جالپى, قازاقستاننىڭ سپورتشىلارى قىسقى ۋنيۆەرسياداعا 1993 جىلدان بەرى ۇزدىكسىز قاتىسىپ كەلەدى. پولشانىڭ زاكوپانە قالاسىندا وتكەن العاشقى جارىسىندا جەرلەستەرىمىز جالقى كۇمىسكە قول جەتكىزگەن ەدى. ونى وسكەمەننىڭ «تورپەدو» كلۋبى ويىنشىلارىنان عانا جاساقتالعان حوككەيشىلەر قۇراماسى جەڭىپ الدى. جارىس بارىسىندا بارلىق قارسىلاسىن سىپىرا ۇتقان ولەگ دومراچەۆتىڭ شاكىرتتەرى فينالدا رەسەي قۇراماسىنا ەسە جىبەرگەنى ەسىمىزدە.
1995 جىلى يسپانيانىڭ حاكاسىندا شايبالى حوككەيشىلەرىمىز قارسىلاس شاق كەلتىرمەدى. بۇل جولى ولار رەسەيلىكتەردىڭ ءوزىن سان سوقتىرىپ كەتتى. مانەرلەپ سىرعاناۋشىلار سايىسىندا مارينا حالتۋرينا مەن اندرەي كريۋكوۆ الدارىنا جان سالماسا, دميتري كازارلىگا مەن ەليزاۆەتا ستەكولنيكوۆا قولاعا قول سوزدى. ولار جۇپتىق سايىستاردا ونەر كورسەتتى. ياعني پيرەنەي تۇبەگىندە وتانداستارىمىز 2 التىن مەن 1 قولانى يەلەندى.
1997 جىلى مۋدجۋ (وڭتۇستىك كورەيا), 1999 جىلى پوپراد (سلوۆاكيا) جانە 2011 جىلى زاكوپانەدەن (پولشا) قورجىنىمىز بوس قايتتى. ەسەسىنە ودان كەيىنگى ءۇش ءدۇبىرلى دودادا ستۋدەنتتەرىمىز كەرەمەت كورسەتكىشكە قول جەتكىزدى. اتاپ ايتساق, 2003 جىلى يتاليانىڭ تارۆيزيوسىندا التى جۇلدەنى قورجىنعا سالدىق. اپەننين تۇبەگىندە نيكولاي چەبوتكو مەن سۆەتلانا مالاحوۆا التىن السا, وكسانا ياتسكايا مەن اندرەي گولوۆكو كۇمىسپەن كۇپتەلدى. سونداي-اق داريا ستاروستينا ەستافتا مەن جەكەلەي باسەكەدە قولا مەدال ەنشىلەدى. بۇل سپورتشىلاردىڭ بارلىعى دا – شاڭعىشىلار.
2005 جىلى اۋستريانىڭ ينسبۋرگىندە تابىسىمىز تىپتەن كەرەمەت بولدى. ول كەزدە وتانداستارىمىز 4 التىن, 1 كۇمىس جانە 2 قولانى ولجالادى. بۇل جۇلدەلەردىڭ بارلىعى دا شاڭعىشىلاردىڭ ەنشىسىندە. تارقاتىپ ايتساق, ە.كوشەۆايا, س.مالاحوۆا, ا.گولوۆكو, ن.چەبوتكو, م.ودنودۆورتسەۆ, ە.كوشەۆوي, و.ياتسكايا, ە.كولومينا, س.مالاحوۆا – ءبىرىنشى, ن. چەبوتكو – ەكىنشى جانە ە.كولومينا مەن م.ودنودۆورتسەۆ ءۇشىنشى ورىنداردى يەمدەندى. 2007 جىلى يتاليانىڭ تۋرينىندە 2 التىن, 1 كۇمىس جانە 2 قولانى قانجىعاعا بايلادىق. جەڭىس تۇعىرىنا كوتەرىلگەن جەرلەستەرىمىزدىڭ دەنى جوعارىدا ەسىمدەرى اتالعان شاڭعىشىلار مەن شايبالى حوككەيشىلەر كومانداسى ەدى.
2009 جىلى حاربيننەن (قىتاي) قۇرالاقان ورالساق, 2011 جىلى ەرزۋرۋمدە (تۇركيا) التى جۇلدە الدىق. انادولى ەلىندە داريا رىبالوۆا (بياتلون) التىننان القا تاقسا, د.مويسەەۆ (فريستايل), گ.ماتۆيەنكو (شاڭعى), د. ۆولوتكو (شاڭعى), ا.وسيپوۆ (شاڭعى) جانە ەستافەتاعا قاتىسقان سپورتشىلارىمىز قولا مەدالدى مويىندارىندا جارقىراتتى. 2013 جىلى ترەنتينودا (يتاليا) 2 التىن, 2 كۇمىس جانە 1 قولا بۇيىردى. بۇل جۇلدەلەردىڭ تورتەۋىن شاڭعىشىلار جەڭىپ السا, تاعى بىرەۋىن حوككەيشىلەر ەنشىلەدى.
2015 جىلى يسپانيانىڭ گراناداسى مەن سلوۆاكيانىڭ شتربسكە پلەسو قالالارىندا جالاۋى جەلبىرەگەن جارىستا قازاقستان قۇراماسى ءوز تاريحىندا تۇڭعىش رەت جالپىكوماندالىق ەسەپتە ۇزدىك ۇشتىكتىڭ قاتارىنان كورىندى. بۇعان دەيىنگى ەڭ جاقسى كورسەتكىشىمىز 2005 جىلى ينسبۋركتەگى جەتىنشى ورىن ەدى. ال بۇل جولى 5 التىن جانە 6 كۇمىس ولجالادى. بارلىعى – 11 جۇلدە. اناستاسيا سلونوۆا (شاڭعى) ەكى مارتە التىن تۇعىرعا كوتەرىلسە, يۋليا گالىشەۆا (فريستايل), پاۆەل كولماكوۆ (فريستايل) جانە الينا رايكوۆا (بياتلون) ءبىر-ءبىر رەتتەن ءدال سونداي قۇرمەتكە بولەندى. ا.سلونوۆا, ا.لانچاكوۆا (شاڭعى), د.رەيحەرد (فريستايل) جانە شايبالى حوككەيشىلەر, شاڭعىشىلار, بياتلونشىلار قۇراماسى كۇمىسپەن كۇپتەلدى.
2017 جىلعى ححVIII قىسقى دۇنيەجۇزىلىك ۋنيۆەرسيادانىڭ الاۋى الماتىدا تۇتاندى. قازاقستان تاراپىنان وسىنداي مارتەبەلى جارىستى اسا جوعارى دەڭگەيدە وتكىزۋ ءۇشىن قىرۋار جۇمىس اتقارىلدى. الاتاۋ باۋرايىندا جارىس جولىنا 56 مەملەكەتتەن كەلگەن 1 604 ستۋدەنت شىقتى. ولار 12 سپورت ءتۇرى بويىنشا 85 جۇلدە جيىنتىعىن ساراپقا سالدى. باق سىناۋشىلار قاتارىندا وليمپيا ويىندارى مەن الەم چەمپيوناتتارىندا اتوي سالعان ساڭلاق سپورتشىلاردىڭ دا قاتارى قالىڭ بولدى. جالپى ەسەپتە رەسەي قۇراماسى (29 التىن+27 كۇمىس جانە 15 قولا) الدىنا جان سالمادى. قازاقستاننىڭ ورەندەرى (11+8+17) ەكىنشى ورىندى ولجالادى. وڭتۇستىك كورەيا (11+8+17) ءۇشىنشى ساتىعا تابان تىرەدى. سونداي-اق ۇزدىك بەستىكتىڭ قاتارىنا جاپونيا (6+12+10) مەن پولشانىڭ (5+2+5) وكىلدەرى ەندى.
قازاقستان قۇراما كومانداسى ساپىندا بياتلونشى گالينا ۆيشنەۆسكايا, فريستايلشى يۋليا گالىشەۆا مەن دميتري رەيحەرد مول ولجاعا كەنەلدى. ولاردىڭ ارقايسىسى ەكى التىننان ولجالادى. الينا رايكوۆا (بياتلون), يۆان ليۋفت, اننا شەۆچەنكو مەن ولجاس كليمين (شاڭعى), دەنيس تەن (مانەرلەپ سىرعاناۋ), جانبوتا الدابەرگەنوۆا مەن باعلان ىڭكاربەك (اكروباتيكا) سىندى سايىپقىراندارىمىز ءبىر-ءبىر رەتتەن قازاق ەلىنىڭ ءانۇرانىن شىرقاتتى.
2019 جىلعى ۋنيۆەرسيادانى رەسەيدىڭ كراسنويارسك قالاسى قابىلدادى. بۇل جارىستى جەرلەستەرىمىز 4 كۇمىس جانە 3 قولامەن قورىتىندىلادى. اسەت دۇيسەنوۆ (شاڭعى), پاۆەل كولماكوۆ (فريستايل), ەليزابەت تۇرسىنباەۆا (مانەرلەپ سىرعاناۋ) جانە شاڭعىدان قازاقستان قۇراماسى ەستافەتالىق سايىستا ەكىنشى ورىندى ەنشىلەسە, جانبوتا الدابەرگەنوۆا مەن شورت-ترەكتەن ەلىمىزدىڭ ەرلەر جانە ايەلدەر كومانداسى ءۇشىنشى ساتىعا جايعاستى. 2021 جىلى شۆەيتساريانىڭ ليۋتسەرنىندەگى دودا جەر-جاھاندى جايلاعان كوروناۆيرۋس دەرتىنىڭ سالدارىنان وتپەي قالدى.
مىنە, قىسقاشا بايانداساق, قازاقستاننىڭ ستۋدەنت سپورتشىلارىنا قاتىستى قىسقى دۇنيەجۇزىلىك ۋنيۆەرسيادانىڭ تاريحى وسىنداي.
