داۋىل سىناعان دايىندىق

ءيا، سەكۋندىنا 30 مەتر جىلدامدىقپەن سوققان جەل ەلەكتر باعانالارىن قۇلاتتى. تالاس اۋدانىنىڭ ورتالىعى قاراتاۋ قالاسى مەن سارىسۋ اۋدانىنىڭ ورتالىعىنا تەلىنگەن جاڭاتاس قالاسىنىڭ تۇرعىندارى تابيعاتتىڭ توسىن مىنەزىنەن ايتارلىقتاي زارداپ شەكتى. ءيا، كىسى شىعىنى جوق. ايتكەنمەن، كوپقاباتتى ۇيلەردىڭ شاتىرى ۇشتى، كوپتەگەن كولىك قيرادى، ءدىڭى بەرىك اعاشتار قۇلادى. ۇيىتقي سوققان جەلدەن كەلگەن شىعىن ساعات ساناپ ارتپاسا، كەمىمەسى انىق. ويتكەنى ۇشقان شاتىر مەن قۇلاعان اعاشتىڭ تالاي دۇنيەنى تاس-تالقان ەتكەنى انىق. ال حالىق ساقتاندىرۋ كومپانيالارى كولىكتىڭ شىعىنىن وتەمەيدى دەپ قامىعىپ وتىر.

دەرەكتەرگە سۇيەنسەك، جەلدەن زارداپ شەككەن جۇرت اۋەلدە جىلۋ مەن جارىقتى بىلاي قويعاندا، اس اتاسى نانعا ءزارۋ بولعان. اۋەلدە سارىسۋ اۋدانىنىڭ اكىمدىگى ناۋبايحانالاردىڭ ىستەن شىققانىن مالىمدەدى. مۇنى: «ناۋبايحانالار ىستەن شىققاندىقتان تۇرعىندارعا تاراز قالا­سى­نان 7 مىڭ دانا نان جەتكىزىلدى»، دەگەن اۋدان اكىمدىگى ءباسپاسوز قىزمەتىنىڭ رەسمي مالىمدەمەسىنەن دە ايقىن اڭعارۋعا بولادى.

ازىرگە 11 كوپقاباتتى تۇرعىن ءۇيدىڭ جابىندىسى ۇشقانى انىقتالعان. قاھارلى قىس قاتتى قىسا بەرمەيتىن وڭىردە داۋىل ءبىر سوققاندا قازاندىقتىڭ ىستەن شىققانى دا جانىڭدى ايازداي قاريدى. التى اي بويى ات قۇلاعى كورىنبەيتىن سارشۇناق اياز بەن ۇيىتقىپ سوعاتىن جەلى جۇيكەڭدى جۇقارتاتىن تەرىسكەيدىڭ قىسى جامبىلعا جارتى اي قوناقتاسا جاعداي نە بولماق؟ قىسقاسى، ەلەكتر جەلىلەرىنە تاۋەلدى سانالاتىن قازاندىقتاردىڭ جايىن تاعى ءبىر تارازىلايتىن ۋاقىت كەلىپ جەتكەن سىڭايلى. ايتپەسە بوز بوران بولسا، توزىعى جەتكەن جەلىلەردىڭ تاعى دا سىر بەرەتىنى ءسوزسىز.

«دۇلەي داۋىلدان قانشاما ءۇيدىڭ شاتىرى ۇشتى. ونىڭ ءبارىن ءالى ساناي جاتار. بىراق از ەمەس. جارىق پەن سۋسىز قالعاندا كادىمگىدەي ابىگەرگە تۇستىك. ارينە، ءبارى ۋاقىتپەن رەتتەلە جاتار. الايدا وسى ماسەلە كىمدى دە بولسىن ويلاندىرسا دەيسىڭ»، دەدى جەرگىلىكتى تۇرعىن باقىتجان بولەكباەۆ.

راسىندا دا، ۇيىتقي سوققان جەل ءوڭىردىڭ قىسقى ماۋسىمعا دايىندىعىن تاعى ءبىر زەردەلەيتىن ۋاقىت كەلگەنىن ايعاقتاپ بەردى. جۇمىسشى توپ شىعىن مولشەرىن ەسەپتەيدى. بۇل رەتتە جەرگىلىكتى حالىق شىعىننىڭ تەزىرەك وتەلگەنىن قالايتىنىن ايتا كەتكەن دە ءلازىم.

«قاراپايىم حالىق ساقتاندىرۋ كومپانياسىنا اقشاسىن اياماي تولەپ ءجۇر. سوندىقتان دا ولار ءدال وسى جاعدايدا حالىققا كومەكتەسۋى كەرەك. تابيعاتتىڭ توسىن مىنەزىنە ءبىز كىنالى ەمەسپىز»، دەدى قاراتاۋلىق ازامات نۇربول كوپباەۆ.

راسىندا دا، تابيعاتتىڭ توسىن مىنەز تانىتۋى سالدارىنان كوپتەگەن ازا­مات­تىڭ كولىگى قيراپ قالدى. ەندى ولار اۆتو­­­كو­لىكتەرىنىڭ ساقتاندىرۋ كومپانيا­لارى ارقىلى جوندەلگەنىن قالايدى. جەرگىلىكتى اتقارۋشى بيلىك وسى ماسەلەگە دە دەن قويسا دەيدى.

بۇگىندە وڭىردەگى جاعداي وبلىس اكىمى نۇرجان نۇرجىگىتوۆتىڭ باقىلاۋىندا. جەرگىلىكتى حالىق ءوڭىر باسشىسى بارلىق ماسەلەنى دەر كەزىندە شەشسە دەگەن تىلەگىن ايتىپ وتىر. ءيا، قاھارلى قىستىڭ بورانى قاراتاۋ مەن جاڭاتاس حالقىن عانا ەمەس، جۋالى اۋدانى، تاراز قالاسىنىڭ تۇرعىندارىن دا قىسپاققا الدى. بۇگىندە بارلىق جەردە جاعداي قالىپقا كەلە باستادى. ەلەكتر ەنەرگياسى مەن جىلۋ تولىقتاي بەرىلدى دەۋگە بولادى.

سارىسۋ اۋدانىندا توتەنشە جاعداي سالدارىن جويۋ جۇمىستارى قىزۋ اتقا­­رى­لۋ­دا. وبلىس اكىمى ن.نۇرجىگىتوۆ اۋدانعا جۇمىس ساپارىمەن بارىپ، ەڭ الدىمەن جاڭاتاس قالاسىنا ەلەكتر ەنەرگيا­سىن جانە جىلۋ بەرۋ ماسەلەسىن جەدەل شەشۋدى تاپسىرعان بولاتىن. اتقارىلعان جۇمىس ناتيجەسىندە بۇعان دەيىن قالاعا ەلەكتر ەنەرگياسى بەرىلگەن، ەندى جىلۋمەن قامتۋ شارالارى جۇزەگە اسا باستادى.

قازىر «جاڭاتاسسۋجىلۋ» مكك جىلۋمەن جابدىقتاۋ جۇيەلەرىنە سۋ تولتىرۋ، جەكە گەنەراتورلارىنىڭ قۋاتى اينالىم-سورعىلارىنىڭ قىزمەتىن قالىپقا كەلتىرۋ جۇمىستارى قىزۋ جال­­عا­سۋدا. وسىعان وراي قالاعا جىلۋ بەرۋ كەزەڭ-كەزەڭىمەن ىسكە اسىپ، ءبىر تاۋلىكتە تولىعىمەن جىلۋعا قوسىلادى دەپ جوس­پارلانعان.

«ەسكە سالا كەتەيىك، بۇعان دەيىنگى  قاتتى داۋىل سالدارىنان جاڭاتاس قالاسىنداعى ەلەكتر باعانالارى قۇلاپ، ەلەكتر جەلىلەرى ءتيىستى كەرنەۋدى تاراتۋدا كەدەرگى تۋىنداعان. سوعان بايلانىس­­­­تى «جاڭاتاسسۋجىلۋ» مكك جۇمىسىن توقتاتۋعا ءماجبۇر بولىپ، جىلۋمەن جابدىقتاۋ جۇيەسىنەن سۋدى اعىزۋ تۋرا­لى شەشىم قابىلدانعان بولاتىن»، دە­لىن­گەن جەرگىلىكتى اتقارۋشى بيلىكتىڭ رەسمي جاۋابىندا.

جامبىل وبلىسى