جاس ۇيىمنىڭ قولعا العان ماڭىزدى جۇمىستارىنىڭ ءبىرى – ەلىمىزدە جاستار قوزعالىسىنىڭ ورتالىقتارىن اشۋ. العاشقى ورتالىق استانا قالاسىندا پايدالانۋعا بەرىلەدى. بۇل جەردە كوۆوركينگ, جاتتىعۋ زالدارى, ءدارىسحانالار جانە كىتاپحانا بولادى, ياعني جاستاردىڭ جان-جاقتى دامىپ, ولاردى ءتيىمدى كومانداعا بىرىكتىرۋ ءۇشىن جاعداي جاسالماق. بۇگىنگى تاڭدا جاسامپازدىق ۇدەرىس ءۇشىن قازاقستاندىق جاستاردى بىرىكتىرۋ اسا ماڭىزدى. وسىعان وراي, ەلىمىزدىڭ بەدەلدى سپورتشىلارى بىرلەسىپ, جاستار قوعامدىق بىرلەستىگىن قۇرعان بولاتىن. ماقسات – بەلسەندى جاستاردىڭ باسىن ءبىر شاڭىراقتىڭ استىندا بىرىكتىرىپ, ولاردىڭ جان-جاقتى دامۋى ءۇشىن جاعداي جاساۋ.
ءىس-شاراعا «دالا قىراندارى» جاستار قوزعالىسىنىڭ جوبا ۇيلەستىرۋشىسى ەربول مىرزابوسىنوۆ, ەركىن كۇرەستەن لوندون وليمپياداسىنىڭ قولا جۇلدەگەرى اقجۇرەك تاڭاتاروۆ, قازاق كۇرەسىنەن «قازاقستان بارىسى – 2014» جانە «دالا قىرانى» تيتۋلىنىڭ يەگەرى مۇحيت تۇرسىنوۆ, مما شەبەرى ارتەم رەزنيكوۆ, گرەك-ريم كۇرەسىنەن الەم چەمپيوناتىنىڭ بىرنەشە دۇركىن جۇلدەگەرى المات كەبىسپاەۆ جانە تاعى باسقا ەلىمىزدىڭ تانىمال سپورتشىلارى قاتىستى.
شارادا ءسوز العان سپورتشىلار سالادا ورىن الىپ وتىرعان كەمشىن تۇستار تۋرالى ايتىپ بەردى. اتاپ ايتقاندا, ەركىن كۇرەستەن قازاقستاننىڭ ءتورت دۇركىن چەمپيونى, حالىقارالىق بىرىنشىلىكتەردىڭ بىرنەشە دۇركىن جەڭىمپازى اقجۇرەك تاڭاتاروۆ ءوز سوزىندە سپورتتاعى قيىندىقتار جايلى ءسوز قوزعادى.
«بۇل جەردە كاسىبي سپورتشىلار مەن سپورتتى اياقتاعان ازاماتتار جينالىپ وتىر. ەلىمىزدە ءبىراز سپورتشىلار قيىنشىلىقتان ءوتتى. بىرەۋ ايتسا, بىرەۋ ايتا الماس, بىراق قازاقستانداعى ەڭ وزەكتى ماسەلەلەر قوردالانعان سالالاردىڭ ءبىرى – ول سپورت سالاسى. اسىرەسە, كۇرەستە ءبىراز ادىلەتسىزدىكتەر بولدى. سىرتتان لەگيونەرلەردى اكەلىپ, سول سپورتشىلاردىڭ جەڭىسكە جەتىپ, ونىڭ ۇلكەن جارىستارعا بارۋىنا بارلىق جاعداي جاسالدى. وسىلايشا, ەلىمىزدىڭ ءبىراز سپورتشىلارىنىڭ باعى بايلاندى. وسى جاعدايلار ءوز باسىمىزدان وتكەننەن كەيىن سپورتشىلاردىڭ مۇڭ-مۇقتاجىن تىنداپ, قولداۋ كورسەتۋگە دايىنمىز», دەدى ول.
ال گرەك-ريم كۇرەسىنىڭ ساڭلاعى المات كەبىسپاەۆ جيىن قاتىسۋشىلارىنا ءبىر ماقسات قويىپ, وعان بىرلەسىپ قول جەتكىزۋ كەرەكتىگىن ايتتى. ول مەملەكەتتىڭ قولداۋىن سەزىنىپ, مانسابىندا نەبىر قيىندىقتارمەن ارپالىسۋعا التىن ۋاقىتىن زايا كەتىرمەگەن سپورتشىلاردىڭ ەلىمىزگە تورتجىلدىقتىڭ التىنىن دا, كۇمىسىن دە اكەلەتىنىنە نىق سەنىمدى ەكەنىن جەتكىزدى.
«ەلىمىزدە سپورتقا بۇيرەگى بۇرعان جاستار از ەمەس. دەگەنمەن, ولاردىڭ بىرقاتارى ۋاقىت وتە كەلە سپورتتان كەتۋگە ءماجبۇر بولادى. ماسەلەن, جاسوسپىرىمدەردىڭ جارتىسى عانا جاستار توبىنا وتسە, سولاردىڭ ۇشتەن ءبىرى عانا كەيىن ەرەسەكتەر اراسىندا سايىسقا ءتۇسىپ ءجۇر. بۇل سالاداعى كوپتەگەن جۇيەلى پروبلەمالاردىن ءبىرى. ءتۇرلى دەڭگەيدەگى جارىستار وتكىزىپ, ەسەپ بەرۋدەن بولەك, سالانىڭ كۇردەلى ماسەلەلەرىن شەشۋ قاجەت. سوندا عانا وتاندىق سپورتىمىز العا باسىپ, جازعى وليمپيادادا كوك تۋىمىز جەلبىرەيدى», دەدى المات كەبىسپاەۆ.
جيىندى قورىتىندىلاعان جاستار قوزعالىسىنىڭ ۇيلەستىرۋشىسى ەربول مىرزابوسىنوۆ سپورت سالاسىندا رەفورما جۇرگىزۋ قاجەتتىگىن جانە بۇل جۇمىسقا سپورتشىلاردىڭ تىكەلەي ءارى بەلسەندى تۇردە قاتىسۋى كەرەكتىگىن العا تارتتى.
«سىزدەردىڭ بارلىقتارىڭىز سانالى ءومىرىن سپورتقا ارناعان جاستارسىزدار. سپورتتا قانداي وزەكتى ماسەلەلەردىڭ بار ەكەنىنىن سىزدەردەن ارتىق ەشكىم بىلمەيدى. سالادا جۇيەلى پروبلەمالار بار ەكەنى راس. سوندىقتان دا ءبىز وتاندىق سپورتتى رەفورمالاۋدى باستى مىندەتتەرىمىزدىڭ ءبىرى رەتىندە كورىپ وتىرمىز. بۇل كۇردەلى ماسەلەلەردى تەك بىرلەسىپ قانا شەشە الامىز. سەبەبى, سپورت – ول ءبىز! سىزدەردى بۇل ىستە بەلسەندى بولۋعا شاقىرامىن», دەدى ەربول مىرزابوسىنوۆ.
سپيكەردىڭ ايتۋىنشا, ەلىمىزدىڭ تۇكپىر-تۇكپىرىنەن كەلگەن سپورتشىلار ەندى ءوز وڭىرىندەگى ماسەلەلەردى جۋىردا ىسكە قوسىلعان تەلەگرام-بوتقا جىبەرە الادى. بارلىق اقپارات وڭدەلگەننەن كەيىن ارنايى كارتاعا ەنگىزىلەدى. اقىر سوڭىندا بار اقپارات وتاندىق سپورتتى رەفورمالاۋ ماقساتىندا جاسالاتىن «جول كارتاعا» ەنگىزىلىپ, ول كەيىن مادەنيەت جانە سپورت مينيسترىلىگىنە جىبەرىلەدى. قازىرگى ۋاقىتتا اتالمىش كارتانى جاسايتىن ارنايى ساراپشىلاردىڭ توبى قۇرىلۋدا.
ءىس-شارا سوڭىندا ەلىمىزدىڭ بەلسەندى جاستارى بولاشاق ورتالىقتا بولىپ, قۇرىلىس جۇمىستارىنىڭ باستالۋىنا باستاماشى بولدى. وسىلايشا, كاسىبي سپورتشىلار ەل جاستارىنا دەمەۋ بولاتىن ورتالىقتىڭ بوي كوتەرۋىنە وزدەرىنىڭ شاعىن ۇلەستەرىن قوستى.
