باسەكەلەستىكتى قالىپتاستىرۋ باعىتىندا اۋكتسيونعا راديوجيىلىكتەردى ءبولۋ تارتىبىمەن بەكىتىلگەن تالاپتارعا سايكەس كەلەتىن كومپانيالار قاتىسا الادى. بۇل اۋكتسيون 5G تەحنولوگيالارى ءۇشىن راديوجيىلىكتەردى تاراتۋدىڭ اشىق مەحانيزمىن كورسەتەدى. وسىنداي ءىس-شارالاردىڭ وتكىزىلۋى ەلدەگى تەلەكوممۋنيكاتسيالىق جەلىلەردىڭ دامۋىنا سەرپىن بەرەتىنى ءسوزسىز. وعان قوسا, جاڭا وپەراتورلار ءۇشىن باسەكەلەستىك ورتانىڭ قۇرىلۋىنا مۇمكىندىك بەرەدى.
«بۇگىنگى تاڭدا تەحنولوگيالار قارقىندى دامىپ كەلەدى. سوندىقتان ءارتۇرلى ەكوجۇيەلەردى, قوسىمشالاردى, قىزمەتتەردى جۇيەلەندىرۋ ءۇشىن ساپالى ينفراقۇرىلىم قالىپتاستىرۋىمىز قاجەت. ارينە, 5G تەحنولوگياسىن دامىتۋ ءۇشىن بىرنەشە جىل قاجەت. الايدا وسى ۋاقىت ىشىندە ترافيكتەر ەداۋىر ۇلكەن كولەمدە دامىپ, جاڭا قىزمەتتەر پايدا بولادى. ءبىز ازاماتتارىمىزعا ساپالى زاماناۋي سەرۆيستەردى ۇسىنۋ ءۇشىن, جاڭا ۇيالى بايلانىس جۇيەسىن ەنگىزۋدى كوزدەپ وتىرمىز», دەيدى تسيفرلىق دامۋ ۆيتسە-ءمينيسترى اسحات ورازبەك.
اۋكتسيون شارتتارى بويىنشا قاتىسۋشىدا – كەمىندە التى وبلىستى, رەسپۋبليكالىق ماڭىزى بار قالالاردى قامتيتىن تەلەكوممۋنيكاتسيالار مەن ۇيالى بايلانىستىڭ ماگيسترالدىق جەلىلەرى جانە مەملەكەتتىك ليتسەنزياسى بولۋعا ءتيىس. تاعى ءبىر ماڭىزدى تالاپ – قاتىسۋشى كومپانيا تاراماعان نەمەسە بانكروتقا ۇشىراۋ ساتىسىندا بولماۋى كەرەك. وعان قوسا, كەپىلدىك جارنانى تولەگەنى تۋرالى قۇجاتتاردى ۇسىنۋعا مىندەتتى.
GSMA Intelligence حالىقارالىق ۇيىمىنىڭ جاھاندىق جانە وڭىرلىك زەرتتەۋى 2030 جىلعا قاراي 5G تەحنولوگيالارى جالپى ىشكى ونىمگە جانە الەۋمەتتىك-ەكونوميكالىق جاعدايعا وڭ اسەرىن تيگىزەتىنىن باعالاعان.
حالىقارالىق تالداۋ نەگىزىندە C-band دياپازونىندا 5G تەحنولوگياسىن ەنگىزۋ 2030 جىلى الەمدىك ءىجو-ءنىڭ 610 ملرد دوللاردان اسۋىنا (وسۋىنە) اكەلەدى. بۇل 5G تەحنولوگياسىنىڭ جالپى الەۋمەتتىك-ەكونوميكالىق اسەرىنىڭ 65 پايىزىن قۇرايدى.
5G تەحنولوگيالارى مەن قىزمەتتەرىنىڭ الەۋمەتتىك-ەكونوميكالىق اسەرىنەن باسقا, دەنساۋلىق ساقتاۋ مەن بىلىمگە قولجەتىمدىلىكتى جاقسارتۋ, قوعامدىق قاۋىپسىزدىكتى ارتتىرۋ جانە قورشاعان ورتانىڭ لاستانۋىن ازايتۋ سياقتى قوسىمشا ارتىقشىلىقتارى كۇتىلۋدە. جوعارىدا اتالعان زەرتتەۋ بويىنشا تمد ەلدەرىندە 5G-ءدى قولدانىسقا ەنگىزۋ ارقىلى ءىجو-ءنىڭ 14 ملرد دوللارعا ءوسۋى بولجانادى, ونىڭ ىشىندە قازاقستاننىڭ ۇلەسى – 12 پايىز. 2020-2030 جىلدارى الەم بويىنشا 5G تەحنولوگياسىن ەنگىزۋدىڭ ارتىقشىلىقتارىن ەسكەرە وتىرىپ, C-band 5G دياپازونىنا باسىمدىق بەرەتىن قازاقستان رەسپۋبليكاسى مەملەكەتتىك ساياساتى جانە قۇرىلعان ينفراقۇرىلىم الداعى جىلدارى ەكونوميكالىق دامۋعا ىقپال ەتەدى», دەلىنگەن مينيسترلىك حابارلاماسىندا.
سالا مالىمەتى بويىنشا, دامىعان ەلدەردە 5G جيىلىكتەرىن ساتۋ اۋكتسيوندارىندا قوماقتى قاراجات بولىنگەن. مىسالى, شۆەيتساريادا – 378 ملن دوللار, يتاليادا – 6,5 ملرد ەۋرو, يسپانيادا – 437,6 ملن ەۋرو, اۋستريادا – 188 ملن ەۋرو, ۇلىبريتانيادا – 1,35 ملرد ەۋرو, گەرمانيادا – 6.5 ملرد ەۋرو, وڭتۇستىك كورەيادا – 3,3 ملرد دوللار.
