«ەگەر بۇرىنعى قابىلداۋ ءبولىمى تاۋلىگىنە 300 ناۋقاس قانا قابىلداي السا, قازىر بۇل كورسەتكىش 500 پاتسيەنتكە دەيىن ءوستى. ەندىگى جەردە ءبولىم قىزمەتكەرلەرى جىلىنا 100 مىڭ ناۋقاسقا تاۋلىك بويى كومەك كورسەتە الادى. قابىلداۋ ءبولىمى الەمدە قابىلدانعان ەڭ جوعارى زاماناۋي ستاندارتتارعا ساي سالىنىپ, جابدىقتالعان. وزىق ەمدەۋ-دياگنوستيكالىق قۇرال-جابدىقتاردىڭ ىشىندە كت, رەنتگەن اپپاراتى, ۋلترادىبىستىق اپپاراتتار, بەينەفيبروگاستروسكوپ, انەستەزيا, تىنىس الۋ اپپاراتتارى دا بار», دەيدى الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى يران شامەتەكوۆ.
سونداي-اق مۇندا اۆتونومدى جەلدەتۋ جۇيەسى, باكتەريتسيدتىك سۇزگىلەر, وپەراتسيالىق بولىمشەگە ارنالعان تاۋەلسىز جەلدەتۋ جۇيەلەرى, جىلىتۋ جانە اۋاسى باپتالاتىن جانساقتاۋ بولمەلەرى مەن قارقىندى تەراپيا بولىمدەرى بار. ەڭ باستىسى, ناۋقاستارعا بار جاعداي جاسالعان, ەمدەلۋگە بايلانىستى جەكە اقپاراتتاردى قۇپيا ۇستاۋ قاراستىرىلعان.
جەدەل تراۆماتولوگيا بولىمشەسىنىڭ كىرەبەرىسى بولەك. مۇندا جول-كولىك اپاتى, وندىرىستىك نەمەسە باسقا دا جازاتايىم وقيعالار سالدارىنان اۋىر جاراقات العان ناۋقاستارعا ماشىقتانعان ماماندار جەدەل كومەك كورسەتەدى.
عيمارات جاڭا سانيتارلىق ەرەجەلەرگە, ترياج ايماعىنىڭ نورمالارىنا سايكەس قىزىل, سارى جانە جاسىل ايماقتارعا بولىنەدى, بۇلار ءتيىستى ءتۇستى باعىتتاۋىشتارمەن بەلگىلەنگەن. سول سياقتى كۇرە جولدان كىرەتىن جاردەم كولىكتەرىنىڭ كەدەرگىسىز, ەركىن كىرىپ-شىعۋى, ناۋقاستاردى اكەلەتىن اربانى الىپ جۇرۋگە ارنالعان پاندۋستىڭ ىڭعايلىلىعى دا قاراستىرىلعان.
اتالعان اۋرۋحاناعا قاتىستى 2023 جىلدىڭ تاعى ءبىر جاڭالىعى – جاياۋ بارا الاتىن قاشىقتىقتاعى تۇرعىندار بىلىكتى دارىگەرلەردەن مەديتسينالىق كومەك الا الۋى ءۇشىن بىرقاتار جاڭا مەديتسينالىق ۇيىم اشۋ جوسپارلانىپ وتىر. ماسەلەن, جاڭا جىلدىڭ ءبىرىنشى توقسانىندا اۋەزوۆ پەن جەتىسۋ اۋداندارىنداعى «مامىر» جانە «كەمەل» وتباسىلىق دارىگەرلىك امبۋلاتوريالارىن پايدالانۋعا بەرۋ, سونداي-اق الماتى قالاسى بالالار جەدەل مەديتسينالىق كومەك كورسەتۋ ورتالىعىنىڭ كەڭەيتىمىن پايدالانۋعا بەرۋ جوسپارلانعان.
الماتى
