وتكەن جىلدىڭ ءبىرىنشى جارتىسىندا دەپارتامەنت 6 ءىس تەرگەپ, ونىڭ بەسەۋى سوتقا جولداندى. اياقتالعان ىستەر بويىنشا اينالىمنان 82 مونيتور, 77 پروتسەسسور, 10 ويىن تەرمينالى, 6 تەلەديدار, 4 كاسسا اپپاراتى, 4 بەينەرەگيستر جانە 1 ملن تەڭگە اقشالاي قاراجات الىندى. وسى تسيفرلار قاعاز بەتىنە تۇسكەنشە قىرۋار جۇمىس اتقارىلدى. ويتكەنى, ەكونوميكالىق قىلمىستاردى انىقتاۋ – قيىننىڭ قيىنى. مامانداردىڭ ايتۋىنشا, قۇقىقتانۋ بۇل عىلىمنىڭ بىرنەشە سالاسىن قامتۋدى تالاپ ەتەدى. بۇل جەردە اسىرەسە, كريميناليستيكانىڭ ورنى ەرەكشە.
دەپارتامەنتتىڭ كريميناليست ماماندارى قۇجاتتامالىق, كومپيۋتەرلىك-تەحنيكالىق, ەكونوميكالىق جانە تاۋارتانۋ زەرتتەۋلەرىن جۇرگىزە وتىرىپ, قىلمىستىڭ اشىلۋىنا ايتارلىقتاي ۇلەس قوسىپ كەلەدى. وتكەن جىلى دەپارتامەنت 41 قىلمىستىق ءىستى تەرگەپ, كريميناليست ماماندار 135 ءتۇرلى قورىتىندى جاساعان. كريميناليستەر ايعاق زاتتارعا قاراۋ جۇرگىزۋ, ءتىنتۋ, جاۋاپ الۋ جانە داۋىس ۇلگىسىن الۋ بارىسىندا مامان رەتىندە قاتىسادى.
– كريميناليست مامانداردىڭ تەرگەۋ امالدارىنا جانە جەدەل ىزدەستىرۋ ءىس-شارالارىنا قاتىسۋى ءىستىڭ ناتيجەلى اياقتالۋىنا ىقپال ەتەدى. دەپارتامەنتتىڭ «اياعى ۇزەڭگىدەن تۇسپەيتىن» كريميناليستەرى جانداۋلەت ناۋرىزباەۆ, باتىرحان سادىقوۆ – ءوز ءىسىنىڭ ماماندارى. رەسپۋبليكانىڭ ءتۇرلى ايماقتارىندا ۇيىمداستىرىلاتىن جەدەل-ىزدەستىرۋ شارالارىنا شاقىرىلاتىن تاجىريبەلى ماماندار. مىسالى, وتكەن جىلى ەكى قىزمەتكەرىمىز جامبىل وبلىسىنا كريميناليستىك زەرتتەۋ جۇرگىزۋگە بارىپ, 6 ەكونوميكالىق جانە 10 كومپيۋتەرلىك-تەحنيكالىق قورىتىندى جاسادى, 2 قىلمىستىق ءىستىڭ اشىلۋىنا سەبەپكەر بولدى. قازىر اتالعان ىستەردى جامبىلدىق ارىپتەستەر سوت قاراۋىنا وتكىزدى, – دەيدى تەرگەۋ باسقارماسى باسشىسىنىڭ ورىنباسارى مەدەۋ تاۋباي.
ىستەردى تەرگەۋ بارىسىندا قىزىلوردا قالاسىنىڭ تۇرعىنى, 58 جاستاعى ب.دوسپولوۆتىڭ وتكەن جىلى شىلدە-تامىز ايلارىندا جالعا العان پاتەرىندە 6 كومپيۋتەر قۇرىلعىسىن ورناتىپ, زاڭسىز ويىن بيزنەسىن ۇيىمداستىرعانى بەلگىلى بولدى. قالانىڭ تاعى ءبىر اۋدانىندا جالعا الىنعان عيماراتتا ج.بيساريەۆ دەگەن ازامات 15 كومپيۋتەر قۇرىلعىسىن قويىپ, عالامتور جەلىسىن پايدالانۋ ارقىلى ينتەرنەت-كازينو قۇمار ويىندارىن ويناتىپ, كولدەنەڭ تابىس تاۋىپ كەلگەن.
ماماندار مۇنداي زاڭسىزدىقتىڭ كوپشىلىگى جالعا العان عيماراتتاردا بولاتىنىن ايتادى. وتكەن جاز ايلارىندا 42 جاستاعى قالا تۇرعىنى س.ساعىندىقوۆ تا قارامانوۆ كوشەسىنەن جالداعان ۇيدە عالامتور جەلىسىن پايدالانىپ «رۋلەتكا», «پوكەر», «بلەك دجەك» ويىندارى ارقىلى تابىس تاپقان. ا.ەلەۋكەەۆا ءوزى جالعا العان ەكى قاباتتى عيماراتقا 30 پروتسەسسور مەن 17 مونيتور ورناتىپتى. ق.سارسەمبەكوۆ دەگەن قالا تۇرعىنى دا 10 كومپيۋتەرمەن 6 اي بويى وسىنداي زاڭسىز ويىن بيزنەسىمەن اينالىسىپ كەلىپتى. تەرگەۋ كەزىندە بەسەۋىنىڭ دە كۇندەلىكتى اقى تولەپ, جۇمىسقا وپەراتور-كاسسيرلەر العانى انىقتالدى. اتالعان ازاماتتاردىڭ ويناتقان ويىن تۇرلەرىن سوت كومپيۋتەر-تەحنولوگيالىق ساراپشىلار قورىتىندى ارقىلى تولىق راستالدى. ولار قىلمىستىق ارەكەتتەرىن مويىندادى.
قىزىلوردا قالالىق №2 سوتى وسى ازاماتتاردى قىلمىستىق كودەكستىڭ 307-بابى 1-بولىگى بويىنشا كىنالى دەپ تانىپ, ب.دوسپولوۆ, ج.بيساريەۆ جانە س.ساعىندىقوۆ 200 ساعاتقا قوعامدىق جۇمىستارعا تارتىلدى. ال ا.ەلەۋكەەۆا مەن ق.سارسەنبەكوۆكە 200 ايلىق ەسەپتىك كورسەتكىش مولشەرىندەگى 612 600 تەڭگە ايىپپۇل تاعايىندالدى. سونداي-اق 66 پروتسەسسور, 57 مونيتور, 6 مودەم, 3 حاب جانە كاسسادان الىنعان 156 420 تەڭگە قاراجات مەملەكەت پايداسىنا بەرىلدى.
وتكەن جىلى ماۋسىم ايىندا دا قىزىلوردا قالالىق №2 سوتى قىلمىستىق كودەكستىڭ 307-بابى 1-بولىگىندە قاراستىرىلعان زاڭسىز ارەكەتى ءۇشىن ويىن بيزنەسىن ۇيىمداستىرعان ەكى ازاماتتىڭ ءبىرىن 1000 اەك, ەكىنشىسىن 200 اەك كولەمىندە ايىپپۇلعا تارتتى. ەكى ءىستى دە قىزىلوردا وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى تەرگەدى.
ەكى ويىن ورنىنان جەلىلىك بلوكتار, تەلەديدارلار, مونيتورلار, تەرموپرينتەرلەر, ويىن رۋلەتكاسى, مودەم, بەينەرگيستر جانە 107 000 تەڭگە كولەمىندە اقشالاي قاراجات مەملەكەت پايداسىنا الىندى.
سوتتالۋشىلارعا تاعايىندالعان ايىپپۇل سوماسىن تولەۋگە ءبىر اي مەرزىم تاعايىندالدى, جالتارعان جاعدايدا ايىپپۇل ءماجبۇرلى تۇردە وندىرىلەدى.
دەپارتامەنت تاراپىنان عيمارات پەن پاتەر يەلەرىنە الدا دا زاڭسىز ويىن قىزمەتىنە ءۇي-جايلارىن بەرگەن جاعدايدا قىلمىستىق جاۋاپكەرشىلىككە تارتىلاتىنى تۋرالى ەسكەرتۋ جاسالدى. ويتكەنى مۇنداي عيماراتتار زاڭسىز ويىن وشاعىن اشۋ ءۇشىن ىڭعايلى بولىپ وتىر. مىسالى, وتكەن جىلدىڭ ناۋرىز-ءساۋىر ايلارىندا قالا تۇرعىنى, 33 جاستاعى م.داۋلەتوۆ ەكى جەردەن پاتەردى اۋىزشا كەلىسىممەن جالعا الىپ, زاڭسىز ويىن ورنىن اشقان. ءبىرىنشى مەكەنجايداعى پاتەرگە 9 پروتسەسسور, 9 مونيتور, 2 «ZOOM» اپپاراتىن الىپ كەلىپ, عالامتور جەلىسى ارقىلى «رۋلەتكا», «پوكەر», «بلەك دجەك», «ۆيدەويگرى» سەكىلدى ينتەرنەت-كازينو ويىندارىن ءباس تىگۋ ارقىلى ويناتقان. شاشەتەك پايدانىڭ ءدامىن تاقان ول بىرنەشە كۇننەن كەيىن ەكىنشى پاتەردى جالداپ, وعان 11 كومپيۋتەر, 2 «ZOOM» اپپاراتىن قويىپ, قۇمار ويىندار ويناتا باستاعان. قازاقستان رەسپۋبليكاسى قىلمىستىق كودەكسىنىڭ 307-بابى 1-بولىگىمەن قىلمىستىق جاۋاپكەرشىلىككە تارتىلعان وعان سوت شەشىمىمەن 200 ايلىق ەسەپتىك كورسەتكىش مولشەرىندە, ياعني 612 600 تەڭگە ايىپپۇل جازاسى تاعايىندالعان.
تەرگەۋ باسقارماسى باسشىسىنىڭ ورىنباسارى مەدەۋ تاۋبايدىڭ ايتۋىنشا, وتكەن جىلى وڭىردە 14 ويىن مەكەمەسى جابىلىپ, سوتقا دەيىنگى تەرگەپ-تەكسەرۋ ناتيجەسىندە 14 قىلمىستىق ءىس ايىپتاۋ اكتىلەرىمەن سوتقا جولدانعان.
زاڭسىز ويىن ويناتىلعان 139 مونيتور, 143 پروتسەسسور, 10 ويىن تەرمينالى, 10 مودەم, 6 تەلەديدار, بەينەرەگيسترلەر, 7 حاب جانە 1 ملن 467 مىڭ تەڭگە اينالىمنان الىنىپ, مەملەكەت پايداسىنا بەرىلدى.
ەكونوميكالىق قىلمىستار الەمىنىڭ ادىستەرى دە جىل سايىن جاڭارىپ, زامانىنا قاراي ءتۇرلى امال-ايلا تابىلىپ وتىر. بۇل زاڭسىز ويىن زالالىنىڭ الۋعا ءتيىستى مامانداردىڭ دا ءتاسىلى مەن دايىندىعىن دامىپ وتىرۋى كەرەكتىگىن اڭعارتادى. سوندىقتان دا كريميناليستەر ۇنەمى ىزدەنىس ۇستىندە جۇرەدى.
قىزىلوردا
