تسيفرلىق دامۋ مينيسترلىگىنىڭ 2020 جىلدىڭ 13 قازانىنداعى بۇيرىعىنا سايكەس, تسيفرلىق ماينينگ سالاسىنداعى كاسىپكەردەن اتالعان قىزمەتتى جۇرگىزۋ ءۇشىن ليتسەنزيا تالاپ ەتىلمەيدى. تەك eliسense.kz پورتالى ارقىلى ءوز قىزمەتىنىڭ باستالعانى تۋرالى ەلەكتروندى ءوتىنىش جىبەرىپ, ونلاين رۇقسات الۋ جەتكىلىكتى.
تسيفرلىق ماينينگتى جۇزەگە اسىرۋ قىزمەتى تۋرالى اقپاراتتاندىرۋ ءۇشىن ءوتىنىش يەسى پورتالدا مىناداي دەرەكتەردى تولتىرادى: قاجەتتى مەگاۆاتت (مۆت) قۋاتتىلىعى تۋرالى ءوتىنىش; جوسپارلانىپ وتىرعان جۇمىس ورنىنىڭ سانىن كورسەتۋ; جوسپارلانعان ينۆەستيتسيا (تەڭگە); IP مەكەن-جاي; تسيفرلىق ماينينگتى وندىرۋگە ارنالعان وڭدەۋ ورتالىعىنىڭ ورنالاسقان جەرى تۋرالى اقپارات. مەملەكەتتىك ورگان جىبەرىلگەن ءوتىنىشتى قاراستىرعاننان كەيىن اقپارات اۆتوماتتى تۇردە رۇقسات ەتىلگەن قۇجاتتار رەەسترىنە تۇسەدى نەمەسە باس تارتۋ رەەسترىنە جىبەرىلەدى (دالەلدى سەبەپپەن). رۇقسات ەتىلگەن قۇجات تۇرىندەگى نە بولماسا دالەلدى باس تارتۋ سەبەبى بار جاۋاپ 15 كۇن ىشىندە پايدالانۋشىنىڭ e-liسense.kz پورتالىنداعى جەكە كابينەتىنە كەلىپ تۇسەدى.
سونداي-اق اتالعان پورتالدا قالدىقتاردى جيناۋ, سۇرىپتاۋ جانە تاسىمالداۋ جونىندەگى قىزمەتتىڭ باستالعانى/توقتاتىلعانى تۋرالى حابارلاما بويىنشا دا قىزمەت قولجەتىمدى. پايدالانۋشى پورتالعا كىرىپ قالدىقتارمەن جۇمىس ىستەۋ سالاسىنداعى كاسىپكەرلىك سۋبەكتىسىنىڭ اتاۋىن كورسەتە وتىرىپ ءوتىنىش قالدىرادى. سۋبەكت جانە ورنالاسقان جەرى تۋرالى دەرەكتى كورسەتەدى. قىزمەتتىڭ نەمەسە ارەكەتتىڭ اتاۋىن جازادى. جىبەرىلگەن حابارلاما حابارلاندىرۋ ءراسىمى سۋبەكتىلەرىنىڭ تىزىلىمىنە اۆتوماتتى تۇردە ەنگىزىلەدى. جاۋاپ 3-5 مينۋت ىشىندە جەكە كابينەتكە كەلەدى. بۇعان دەيىن اتالعان قىزمەت تەك قاعاز جۇزىندە ىسكە اسىرىلىپ كەلدى جانە ءوتىنىش بەرۋشىلەر مەملەكەتتىك ورگانداردىڭ كانتسەليارياسىنا جۇگىنگەن ەدى.
ايتا كەتەيىك, e-liسense پورتالىنا كىرۋ جانە اۆتوريزاتسيا جاساۋ جەكە تۇلعالار ءۇشىن ءبىر رەتتىك قۇپيا سوزبەن اتقارىلادى. سونداي-اق جەكە تۇلعالار دا, زاڭدى تۇلعالار دا پورتال قىزمەتىن تۇتىنۋ ءۇشىن ەلەكتروندى تسيفرلىق قولتاڭبانى قولدانا الادى.
