ەسكى عيماراتتى تولىق جوندەۋدەن وتكىزگەن ەسكەلدى اۋدانىنا قاراستى قارابۇلاق اۋىلى «الاقاي» بالاباقشاسىن اشتى. وسىلايشا بالالار جىلىن جاقسى نوتادا قورىتىندىلادى. ىرگەسى 1992 جىلى قالانعان نىسان كۇردەلى جوندەۋدەن كەيىن جاڭعىرىپ شىعا كەلدى. بۇرىن مۇندا «بەرەزكا» بالاباقشاسى بولعان, ول «قارابۇلاق قانت زاۋىتى» اق-عا قارايتىن ەدى. اكتسيونەرلىك قوعام وكىلدەرى 2020 جىلى عيماراتتى اۋداننىڭ كوممۋنالدىق مەنشىگىنە قايتارىمسىز نەگىزدە وتكىزىپ بەرگەن ەكەن. كەيىن ول اۋداندىق ءبىلىم ءبولىمىنىڭ بالانسىنا بەرىلىپتى. عيماراتتىڭ جالپى الاڭى – 1 043,1 شارشى مەتر. بيۋدجەتتەن كۇردەلى جوندەۋگە 422,3 ملن تەڭگە جۇمسالعان.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, قۇرىلىس-مونتاج جۇمىستارىن «شاح قۇرىلىس كومپانياسى» جشس جۇرگىزگەن. بالاباقشا بارلىق قاجەتتىلىكپەن قامتىلعان, جيھازدارى جاڭالانعان, ويىنشىقتار, مۋزىكالىق جانە سپورتتىق جابدىقتارى تۇگەل. ءار بولمە بالالاردىڭ جاسىنا ساي جابدىقتالعان. بالاباقشادا 3-تەن 6 جاسقا دەيىنگى بالالار تاربيەلەنەدى. بۇل رەتتە بالالاردىڭ تاريبەسىمەن قاتار, سپورتپەن, مۋزىكامەن شۇعىلدانۋىنا جاعداي جاسالعان. 27 جاڭا جۇمىس ورنى قۇرىلعان, 5 بالالار توبى بار.
ودان كەيىنگى قۋانىشتى جاڭالىق اقسۋ اۋدانىنا قاراستى جانسۇگىروۆ اۋىلىندا بولدى. اۋدان ورتالىعىندا «اۋىلدىق جەرلەردەگى تىرەك مەكتەپتەردىڭ الەۋەتىن دامىتۋ» باعدارلاماسى بويىنشا ە.سيقىموۆ اتىنداعى ورتا مەكتەپتىڭ 22 وقۋ كابينەتى مەن قوسىمشا ءبىلىم بەرەتىن STEM-زەرتحانا, ارت-ستۋديا, تەلەستۋديا, كوۆوركينگ اۋماعى بار كىتاپحاناسىنىڭ قۇرال-جابدىقتارى جاڭالاندى. سول سياقتى مەكتەپ كىتاپحاناسىنىڭ ينتەرەرى تولىق جاڭارتىلىپ, سپورتتىق جابدىقتار جەتكىزىلدى. مۇنىڭ ءبارىن «قازاقستان حالقىنا» قورى قارجىلاندىردى. وعان شامامەن 250 ملن تەڭگە جۇمسالعان.
ايتا كەتەيىك, اتالعان باعدارلاما اۋىل مەكتەپتەرىنىڭ ماتەريالدىق-تەحنيكالىق بازاسىن نىعايتۋعا, ادىسنامالىق كومەك كورسەتۋگە, وقۋشىلار مەن ۇستازداردىڭ تاجىريبەلىك بىلىمدەرى مەن داعدىلارىن ارتتىرۋعا مۇمكىندىك بەرەدى.
«قازىر بالالاردىڭ تاربيەسى مەن بىلىمىنە قويىلاتىن تالاپ بۇرىنعىدان وزگەشە. بالالاردىڭ جان-جاقتى دامۋىنا, شىعارماشىلىق ىزدەنىسىنە, ەڭ الدىمەن بالانىڭ تالانتى مەن قابىلەتىن ەسكەرە وتىرىپ ەركىندىك بەرىلۋگە ءتيىس. جوبا اياسىندا «نازارباەۆ زياتكەرلىك مەكتەبىمەن» تاجىريبە الماسۋدىڭ, ىنتىماقتاستىقتا جۇمىس ىستەۋدىڭ ءبىزدىڭ مۇعالىمدەر ءۇشىن پايداسى زور بولدى. وقىتۋ پروتسەسى وقۋشىلار ءۇشىن دە, مۇعالىمدەر ءۇشىن دە ءوز تيىمدىلىگىن كورسەتتى», دەدى مەكتەپ ديرەكتورى راحات نىعمەتبەكقىزى.
ءبىلىم بەرۋدى تۇراقتى دامىتۋ قورىنىڭ وكىلدەرى وسىلايشا ە.سيقىموۆ اتىنداعى مەكتەپتىڭ جاقىن ماڭداعى شاعىن مەكتەپتەر ءۇشىن تىرەك مەكتەپكە اينالعانىن اتاپ ءوتتى. «ەڭ الدىمەن, قازاقستان حالقىنىڭ باسىم بولىگى اۋىلدىق جەردە تۇراتىنىن ۇمىتپاۋىمىز كەرەك. سوندىقتان اۋىل وقۋشىلارى قالا بالالارى سياقتى ءتۇرلى مۇمكىندىككە يە بولۋعا ءتيىس. بۇگىندە ءبىز تىرەك مەكتەپتەردى دامىتۋمەن اينالىسامىز, ونسىز اۋىل ءبىلىمىن كوتەرۋ مۇمكىن ەمەس», دەيدى ءبىلىم بەرۋدى تۇراقتى دامىتۋ قورىنىڭ ديرەكتورى دانيار توقتارباەۆ.
جالپى, ە.سيقىموۆ اتىنداعى مەكتەپ-ينتەرناتتا 402 بالا وقيدى. سونداي-اق 55 پەداگوگ جۇمىس ىستەيدى.
جەتىسۋ وبلىسى
