اۋرۋحانانىڭ ءباسپاسوز قىزمەتىنىڭ حابارلاماسىنا سۇيەنسەك, 55 جاستاعى پاتسيەنت مۇندا جۇرەكتىڭ يشەميالىق اۋرۋى, تۇراقسىز ستەنوكارديا دياگنوزىمەن تۇسكەن. اۋرۋحاناعا جەتكىزىلگەن كەزدە كەۋدە مەن جۇرەك تۇسىنىڭ قىسىلاتىنىن جانە اشىپ اۋىراتىنىن, سودان سوڭ سول قولعا بەرىلەتىنىن ايتىپ شاعىمدانعان. سونىمەن قاتار جۇرەگى اينىپ, باسى اينالىپ, ەنتىگىپ قالاتىن بولعان.
«الدىمەن ءبىز فراكتسيوندىق رەزەرۆ ءادىسىن (FFR) پايدالانا وتىرىپ تامىر ىشىندەگى قىسىمدى ولشەدىك. FFR ناتيجەسى تامىردىڭ بولماشى عانا تارىلعانىن كورسەتىپ بەردى. ستەنتتەۋگە دەگەن قاجەتتىلىك جوق دەگەن شەشىم قابىلداندى. سودان سوڭ ۋلترادىبىستىق زەرتتەۋدىڭ كومەگىمەن تامىردىڭ ءىشىن تەكسەردىك. ناتيجەسىندە, جۇرەك قارىنشاسىنىڭ الدىڭعى بولىگىندەگى كۇرەتامىر قابىرعاسىندا تۇيىنشىك بارى انىقتالدى. پاتسيەنتتىڭ جۇرەگىنە ستەنت ورناتۋ قاجەت بولدى. ستەنت قويىلعاننان كەيىن ناۋقاس بىردەن كارديولوگيا بولىمشەسىنە اۋىستىرىلدى», دەدى ينتەرۆەنتسيوندىق حيرۋرگيا بولىمشەسىنىڭ مەڭگەرۋشىسى ساكەن انارتاەۆ.
تامىرىشىلىك ۋلترادىبىستىق زەرتتەۋ – كورونارلىق ارتەريالار مەن وزگە دە قان تامىرلارىنىڭ جاي-كۇيىن تەكسەرۋ ماقساتىندا جاسالاتىن دياگنوستيكا ءتۇرى. تامىر ءىشىن زەرتتەۋ دياگنوستيكالىق جانە تەراپەۆتىك دياگنوزداردى ناقتىلاۋ ماقساتىندا جاسالادى. ارنايى قۇرىلعى تامىردىڭ ىشىندەگى وزگەرىستەردى بايقاۋعا مۇمكىندىك بەرەدى.
فراكتسيوندىق رەزەرۆ كوبىنە كوروناروگرافيا كەزىندە نەمەسە وپەراتسيادان كەيىن ميوكارد يشەمياسى قاۋپىنىڭ الدىن الۋ ماقساتىندا جاسالادى. ول ورناتىلعان ستەنتتىڭ قانشالىقتى دۇرىس بەكىتىلگەنىنە كوز جەتكىزىپ, ەمدەۋ تاكتيكاسىن ايقىنداۋعا مۇمكىندىك بەرەدى. ايتا كەتەرلىگى, بۇل پروتسەدۋرالاردىڭ ءبارى دە مىندەتتى الەۋمەتتىك مەديتسينالىق ساقتاندىرۋ ەسەبىنەن جاسالادى.
