«2022 جىل قازاقستاننىڭ بۇكىل جاڭا تاريحىنداعى ەڭ قيىن, دەگەنمەن ەڭ ماڭىزدى جىلدارىنىڭ بىرىنە اينالدى. وتكەن جىل نەسىمەن ەستە قالدى؟ بۇل جىلدىڭ باستى ساياسي ترەندتەرى قانداي؟ وسى تۇستا بىرنەشە جايتتى اتاپ وتكىم كەلەدى. قاڭتار ايىنداعى وقيعالاردان كەيىن جانە حالىقارالىق شيەلەنىستىڭ كۇشەيۋى اياسىندا قوعامدا شوعىرلاندىرۋعا بەلگىلى ءبىر سۇرانىس قالىپتاستى. بۇل سۇرانىس ماۋسىم ايىنداعى رەفەرەندۋم بارىسىندا كورىنىس تاپتى, ونىڭ ناتيجەلەرى ساياسي تۇرعىدان ەلدەگى ازاماتتىق شوعىرلانۋدىڭ جاڭا دەڭگەيى مەن جاڭا مازمۇنىن قالىپتاستىردى. ءوز كەزەگىندە, قاراشا ايىندا وتكەن پرەزيدەنتتىك سايلاۋدىڭ ناتيجەلەرى قوعام مەن مەملەكەتتىڭ ەلدىڭ ودان ءارى دامۋ پەرسپەكتيۆالارى تۋرالى ءبىرتۇتاس تۇسىنىگىن كورسەتتى. سوندىقتان وتكەن جىلدىڭ باستى ساياسي قورىتىندىلارىنىڭ ءبىرى – بيلىك قوعامدىق شوعىرلاندىرۋدى قولداپ, بەلگىلى ءبىر جاڭا دەڭگەيگە شىعاردى», دەپ جازدى ەرلان قارين تەلەگرام ارناسىندا.
2022-ءنى «جان-جاقتى رەفورمالار جىلى» دەپ اتاعان مەملەكەتتىك كەڭەسشى ءبىر جىل ىشىندە پرەزيدەنت ەكى رەت جولداۋ جاساپ, بۇل قۇجاتتاردا قاسىم-جومارت توقاەۆتىڭ قوعامدىق-ساياسي جانە الەۋمەتتىك-ەكونوميكالىق سالالاردا تۇبەگەيلى وزگەرىستەرگە باستاماشى بولعانىن اتاپ ءوتتى.
«وسىنداي وزگەرىستەردىڭ ناتيجەسىندە ساياسي جاڭعىرتۋدىڭ اۋقىمدى باعدارلاماسى ىسكە قوسىلدى, كونستيتۋتسيالىق رەفورما جۇرگىزىلدى, ەكونوميكانى مونوپولياسىزداندىرۋ جانە قۇرىلىمدىق قايتا قۇرۋ پروتسەسى باستالدى, ءۇش جاڭا سالا قۇرىلدى. وتكەن جىلى باستالعان جانە ىسكە قوسىلعان بۇل رەفورمالار ودان ءارى العا جىلجۋعا سەرپىن بەرەدى. سونىمەن وتكەن جىلعى پرەزيدەنتتىك رەفورمالار قازىرگى ۋاقىتتاعى جانە 2023 جىلداعى ساياسي كۇن ءتارتىبىن بەلگىلەۋدى جالعاستىرادى دەپ ايتۋعا بولادى», دەيدى ە.قارين.
«وتكەن جىلى قوعامدىق ءورىستى ءبىرشاما وزگەرتۋ باستالدى. ەلىمىزدىڭ قوعامدىق-ساياسي ومىرىندە جاڭا تۇلعالار پايدا بولدى, جاڭا قوزعالىستار مەن بىرلەستىكتەر, ونىڭ ىشىندە پارتيالار وزدەرىن جاريالادى. ال ءبىرىنشى ۇلتتىق قۇرىلتايدىڭ شاقىرىلۋى جالپىۇلتتىق ديالوگتى جاڭا ينستيتۋتسيونالدىق دەڭگەيگە كوتەردى. 2022 جىلى قازاقستان دا بەلسەندى سىرتقى ساياساتتى جۇرگىزدى. تۋىنداعان كۇردەلى گەوساياسي جاعدايلارعا قاراماستان, ەلىمىز تەكسەرىلگەن, بىراق سونىمەن بىرگە سەرپىندى سىرتقى ساياسي باعىتتى جۇرگىزۋدى جالعاستىردى. ءبىز بارلىق نەگىزگى سەرىكتەستەرىمىزبەن ءوزارا ءتيىمدى ىنتىماقتاستىقتى دامىتتىق. پرەزيدەنتتىڭ قىتاي, رەسەي, تۇركيا, ءباا, يران, قاتار, ساۋد ارابياسى, ازەربايجان, فرانتسيا جانە وزبەكستانعا ساپارلارى جاھاندىق تۋربۋلەنتتىلىك جاعدايىندا ەلىمىزدىڭ كوپۆەكتورلى سىرتقى ساياساتىنا جاڭا مازمۇن بەردى. پاندەميا باستالعاننان بەرى قحر توراعاسى سي ءتسزينپيننىڭ قازاقستانعا العاشقى شەتەلدىك ساپارى, سونداي-اق ريم پاپاسى فرانتسيسكتىڭ اپوستولدىق ساپارى ماڭىزدى بولدى», دەگەن ە.قارين ساراپشىلار قاۋىمداستىعى ءۇشىن 2022 جىل سونىمەن قاتار نەگىزگى قوعامدىق قۇندىلىقتاردىڭ جاڭا جۇيەسىن ىزدەۋ توڭىرەگىندەگى پىكىرتالاستاردىڭ باستالۋىمەن ەستە قالاتىنىن اتاپ ءوتتى.
«قوعامدا جاڭا قۇندىلىق ماتريتساسىن قالىپتاستىرۋ ءۇشىن مەملەكەت ەڭبەك يدەولوگياسى مەن ىنتىماقتاستىقتى, ءبىلىم بەرۋ كۋلتىن, تابيعاتقا ۇقىپتى قاراۋدى ماقساتتى تۇردە باستادى. بالكىم, وسى جىلدىڭ ەڭ ءساتتى يدەولوگيالىق باستامالارىنىڭ ءبىرى – ءبىزدىڭ زاماناۋي مەملەكەتتىلىگىمىزدى بەينەلەيتىن نەگىزگى ۇلتتىق مەرەكە رەتىندە رەسپۋبليكا كۇنىن قايتارۋ بولعان شىعار. وسىلايشا 2022 جىلدى قورىتىندىلاي كەلە, بۇل جىل ءبىزدىڭ مەملەكەتتىلىگىمىز ءۇشىن بۇرىن-سوڭدى بولماعان كوپتەگەن سىن-قاتەردى ەڭسەرۋ جانە ەلدى جان-جاقتى جاڭعىرتۋدىڭ باستالۋىمەن ەستە قالادى دەپ ايتۋعا بولادى», دەپ جازدى مەملەكەتتىك كەڭەسشى.
