداي-اق مۇنىڭ دياس ءۇشىن دە, مەن ءۇشىن دە بالەتتەگى جەتەكشى پارتيالاردى باسقا ترۋپپامەن ورىنداۋدا العاشقى تاجىريبە بولاتىنى بىزگە ايرىقشا جاۋاپكەرشىلىك جۇكتەيدى, – دەيدى اناستاسيا زاكلينسكايا.
ال دياس قۇرمانعازى شىعارمانى جەتكىزۋدەگى اسەرىن ايتتى. «ماعان جيزەل مەن البەرتتىڭ دۋەتىندەگى تەرەڭ ۋايىم, نازىكتىك پەن كەشىرىمدى جەتكىزۋ ماڭىزدى بولدى. پارتيالاردىڭ جەڭىلى بولمايدى, بارلىعىنىڭ وزىندىك تەحنيكالىق, اكتەرلىك تۇرعىدا قيىندىقتارى بار. الايدا ءبىزدىڭ باستى ماقساتىمىز – بەلارۋس قاۋىمىنا زور ەموتسيا سىيلاۋ», دەدى ول.
قازاقستان ارتىستەرى «جيزەل» بالەتىنىڭ جاڭا رەداكتسياسىندا ونەر كورسەتەدى, ونىڭ پرەمەراسى بەلارۋستە بىلتىر 28 قىركۇيەكتە وتكەن بولاتىن.
