ءاليحان سمايىلوۆ پرەمەر-مينيستر كەڭسەسىن ۇكىمەت اپپاراتى رەتىندە قايتا قۇرۋ مەملەكەت باسشىسى باستاماشىلىق ەتكەن ينستيتۋتسيونالدىق رەفورمالاردىڭ ماڭىزدى ەلەمەنتى بولىپ تابىلاتىنىن اتاپ ءوتتى. ونىڭ ايتۋىنشا, ورتالىق جانە جەرگىلىكتى اتقارۋشى ورگانداردىڭ جۇمىسىن, قۇرىلىمدىق وزگەرىستەردى جالپى ۇيلەستىرۋ كۇشەيتىلەدى.
«ول ءۇشىن اپپاراتتىڭ قۇرىلىمى مەن ونىڭ قىزمەتى وڭتايلاندىرىلادى. ۇكىمەت پەن پرەمەر-ءمينيستردىڭ ساراپتامالىق-تالدامالىق, ۇيىمداستىرۋشىلىق-قۇقىقتىق قىزمەتىن قامتاماسىز ەتۋ كۇشەيتىلەدى. اپپارات پرەزيدەنت اكىمشىلىگىمەن بىرلەسىپ شەشىم قابىلداۋ راسىمدەرىن بيۋروكراتيادان ارىلتۋ جانە شامادان تىس رەگلامەنتتەۋدى جويۋ جونىندەگى جۇمىستى جالعاستىرادى», دەدى ءاليحان سمايىلوۆ.
ۇكىمەت اپپاراتى باسشىسىنىڭ م.ا. عالىمجان قويشىباەۆ ۆەدومستۆونىڭ جۇمىسى بيۋروكراتيادان ارىلتۋ, «حالىق ۇنىنە قۇلاق اساتىن مەملەكەت» جانە ورتالىقسىزداندىرۋ, سونداي-اق مەملەكەتتىك باسقارۋ دەڭگەيلەرى اراسىندا وكىلەتتىكتەردى قايتا ءبولۋ قاعيداتتارىنا نەگىزدەلەتىنىن حابارلادى.
پرەمەر-مينيستر وكىلەتتىكتەردى مەملەكەتتىك باسقارۋ دەڭگەيلەرى اراسىنداعى ورتالىقسىزداندىرۋ تۋرالى زاڭ جوباسى پرەزيدەنت اكىمشىلىگىنە كەلىسۋگە ەنگىزىلگەنىن ەسكە سالدى.
ۇكىمەتتىڭ 500-دەن استام فۋنكتسياسى مينيسترلىكتەر مەن اكىمدىكتەرگە بەرىلەدى.
«اتالعان زاڭ جوباسىمەن ءبىز مينيسترلەر مەن ولاردىڭ ورىنباسارلارىنىڭ دەربەستىگىن كۇشەيتەمىز. ەندى بارلىق اعىمداعى سالالىق ماسەلەلەر مينيسترلەردىڭ بۇيرىقتارىمەن قابىلداناتىن بولادى», دەدى ول.
كۇن تارتىبىندەگى ەكىنشى ماسەلەگە توقتالعان پرەمەر-مينيستر پرەزيدەنتتىڭ جارلىعىمەن ەكولوگيا, گەولوگيا جانە تابيعي رەسۋرستار مينيسترلىگى ەكولوگيا جانە تابيعي رەسۋرستار مينيسترلىگى بولىپ قايتا ۇيىمداستىرىلعانىن ايتتى. جەر قويناۋىن گەولوگيالىق زەردەلەۋ جانە مينەرالدىق-شيكىزات بازاسىن مولىقتىرۋ سالاسىنداعى فۋنكتسيالار مەن وكىلەتتىكتەر يندۋستريا جانە ينفراقۇرىلىمدىق دامۋ مينيسترلىگىنە بەرىلدى.
«يندۋستريا جانە ينفراقۇرىلىمدىق دامۋ مينيسترلىگىنىڭ باستى مىندەتتەرىنىڭ ءبىرى جەر قويناۋىن يگەرۋگە ينۆەستيتسيا تارتۋ بولىپ تابىلادى. گەولوگيالىق اقپاراتتىڭ بىرىڭعاي دەرەكتەر بانكىن ونەركاسىپتىك پايدالانۋعا بەرۋدى اياقتاۋ قاجەت», دەدى ءاليحان سمايىلوۆ.
يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ جەر قويناۋىنىڭ جاي-كۇيىنە مونيتورينگ جانە پايدالى قازبالاردى وندىرۋگە مەملەكەتتىك باقىلاۋ كۇشەيتىلەتىنىن, قاجەتتى سالالىق شەشىمدەر قابىلداۋ جانە بيزنەس-پروتسەستەردى تسيفرلاندىرۋ پروتسەسى جەدەلدەتىلەتىنىن اتاپ ءوتتى.
سونىمەن قاتار, پرەمەر-ءمينيستردىڭ ايتۋىنشا, وسى ايدا مينيسترلىكتەردىڭ جوسپارلانعان القا ماجىلىستەرىندە بارلىق سالالىق تۇجىرىمدامالار مەن دامۋ جوسپارلارى قارالادى.
كەڭەستى قورىتىندىلاي كەلە, پرەمەر-مينيستر ۇكىمەت الدىندا ەكونوميكانىڭ ناقتى ماندە 4%-عا ءوسۋىن قامتاماسىز ەتۋ, ينفلياتسيانى 2 ەسەگە 9,5%-عا دەيىن تومەندەتۋ جانە 2023 جىلى $24,4 ملرد كولەمىندە تىكەلەي شەتەلدىك ينۆەستيتسيالار تارتۋ سەكىلدى ماڭىزدى مىندەتتەر تۇرعانىن اتاپ ءوتتى.
ء«بىزدىڭ باستى ماقساتىمىز – ەلدىڭ الەۋمەتتىك-ەكونوميكالىق دامۋىنىڭ ءوسۋىن قامتاماسىز ەتۋ, حالىقتىڭ تۇرمىس ساپاسى مەن ءال-اۋقاتىن ودان ءارى ارتتىرۋ. سىزدەردەن ءتيىمدى جۇمىس جانە شەشىم قابىلداۋدا ۇلكەن جاۋاپكەرشىلىك تالاپ ەتىلەدى», دەپ تۇيىندەدى ءاليحان سمايىلوۆ.
