«جاستار رۋحى» جاستار قاناتىنىڭ ورتالىق جانە ايماقتىق بەلسەندىلەرى كۇن سايىن قارتتاردىڭ اۋلاسىن قالىڭ قاردان تازارتۋعا كومەك كورسەتىپ ءجۇر. ولار مۇنى مىندەتىمىز دەپ سانايدى. بۇل ءۇردىس جىل سايىن ءداستۇرلى تۇردە قايتالانىپ وتىرادى. ماسەلەن, اقتوبە وبلىسىنىڭ جاستارى ەكى-ءۇش كۇندە 300-گە جۋىق قارتتىڭ اۋلاسىن قاردان تازالاپ بەرگەن. سونىمەن قاتار وڭىرلەردەگى جاستار قالا كوشەلەرىن قاردان تازارتۋعا ۇلەستەرىن قوسىپ كەلەدى.
ال قاراعاندى جاستارى وسى كۇندەرى «كەل, شاي ىشەيىك» ءىس-شاراسىن قولعا الىپ, ايازدى, بوراندى كۇندەرى دالادا جۇمىس ىستەپ جۇرگەن كوممۋنالدىق قىزمەتكەرلەرگە ىستىق شاي مەن ءتاتتىلەر ۇسىنىپ ءجۇر. قايىرىمدى ىسكە بارلىعى 500-دەن استام بەلسەندى قاتىسقان. «سۋىق كۇندەرى ءبىر-بىرىمىزگە جىلۋ سىيلايىق, دوستار!», دەپ «جاستار رۋحى» جق قاراعاندى وبلىستىق فيليالىنىڭ وكىلدەرى بارلىق جاس بۋىندى يگى ىسكە قاتىسۋعا شاقىردى.
وسىنداي قايىرىمدىلىق ءىس-شاراسى شەڭبەرىندە جاستار ءتىل ساياساتىن جۇرگىزۋگە دە ۇلەس قوسۋدى ءجون كورىپ, «مەنىڭ ەلىم – مەنىڭ ءتىلىم» رەسپۋبليكالىق جوباسى اياسىندا «سويلە» تىلدەسۋ ۇيىرمەسىن ىسكە قوستى. «جوبانىڭ ماقساتى – جاستاردى قازاق ءتىلىن ۇيرەنۋگە دارىپتەۋ جانە ونىڭ الەۋەتىن ارتتىرۋدى ناسيحاتتاۋ ارقىلى قوعام اراسىندا ءتىلدىڭ قولدانىس اياسىن كەڭەيتۋ», دەيدى ۇيىمداستىرۋشىلار.
ەلىمىزدىڭ 12 ايماعىنان (استانا, الماتى قالالارى; اباي, اقمولا, اقتوبە, الماتى, شقو, بقو, قاراعاندى, قوستاناي, سقو, پاۆلودار وبلىستارى) جوبا اياسىندا قازاق ءتىلىن وقۋعا قۇلشىنىسى بار كەز كەلگەن ازامات «سويلە» تىلدەسۋ ۇيىرمەلەرىنە قوسىلا الادى. اپتانىڭ دەمالىس كۇندەرى ۇيىرمەلەر ايماقتارداعى كوۆوركينگ ورتالىقتاردا جۇمىس ىستەيدى. تىلدەسۋ ۇيىرمەسى بارىسىندا سونداي-اق دومبىرا ۇيىرمەلەرى جانە ادەبي-رۋحاني كەشتەر, ءتۇرلى چەللەندجدەر ۇيىمداستىرىلماق.
