الايدا كەيبىر كۇندەرى ۇيىتقىعان جەل تۇرىپ, بوران سوقتى. قار از بولعان سوڭ بوراندى كۇندەردىڭ زاردابى قاتتى تيگەن جوق. بىراق ارنايى قىزمەتتەر ايتەۋىر ايتپاي قالدى دەمەسىن دەگەن بولۋى كەرەك, ۇيالى تەلەفوندارعا حابارلاما جىبەرىپ, داۋىل سوعاتىنىن 31 رەت ەسكەرتتى. اعاشى جوق, اشىق دالالى ايماقتاردا سوققان سونداي شاعىن بوراننىڭ ءوزى 44 ادامدى جىلىتۋ تىرەكتەرىنە جەتكىزۋگە ءماجبۇر ەتتى. ولار وسىنداي الاپتاردا تۇرىپ قالعان اۆتوكولىكتەردىڭ جولاۋشىلارى ەدى. بارلىعى 4 رەت بولعان وسىنداي جاعدايدا جولاۋشىلار اراسىندا 7 بالانىڭ بولعانىن دا ايتا كەتۋ كەرەك.
توتەنشە جاعدايلار قىزمەتى كەز كەلگەن جاعدايعا دايىن ەكەنىن مالىمدەپ وتىر. ولاردىڭ سەنگەنى – دايىندىق ساپىنا تۇرعىزىلعان 1246 تەحنيكا. وسى تەحنيكانىڭ كۇشىمەن 136 رەسپۋبليكالىق, 120 وبلىستىق, 990 جەرگىلىكتى ماڭىزى بار جولدى قاردان ارشىماق. سونىمەن بىرگە ازىرگە توتەنشە جاعدايعا شىعا قويماعان, 14 جەدەل ىزدەۋ توبى دا دايىندىق ساپىندا ەكەنى ايتىلدى.
وبلىستىق تجد باستىعىنىڭ ورىنباسارى مۇرات قانعوجينوۆ «جىلداعىداي ۇسكىرىك اياز بەن قالىڭ قار سوققان سوقىر بوراندار بولسا, قاردى جارىپ وتەتىن 61 تەحنيكامىز دا دايىن», دەپ مالىمدەدى. سونىمەن بىرگە ول قاجەت بولسا قولدانىلاتىن قۇم, قيىرشىقتاس, شلاك جانە تۇزدى قۇمى ارالاس 7674 توننا ينەرتتى ماتەريالدار دا ازىرلەنگەنىن جەتكىزدى. مۇنداي ماتەريالدار كوكتايعاق بولعان ايماقتارعا سەبىلىپ, كولىكتەردىڭ قاۋىپسىز وتۋىنە مۇمكىندىك بەرەدى.
قازگيدرومەت قىزمەتىنىڭ بولجاۋىنا قاراعاندا, الداعى ايلاردا دا اۋا رايى قالىپتى جاعدايدا بولماق. قاڭتار ايىنداعى تەمپەراتۋرا 14-17 گرادۋس سۋىق شەگىنەن اسپايدى. بىراق وسى ايدا قار قالىپتاعى نورمادان ارتىق تۇسەدى دەپ بولجام جاسالىپ وتىر. جەلتوقساندا قار جۇقا بولعانعا وكىنىپ جۇرگەن شارۋالار ءۇشىن بۇل جاقسى حابار. ويتكەنى قار كوپ بولسا, ەگىستىكتىڭ ىلعالى دا مول بولاتىنى بەلگىلى.
سونىمەن بىرگە گيدرومەت اقپان مەن ناۋرىزداعى اۋا رايىنىڭ تەمپەراتۋراسى دا قالىپتى جاعدايدا بولادى دەگەن بولجام ايتتى. سولاي بولعانى حالىققا دا تىنىش, ويتكەنى شەكتەن تىس ۇسكىرىكتىڭ ەشكىمگە كەرەگى جوق.
كۇرە جولدارداعى قاۋىپسىزدىك جۇرگىزۋشىلەردىڭ وزدەرىنە دە بايلانىستى. كەيبىر جۇرگىزۋشىلەر ساقتىق شارالارىن ۇمىتىپ كەتەدى. قىسقى ديزەل وتىنىنىڭ ورنىنا جازعى جانار-جاعارمايمەن الىس جولعا شىعىپ كەتەتىندەر دە بار. كەيبىرى قىس پەن جازعى جولداردىڭ ايىرماسىن بىلمەي قالادى. ماسەلەن, قار ءالى مۇلدە از بولعانىمەن, جولدىڭ كوكتايعاق بولعانىنا قاراماعان «الماتى – ەكاتەرينبۋرگ» تراسساسىنىڭ 758-شاقىرىمىندا كەلە جاتقان مان جۇك ءاۆتوموبيلى جولدىڭ شەتىنە شىعىپ كەتتى. جۇك كولىگىنىڭ جۇرگىزۋشىسى قاتتى جىلدامدىقپەن كەلە جاتىپ تەجەگىشتى باسقان. سونىڭ سالدارىنان جۇك كولىگى تراسسادان تايىپ كەتكەن. ابىروي بولعاندا جۇرگىزۋشىسى امان. ءدال سونداي جاعدايعا ايىرتاۋ اۋدانىنىڭ اۋماعىنداعى «رۋزاەۆكا – ساۋمالكول» باعىتىمەن كەلە جاتقان كاماز ءاۆتوموبيلى دە ۇشىرادى. ابىروي بولعاندا ەشقانداي جۇگى بولماعان كولىك تج قىزمەتىنىڭ كومەگىمەن جىلدام قۇتقارىلدى. مىنە, قىستىڭ كوزى قىراۋدا وسىنداي وقيعالار جيىلەي بەرەدى. سوندىقتان جۇرگىنشىلەردىڭ دە قىراعى بولعانى ءجون.
سولتۇستىك قازاقستان وبلىسى
