مىندەتتى كاسىپتىك زەينەتاقى جارنالارى (مكزج) بويىنشا زەينەتاقى جيناقتارىنىڭ سوماسى 11 ايدا 20,7%-عا ۇلعايىپ, شامامەن 436 ملرد تەڭگە بولدى. جىل باسىنان بەرگى ەڭ ۇلكەن ءوسىمدى ەرىكتى زەينەتاقى جارنالارى (ەزج) بويىنشا جيناقتار كورسەتىپ (94,5%), 3,3 ملرد تەڭگەدەن استى.
«2022 جىلعى 1 قاڭتاردان 1 جەلتوقسانعا دەيىن زەينەتاقى جارنالارى تۇرىندە جزش-عا 1,5 ترلن تەڭگەدەن استام قاراجات ءتۇستى. بۇل وتكەن جىلدىڭ سايكەس كەزەڭىمەن سالىستىرعاندا 30%-عا كوپ. جارنالاردىڭ بارلىق ءتۇرى بويىنشا ءوسىم بار: 2021 جىلدىڭ سايكەس كەزەڭىمەن سالىستىرعاندا مزج كولەمى – 29% (نەمەسە 329,5 ملرد تەڭگەگە), مزج 39%-عا (نەمەسە 19,4 ملرد تەڭگەگە) ۇلعايدى. ەڭ كوپ ءوسىم – ەزج شوتتارىندا: 212% نەمەسە 1,4 ملرد تەڭگە. سالىمشىلار مەن الۋشىلاردىڭ شوتتارىنا تازا ينۆەستيتسيالىق تابىس تۇرىندە 777 ملرد تەڭگەدەن استام قاراجات ءتۇستى», دەلىنگەن قور حابارلاماسىندا.
ال 2022 جىلى قوردان 1,1 ترلن تەڭگەدەن استام تولەم جاسالعان. ونىڭ باسىم بولىگى, 902 ملرد تەڭگەسى – تۇرعىن ءۇي جاعدايلارىن جاقسارتۋعا جانە ەمدەلۋگە ارنالعان بىرجولعى زەينەتاقى تولەمدەرى (بجت).
جاسى بويىنشا تولەمدەر 22,6%-عا ۇلعايىپ, شامامەن 109 ملرد تەڭگە بولىپتى. ايتا كەتۋ كەرەك, بجزق-دان كەستە بويىنشا ورتاشا ايلىق تولەم سوماسى (زەينەت جاسىنا تولۋىنا بايلانىستى) 29 876 تەڭگەنى, ال اي سايىنعى تولەمنىڭ ەڭ جوعارى سوماسى 707 326 تەڭگەنى قۇرادى.
سونداي-اق مۇراگەرلىك بويىنشا تولەمدەر – 55,8 ملرد تەڭگە, قازاقستان شەگىنەن تىس تۇراقتى تۇرۋعا كەتۋگە بايلانىستى تولەمدەر – 45,3 ملرد تەڭگە, مۇگەدەكتىك بويىنشا تولەمدەر – 2,2 ملرد تەڭگە, جەرلەۋگە تولەمدەر – 4,9 ملرد تەڭگە. ساقتاندىرۋ ۇيىمدارىنا شامامەن 23,2 ملرد تەڭگە اۋدارىلدى.
جالپى, 2021 جىلدىڭ قاڭتارىنان بەرى بجزق سالىمشىلاردىڭ (الۋشىلاردىڭ) تۇرعىن ءۇي جاعدايىن جاقسارتۋ ءۇشىن جيناقتالعان زەينەتاقى قاراجاتىن پايدالانۋ تۋرالى 1 340 016 ءوتىنىشىن ورىندادى. ۋاكىلەتتى وپەراتور-بانكتەردە اشىلعان قازاقستاندىقتاردىڭ ارنايى شوتتارىنا بجزق شامامەن 3,2 ترلن تەڭگە قارجى اۋدارعان. بىرجولعى زەينەتاقى تولەمدەرىنىڭ ورتاشا سوماسى – 2,4 ملن تەڭگە. الايدا بۇل كورسەتكىش ءار ايماقتا ءارتۇرلى ەكەنىن اتاپ وتكەن ءجون.
«سالىمشىلار وزدەرىنىڭ جيناقتارىن پايدالاناتىن ماقساتتاردى تالداي وتىرىپ, كەلەسى نەگىزگى باعىتتاردى اتاپ وتۋگە بولادى. كوبىنەسە (بارلىق ءوتىنىشتىڭ شامامەن 35,75%-ى) – بۇل ازاماتتىق-قۇقىقتىق مامىلەلەر بويىنشا مەنشىككە تۇرعىن ءۇي ساتىپ الۋ جانە جەكە تۇرعىن ءۇي سالۋ. وتىنىشتەردىڭ شامامەن 21%-ى ودان ءارى جيناقتاۋ ءۇشىن تۇرعىن ءۇي قۇرىلىس جيناق اقشاسىنا سالىمدى تولىقتىرۋ ماقساتىندا ورىندالدى. وتىنىشتەردىڭ وسى مانگە جاقىن مولشەرى (20,88%) سالىمشىلاردىڭ زەينەتاقى جيناقتارىن تۇرعىن ءۇي قۇرىلىس جيناقتارى جۇيەسى بويىنشا پايدالانۋى ءۇشىن بەرىلگەن. وتىنىشتەردىڭ شامامەن 20%-ى العاشقى جارنادان باستاپ قايتا قارجىلاندىرۋعا جانە تولىق وتەۋگە دەيىنگى يپوتەكالىق تۇرعىن ءۇي قارىزىن پايدالانۋ ماقساتىندا ورىندالدى», دەلىنەدى رەسمي تاراتىلعان اقپاراتتا.
سونىمەن قاتار قور 314,9 ملرد تەڭگەگە ەمدەلۋگە بەرىلگەن 398 875 ءوتىنىشتى ورىندادى. بۇل رەتتە الۋعا بولاتىن ورتاشا سوما – شامامەن 0,8 ملن تەڭگە.
2022 جىلدىڭ 1 جەلتوقسانىنداعى جاعداي بويىنشا, ينۆەستيتسيالىق پورتفەلدى باسقارۋشىلارعا (يپب) 8,7 ملرد تەڭگە اۋدارىلىپ, بجزق 5 909 ءوتىنىشتى ورىندادى. بۇل رەتتە بىرەگەي ءوتىنىش بەرۋشىلەردىڭ جالپى سانى – 3 388 ادام. بۇل ءوز جيناقتارىنىڭ ءبىر بولىگىن بىرنەشە باسقارۋشى كومپانياعا بەرۋگە شەشىم قابىلداعان سالىمشىلاردىڭ بار ەكەنىن بىلدىرەدى. اۋدارىمنىڭ ورتاشا سوماسى – 1,5 ملن تەڭگە.
ايتا كەتەيىك, قازىر نارىقتا 5 يپب جۇمىس ىستەيدى. ولار – «Jusan invest» اق, «BCC Invest» اق, «سەنتراس سەكيۋريتيز» اق, «Halyk Global Markets» اق جانە «Halyk Finance» اق. زەينەتاقىمەن قامسىزداندىرۋ تۋرالى زاڭعا سايكەس, يپب ينۆەستيتسيالىق باسقارۋدى جۇزەگە اسىرعانى ءۇشىن كوميسسيالىق سىياقى الۋعا قۇقىلى. يپب سىياقىسىنىڭ شەكتى شاماسى الىنعان ينۆەستيتسيالىق تابىستىڭ 7,5%-ىنان اسپاۋعا ءتيىس.
