سۋرەتتى تۇسىرگەن جۇماباي مۇسابەكوۆ
اتالعان سالتاناتتى جيىننىڭ تىزگىنىن وبلىستىق «Jetisy» گازەتى باس رەداكتورىنىڭ ورىنباسارى, اقىن جۇماتاي امىرە ۇستادى.
«قازاق ادەبيەتى مەن مادەنيەتىندە ورنى بولەك كەشەگى ماعجان, ءىلياس, مۇحتار باستاعان ۇلى كوشتىڭ ءبارى دە گازەت ارقىلى تانىلىپ, ەسىمى تاريحتا قالدى. ودان كەيىنگى سان بۋىندى تاربيەلەۋدە دە باسىلىمداردىڭ ورنى ەرەكشە, بەدەلى بيىك بولدى. مىنە, بۇگىندە سول ءداستۇردى انداس اۋلەتى جالعاستىرىپ, وبلىستىڭ اۋدان, قالاسىنان 8-10-سىنىپ ارالىعىندا وقيتىن 30 وقۋشىنى «وقۋعا قۇشتار مەكتەپ» جوباسى اياسىندا گازەتكە جازدىرىپ, دەمەۋشىلىك تانىتىپ وتىر. ارينە, بىلىمگە, عىلىمعا, رۋحانياتقا جاسالعان دەمەۋشىلىكتىڭ باعاسى ۇستەم بولاتىنى انىق», دەدى ج.امىرە.
«وقۋعا قۇشتار مەكتەپ» جوباسى پرەزيدەنت قاسىم-جومارت توقاەۆتىڭ ۇلىتاۋدا وتكەن ۇلتتىق كەڭەستە بەرگەن تاپسىرماسى اياسىندا جۇزەگە اسۋدا. وبلىستىق ءبىلىم باسقارماسىنىڭ باس مامانى رۋسلان ارسىلانوۆ اتالعان جوبا اياسىندا وڭىرىمىزدە قانداي شارالاردىڭ اتقارىلىپ, نەندەي جەتىستىكتەرگە جەتكەنى تۋرالى بايانداسا, «كازپوشتا» اق الماتى وبلىستىق فيليالىنىڭ جەتەكشىسى ايبول تاڭجاربەك وقۋشىلارعا پوشتاعا جازىلعان تۇبىرتەگىن تابىس ەتتى.
كەلەسى كەزەكتە انداس اۋلەتىنىڭ وتاناسى, «پاراسات» وردەنىنىڭ يەگەرى, «التىن القالى» انا اۋەسحان ماجايقىزى بالالاردىڭ بولاشاعىنا ساتتىلىك تىلەسە, وسى اۋلەتتىڭ ۇلى, ارىپتەسىمىز قاجەت انداس اۋلەت قۇندىلىعى تۋرالى ايتا كەلىپ, تاريحشى, ايتىس جانە جازبا اقىن انداس وماراقىننىڭ «تاريح تالعارىندا», «دودا», «جىلدار ءىزى» اتتى 3 تومدىق ەڭبەگىن تانىستىرىپ, وقۋشىلارعا سىيعا بەردى. سونداي-اق وبلىستىق ءبىلىم باسقارماسى مەن انداس اۋلەتى بىرلەسە وتىرىپ, الداعى جارتى جىلدا «وقۋعا قۇشتار مەكتەپ» جوباسى نەگىزىندە جۇرگىزىلەتىن «انداس وماراقىن وقۋلارىنىڭ» ەرەجەسىمەن تانىستىردى.
«جاڭا باستاما بۇگىنگى شاراعا قاتىسقان 30 وقۋشىنىڭ اراسىندا, العاشقى جارتى جىلدىقتا سىناق رەتىندە وتەدى. ول «تاريح تالعارىندا» جاس ولكەتا نۋشىلاردىڭ عىلىمي جۇمىستارى بايقاۋى, «دودا» اتتى جاس اقىندار ايتىسى جانە «جىلدار ءىزى» اتتى جاس شايىرلار ءمۇشايراسى سياقتى ءۇش باعىتتا جۇرگىزىلەدى. ءار اتالىمعا دايىندالعان وقۋشىلار ەڭبەگىندە انداس وماراقىن شىعارماشىلىعىن ۇلگى ەتۋى كەرەك. I, II, III دارەجەلى ورىن العان ۇمىتكەرگە وبلىستىق ءبىلىم باسقارماسىنىڭ العىسحاتى مەن انداس وتباسى اتىنان قوماقتى اقشالاي جۇلدە تاعايىندالادى. ءۇش اتالىم بويىنشا ءى ورىن العان وقۋشىلار وقيتىن مەكتەپكە وبلىستىق ءبىلىم باسقارماسىنىڭ «وقۋعا قۇشتار مەكتەپ» اتتى كوشپەلى تۋى تاپسىرىلادى», دەدى ق.انداس.
كەلەسى كەزەكتە ءار وڭىردەن كەلگەن وقۋشىلار ءوز ونەرلەرىن كورسەتىپ, ولەڭ وقىپ, ايتىسىپ, شارانىڭ شىرايى اشىلا ءتۇستى.
جەتىسۋ وبلىسى
