تەزدەتىلەتىن تەكسەرىس

2022 جىلدىڭ مامىرىندا استاناداعى اۋە­جايدا Fast track قىزمەتى ىسكە قوسىلعان بولاتىن. اتالعان قىزمەت ءتۇرى تەك قول جۇگى بار جولاۋ­شىلارعا اۆيارەيستەرگە جەدەل تىركەلۋ جانە تەكسەرۋ پۋنكتتەرىنەن كەزەكسىز ءوتۋدى ۇسىنادى.

جىلدام تىركەۋدەن ءوتۋ جانە تەكسەرۋ جەلىسىن بيزنەس-كلاسپەن ءجيى ۇشاتىن جولاۋشىلار مەن كىشكەنتاي بالالارى بار وتباسىلار ءجيى پايدالانادى. سونىمەن قاتار بۇل قىزمەت ءتۇرى مۇمكىندىگى شەكتەۋلى جانە اۋتيزم سپەكترى بۇزىلعان جولاۋشىلارعا وتە قاجەت. اتالعان ساناتتاعى ازاماتتار ءۇشىن Fast track قىزمەتى تەگىن ەكەنىن ەسكە سالا كەتەيىك. سونداي-اق بالالار ءۇشىن ايتارلىقتاي جەڭىلدىك قاراستىرىلعان.

ەلوردا اۋەجايىنىڭ اتالعان قىزمەت ءتۇرىن ارنايى ساناتتاعى 17 763 جولاۋشى, تاعى 756 ادام كوممەرتسيالىق نەگىزدە پايدالانعان. قازىرگى ۋاقىتتا Fast track قىزمەتى استانا اۋەجايىندا Air Astana, Qazaq Air, Fly Arystan, Scat جانە «يۋجنوە نەبو» اۆياكومپانيالارى جۇزەگە اسىراتىن ىشكى رەيستەردە ەنگىزىلگەن. قىزمەت ءتۇرىن پايدالانۋعا نيەتتى جولاۋشىلارعا كومەكتەسۋ ءۇشىن اۋەجايدا دىبىستىق ەسكەرتۋ قاراستىرىلعان, سونداي-اق Fast track پۋنكتىنە جول كورسەتەتىن ارنايى بەلگىلەر ورنالاستىرىلعان.

ايتا كەتەرلىگى, اۋە جولاۋشىلارىنىڭ جايلىلىعى مەن قاۋىپسىزدىگى ءۇشىن استاناداعى اۋەجاي قازاقستاندا ءبىرىنشى بولىپ ءاۋتيزمى جانە اقىل-وي كەمىستىگى بار جولاۋشىلارعا قىزمەت كورسەتۋ بويىنشا وزىق تاجىريبەنى ەنگىز­گەن. شەكتەۋلەرى بار جولاۋشىلارعا قىز­مەت باسىم تارتىپپەن كورسەتىلەدى. ولار ءۇشىن اۋەجايدا ءتيىس­تى لانياردتار دا قاراستىرىلعان. ارنايى تاس­پالار اۋەجاي قىزمەتكەرلەرىنە مۇگەدەكتىگى ءبىر قاراعاندا بايقالمايتىن جولاۋ­شىلاردى الىپ ءجۇرۋ جانە راسىمدەردەن وتكىزۋ بارىسىندا با­سىم­دىق بەرۋ ءۇشىن تانىپ-بىلۋگە مۇمكىندىك بەرەدى.

– ءبىز قازاقستاننىڭ اۆياتسيالىق اكىمشىلىگى­مەن, ازاماتتىق اۆياتسيا كوميتەتىمەن جانە Autism Kazakhstan ۇلتتىق قاۋىمداستىعىمەن بىرلەسىپ, جوبا جاسادىق. اۋەجايعا كەلگەن كەزدە اۋتيزممەن اۋىراتىن جولاۋشىنى الىپ جۇرەتىن ادام انىقتامالىق كەڭسەگە نەمەسە قابىلداۋ بولمەسىنىڭ جانىنداعى اگەنتتەرگە كۇنباعىس بەينەلەنگەن ارنايى لانيارد الۋ ءۇشىن جۇگىنە الادى. بۇل تەحنولوگيا تۋرالى بارلىق اۆياكومپانيا وكىلدەرى بىلەدى, – دەيدى جولاۋشىلار تاسىمالى بولىمشەسىنىڭ اعا اگەنتى رۋسلان ماسعۇتوۆ.

تىركەۋ جانە تەكسەرۋ ءۇردىسى ادەتتە جولاۋشى­لاردىڭ 20 مينۋت نەمەسە ودان دا كوپ ۋاقىتىن الادى. ءوز كەزەگىندە اتالعان قىزمەت ءتۇرى ستاندارتتى تىركەۋ جانە تەكسەرۋ پروتسەدۋرالارىن 3-5 مينۋتتىڭ ىشىندە وتۋگە مۇمكىندىك بەرەدى. استانا اۋەجايى وكىلدەرىنىڭ ايتۋىنشا, 10 مي­نۋت­تىڭ ىشىندە قىزمەتتى 15 جولاۋشى پايدالانا الادى ەكەن. سوندا ورتا ەسەپپەن ءار جولاۋشىعا 40 سەكۋند جۇمسالادى.