كەزدەسۋ بارىسىندا شۆەيتساريا تاراپىنىڭ ديپلوماتيالىق جانە قىزمەتتىك پاسپورتتاردىڭ يەلەرىن ۆيزالىق تالاپتاردان ءوزارا بوساتۋ تۋرالى جانە ديپلوماتيالىق وكىلدىكتەر, حالىقارالىق ۇيىمدار جانىنداعى تۇراقتى وكىلدىكتەر جانە كونسۋلدىق مەكەمەلەر قىزمەتكەرلەرىنىڭ وتباسى مۇشەلەرىنىڭ اقىلى ەڭبەك قىزمەتى تۋرالى ەكى ۇكىمەتارالىق كەلىسىمدى راتيفيكاتسيالاۋ تۋرالى نوتالارىن قابىلدادى.
وسىلايشا, اتالعان ەكى قۇجات بۇگىننەن باستاپ كۇشىنە ەندى. سونىڭ ارقاسىندا ەكى ەلدىڭ ديپلوماتيالىق جانە قىزمەتتىك پاسپورتتارىنىڭ يەلەرى ۆيزاسىز (30 كۇنگە دەيىن) ءوزارا ساپارلار جاساي الادى, ال ديپلوماتيالىق وكىلدىكتەر قىزمەتكەرلەرىنىڭ وتباسى مۇشەلەرى ەكى ەلدە دە اقىلى ەڭبەك قىزمەتىمەن اينالىسۋعا قۇقىلى.
سۇحباتتاستار اتالعان كەلىسىمدەر ەكى مەملەكەت اراسىنداعى تىعىز جانە ءوزارا ءتيىمدى ساياسي, ساۋدا-ەكونوميكالىق جانە ينۆەستيتسيالىق ىنتىماقتاستىقتى ودان ءارى كەڭەيتۋگە, شۆەيتساريادا ورنالاسقان كوپتەگەن حالىقارالىق ۇيىمداردىڭ جۇمىسىنا قازاقستان وكىلدەرىنىڭ نەعۇرلىم بەلسەندى قاتىسۋىنا, سونداي-اق ديپلوماتيالىق وكىلدىكتەر قىزمەتكەرلەرىنىڭ وتباسى مۇشەلەرىنىڭ تاراپتار اۋماعىندا بولۋى ءۇشىن نەعۇرلىم قولايلى جاعدايلار جاساۋعا ىقپال ەتەتىنىنە ورتاق ءۇمىت ءبىلدىردى.
كەزدەسۋ بارىسىندا ديپلوماتتار قازاقستان-شۆەيتساريا ىنتىماقتاستىعىنىڭ جاي-كۇيى مەن دامۋ پەرسپەكتيۆالارىن تالقىلادى. ر. ۆاسيلەنكو بارلىق نەگىزگى باعىتتار بويىنشا ەكىجاقتى ارىپتەستىكتىڭ سەرپىندى جانە ۇدەمەلى دامۋىن اتاپ ءوتتى. سونداي-اق ەل پرەزيدەنتى قاسىم-جومارت توقاەۆتىڭ باستاماسىمەن جۇرگىزىلىپ جاتقان قازاقستانداعى ساياسي جانە الەۋمەتتىك-ەكونوميكالىق رەفورمالار تۋرالى حاباردار ەتتى.
سۇحبات سوڭىندا تاراپتار ەكىجاقتى جانە كوپجاقتى فورماتتاعى ءوزارا ءىس-قيمىلدى بەلسەندى تۇردە قولداۋعا كەلىستى.
